Azken egunotan AHTaren inguruan ezagutu ditugun albisteen aurrean, LABek ardura politikoak eskatzeaz gain, AUDITORIA SOZIALA burutzea, obrak eta lizitazioak betirako bertan behera gelditzea eta aurtengo aurrekontuetan AHTarentzat bideratu beharreko diru publikoa gastu sozialera aldatzea eskatzen du.
Edozein kasutan, ez zen horrelakorik egin behar. Sarri esan dugun bezala sozialki, ekonomikoki eta ekologikoki Abiadura Handiko Trena euskal herritarrontzat guztiz kaltegarria da, eta gainera, ez digu inolako garraio arazorik konpontzen, edozein kasutan, areagotu baino ez luke egingo. Berriz ere, atzeraezinezko zementozko kalte erraldoia inposatu digute langileoi eta herritarroi orohar. Beti jakin izan dugu, administrazioa eta eraikuntza enpresa handien artean interes harremanak eta mesedeak bazirela, orain agerikoak dira, Zaratamoko zubi hau adibide bezala.
Oso hasarre gaude, badakigulako gainera, hau ez dela era honetako azken albistea izango. LABek hamarkadak daramatza esaten makro proiektu honek eraikuntza enpresa jakin batzuen interes ekonomikoei baino ez diela erantzuten, eta administrazioak milioika euro kontu publikoetatik oparitzen dizkietela. Ba nahikoa da. Aurten eta hemendik aurrera aurrekontu publikoetatik azpiegitura honen partida kentzea exijitzen dugu, eta dagoeneko aurrekontuan agertzen dena, hain beharrezkoa dugun gastu sozialerako erabili dezatela.
Aspaldian, gure esanak betetzen ari dira: Guardia Zibila eta fiskaltza ADIF entrepresa publiko espainiarra ustez diru publikoa desbideratzeagatik ikertzen ari da; Madrilek Eusko Jaurlaritzarekin AHTari loturiko zor ekonomiko batzuk kitatu gabe ditu oraindik, eta era berean, Lakuak kreditu ezberdinak ordaindu behar ditu AHTaren lanak garatu ahal izateko, AHTaren obretan ustez korrupzio kasua eman delakoan Corsán-Corvian entrepresa ikertzen ari da fiskaltza, eta jakin dugunez, Euskal Herriko AHTaren lau eremuz arduratzen da diogun enpresa hau. Hau dena nahikoa ez balita, orain inoiz erabiliko ez den Zaratamoko zubiaren albistea datorkigu.
Lotsagarria da langileon zergetatik diru publikoa beharrezkoa ez dugun obra faraoniko honetan xahutzea, eta izenik gabekoa da enpresa pribatu eta administrazio publikoaren artean herritar eta langileoi horrela lapurtzea interes espekulatiboetarako.
LABek, ikertzen ari diren kasuez gain, ADIFek esku artean izan dituen guztiak ikertzea eskatzen du; horrekin batera, auditoria sozial bat ere eskatzen du, egoera larri honen aurrean, ustezko korrupzio kasu hau izebergaren punta izan daitekeelakoan. Auditoria bat behar-beharrezkoa dela irizten dugu non eragile sindikal eta sozialen parte hartzea bermatuko den. Halaber, AHTaren etorkizuneko bideragarritasunaren inguruko informe bat ere eskatzen dugu Gobernuen aldetik, eta informe hori lantzerakoan ere eragileon esku hartzea beharrezkoa jotzen dugu, gaur baita eguna, diru publikoan dakarren xahuketa aintzat hartuta, datozen urteetan herritarron, euskal jendartearen etorkizuna zer neurritan hipotekatua izango den ezkutatzen zaiguna.