Estatuko boletin ofizialak informatzen duenaren arabera, bi enpresek Espainiar Estatuko Industria Ministerioari euskal kostaldean hidrokarburorik dagoen arakatzeko permisoa eskatu diete. Bi multinazionalez ari gara: Capricorn Spain eta Shell Usptream Spain BV.
LABek salatzen du, horrelako erabakiek agerian uzten dutela gure burujabetza falta, gure herriak behar dituen erabakiak hartzeko. Madrilen erabakiak hartzen dira, gure herriko sektore desberdinekin hitzegin edo eztabaidatu gabe eta, denon artean behar dugun eredu energetikoa argitu gabe. Aldi berean, ezin ahaztu, prospekzio berak eragin kaltegarriak dituela gure kostaldean, gure arrantzan, baita gure itsasoan ere (leherketa sismikoak, kutxadura, isuriak..). Horregatik, LABen ustez ezin da gure herriaren etorkizuna multinazionalen esku utzi.
Udan zehar, Mediterraneoan eta Kanariar Uharteetako kostaldean izandako gertakariak (kasu haretan petrolioaz zebiltzan eta interesa zeukan enpresa Repsol zen) orain Euskal Herrian errepikatzen dira. Toki guztietan, proiektu hauekiko oposizioa, oso zabala izan da. Hemen ere, erakundeetako agintariei, proiektu honek aurrera egin ez dezan eman beharreko pausu guztiak eman ditzatela eskatzen diegu.