Langileek mobilizazioa egin dute Gasteizko Probintzia plazan, Arabako Foru Aldundiaren egoitzaren aurrean. Gaurkoan, Olentzero eta Mari Domingik ere parte hartu dute, eta ikatza utzi diete Arabako Foru Aldundiaren atean Emilio Sola Politika Sozialen Foru diputuari eta Patxi Anton, Gizarte Ongizateko Foru Institutuko kudeatzaileari.
Hemen duzue Aldundiko arduradunei, ikatzarekin batera, utzi dieten gutuna:
Olentzero eta Mari Domingi gara, eta opari batekin batera gutun hau ematen dizuegu. Guztiontzat hain zaila izan den urte honetan, Arabako Egoitza Pribatuen egoerarekin dugun ezinegona helarazi nahi dizuegu.
Badakigu oso hilabete zailak izaten ari direla erabiltzaileentzat, COVID-19ren aurrean ahulenak direnentzat. Baina adinekoak zaintzeko eta haiekin egoteko egunez egun jaikitzen diren langileentzat ere hala izaten ari dira.
Egunez egun ikusten dute, adinekoak bakardadean itzaltzen direla, ezin dutela harremanik izan eta gaitasun fisikoak gutxitzen zaizkiela. Zama fisikoa eta psikologikoa da, eta langileek ezin dute gehiago jasan.
Egoera honek Arabako egoitza pribatuetako langileen baldintzak eta eskubideak okertu besterik ez ditu egin. Ia 2 urte daramatzate kalera ateratzen, salatuz eta enpresei eskatuz patronala osa dezatela baldintza duinak negoziatu ahal izateko, langileen bizitza eta erabiltzaileen zaintza duin bihurtzeko.
Gizarte osoak entzun ditu. Mendira ere iritsi dira bere oihu eta kantak, bizitza hobe baten alde. Beraz, pena ematen digu zuek arretarik jarri ez izanak eta milaka pertsonaren egoera aldatzeko ezer egin ez izanak.
Horregatik, aurten, ikatza ematea beste aukerarik ez dugu. Beste urtebetez egoera aldatu dadin espero dugu. Bitartean, langileek beren oihuak oparitzen jarraituko dizkizuete, ahotsak ez baitie inoiz hutsik egingo.