38 urtetako langile bat hil zen astelehenean, Zambranan, baso lanetan ari zela. Hildakoa Castellongo Contrachapados Archena enpresarentzat ari zen lanean, Arabako Foru Aldundiaren azpikontrata. Bada, foru erakundearen aurrean mobilizatu gara, euskal gehiengo sindikalak deituta, lan heriotza hau eta aurten Euskal Herrian gertatutako 45. lan istripu hilgarriak salatzeko.
Ostiralean, Iruñera eramango dugu lan heriotzen odolustearen salaketa, Nafarroan egunotan izandako lan istripu lazgarrien harira. Kasu honetan, Nafarroako Parlamentuan egingo dugu elkarretaratzea, 11:00etan, euskal gehiengo sindikalak deituta ere.
Garbiñe Aranburu: “Indarkeria patronala”
Hamaika TBn egindako elkarrizketa batean egin ditu adierazpenok LABeko idazkari nagusi Garbiñe Aranburuk, Gasteizen gehiengo sindikalarekin batera atzo Zambranan hildako langileriaren heriotza salatzeko elkarretaratzearen ondoren eta Igantziko (Nafarroa) harrobian izandako beste laneko heriotza baten berri izan dugun egunean bertan. Harrobi honetan langile bat hil da materiala deskargatzen ari zen kamioi bat irauli ondoren. Gaur gertatutakoarekin, 46 dira Euskal Herrian urte hasieratik hildako langileak.
“Arazo larri baten aurrean gaude, askotan salatu izan duguna. Abuztua eta iraileko istripuen gorakadak ez dio koiuntura bati erantzuten, sakoneko arazoei erantzuten die. Horren atzean dauden arrazoiak askotan salatu izan ditugu. Hau guztia indarkeria patronala dela ulertu behar dugu, ekidin daitezkeen istripuei buruz ari gara. Laneko gaixotasunetan ere gorakada nabarmena ematen ari da”, adierazi du Aranburuk.
“Hori guztia prebentzio neurri egokiekin eta prekaritateari mugak jarrita ekidin daiteke. Guztiz onartezina dela iruditzen zaigu eta, batez ere, instituzioen arduragabekeria eta utzikerian jarri nahi dugu arreta, ez dutelako inolako neurririk hartzen egunero-egunero gure lantokietan gure lan-osasunaren urraketaren aurrean. Gure ekintza sindikalean prebentzio neurriak bete daitezen lana zorroztuko dugu eta, hortik harago, mobilizazioa bultzatzen jarraituko dugu bestelako neurriak har daitezen”, gaineratu du.
“Ez dira kausa naturalei egotzi ahal zaizkien heriotzak. Horregatik, are larriagoa suertatzen da horrelako datuak izatea. Gainera, kontuan izan behar da laneko heriotza bakoitzeko laneko gaixotasunen ondorioz hiltzen den langile kopurua ere biderkatu egiten dela. Laneko gaixotasunak ez dira estatistiketan agertzen. Heriotzera iritsi gabe ere laneko istripu larrien kopurua ere igotzen doa”.
“Beraz arazo sozial oso larri baten aurrean gaude eta ezin da, inondik inora, ontzat eman egoera hau betikotzea. Are gutxiago, berriro ere, krisi testuinguru batean erdian gaudenean eta ikusten dugunean patronalak ez duenean prebentzioan inbertitzearen aldeko apusturik egiten, azken batean, zigor gabe sentitzen delako. Eta horrek eramaten du horrelako istripuak patronalarentzat jasangarriak izatera eta guk ez dugu onartuko. Instituzioek bestelako erabaki batzuk hartu behar dituzte. Ikuskaritza lanak indartu behar dira eta horretarako bitarteko gehiago behar da. Eta ardura politikoak ere eskatu behar zaizkio patronalari eta bestelako neurriak ere har daitzeke, prebentzio neurriak betetzen ez dituzten enpresekin ez azpikontratatzeko inolako lanik edo diru publikorik ez emateko”, adierazi du LABeko idazkari nagusiak.