Hainbat enpresen alde Ogasunaren gainean Lourdes Goicoecheak egindako presioen berri jakin ostean, LAB sindikatuak UPNren Gobernuak berehala dimisioa eman eta hauteskundeak deitu ditzan exijitzen du.
Gaurkoa bezalako berriek, CANen dieten afera iceberg-aren tontorra besterik ez zirela erakusten dute: Nafarroako ondare publikoaren harpilaketaren aurrean gaude, Nafarroako Kutxan, Herri Lanetan, Osasungintzan edota Ogasunean bertan gauzatu dena. Ez dira gertakari isolatuak, lapurren mozkorraldia baizik. Lotsarik gabeko elite politikoa (UPN, PP eta PSN alderdiez osatutakoa) baliabide publikoen kontura aberastu da, elite enpresarialari mesede eginez, langileriari murrizketak inposatzen zizkion bitartean.
Goicoecheak dimisioa eman behar du: Ogasunaren buru izatea, otsoa ardien zaindari jartzea bezalakoa da. Baina hau ez da nahikoa: Gobernu osoak eman behar du dimisioa, Yolanda Barcinarengandik hasita, CAN eta dirukutxa publikoak hustutzeagatik, langileriaren kontura aberasteagatik, Nafarroa bankarrotaren ertzeraino eramateagatik.
Aldaketa bikoitza premiazkoa da Nafarroan: Gobernu aldaketa eta eredu aldaketa. Ustelkeria kasu ugariak iraganaren parte izan daitezen, Errenta Aitorpena egin ahal izan dezagun lapurtzen digutela sentitu gabe. Nafarroa hainbeste urtez odolustu duen Erregimen nafar-espainolarekin amaitu eta benetako demokrazia ezarri beharra dago, non geure etorkizunaren eta baliabide publikoen jabe izango garen, non langileriaren eskubide sozialak bermatuko diren.
Geure esku dago, usteleriaren kontra eta aldaketaren alde mobiliza gaitez!