Sindikatu, eragile, alderdi politiko, erakunde eta Sakanan itxitako enpresa ordezkari ezberdinek Greba Orokorra deitu dute Sakanan datorren otsailaren 28rako. Sakana eta bere etorkizunaren defentsan eta UPNren politika ekonomiko inposatzaileak salatzeko langile eta herritar orori kalera ateratzeko deialdia luzatu die.
«Jada, krisiaren 5.urteari ekin diogu Sakanan. Egoeraren larritasuna begi bistakoa da bailara osoan: hamarnaka enpresa txiki, ertain eta handi itxita, ehundaka lanpostu suntsituta, 1800 langabetu baino gehiago (2008an baino 3 aldiz gehiago), gazteen erdia langabezian, komertzioa eta ostalaritza kinka larrian, lehendabiziko sektorea bizi irauten, hezkuntza, osasun eta zerbitzu sozialak murrizturik… Jakinda Iruñako Gobernutik ez dugula laguntzarik jasotzen, ez proposamenik, ez ekimenik gure egoera sozio ekonomikoa dinamizatu eta suspertzeko, mugitzea erabaki genuen sakandarrok eta 2011an krisi mahai biltzea lortu zen, sindikatu, alderdi, enpresari elkarte eta eragile ezberdinak adostasun garrantzitsuetara iritziz. Sakanatik Sakanarako dinamika bati ekitea erabaki zen, lan postu duhinak sortu, gure ehun ekonomikoa suspertu eta herritarron ongizatea hobetzeko. Horretarako abiapuntua adostu zen krisi mahaian:
1. Garapenerako Plan Estrategikoa egitea.
2. Sakanako garapenaz arduratuko den bertako entitatea sortzea, Sakanako Garapen Agentzia.
3. Nafar Gobernuak Sakana “Urgenteki Berrindustrializatzeko Zonaldea” deklaratzea.
4. Nafar Gobernuak lankidetza iraunkorra bermatzea Mankomunitatea eta Garapenerako Agentziarekin, markatutako helburu sozio ekonomikoak betetzen laguntzeko.
5. 2012ko aurrekontuetan Sakan adostutako ekimen hauek finantziatzeko diru partida bat onartzea Nafarroako Legebiltzarrak.
6. Gizartearen dinamizaioa bultzatzea, herritarrak kontzientziatu eta Sakanako garapen sozio-ekonomikoan inplikatzeko.
Sakanaren esku dagoena jada martxan jartzen ari da, 1, 2 eta 6. puntuak abian dira edo jartzear daude, erakunde, herritar eta eragileen lanari esker. Nafar Gobernuari zegozkion 3, 4 eta 5. puntuetan hitz politak entzun, baina praktikan ezezko borobila jaso dugu sakandarrok. Aski da! Esateko garaia dela iruditzen zaigu. Sakana itxi nahi du UPN-k eta guk bertan lan eta bizi nahi dugu. Gure etorkizuna lapurtu nahi dute eta gure esku dago defendatzea. Nafar Gobernuak konpromisu batzuk hartu behar ditu Sakanarekiko:
• Nafar Gobernua Sakanako garapenerako agente aktibo eta positibo bat izan behar du, lehendabiziko, bigarren eta hirugarren sektoreak suspertu eta garatzeko.
• Berrindustrializatzeko plan urgente bat garatu behar du, Sakanako erakunde, eragile, sindikatu eta Garapen Agentziarekin batera. Lan postuen suntsiketa gelditu behar du, berriak sortzen hasteko.
• Gure gazteen hezkuntzarako eskubidea bermatu behar du, Altsasuko Lanbide Hezkuntzan ematen diren aukerak dibertsifikatuz eta bailararen beharreri erantzunez eta gainontzeko zentruetako kalitatea bermatuz, behar den inbertsioa eginez eta langile kopurua bermatuz.
• Bailarako herritarron osasun eta babes sozialerako eskubidea bermatu behar du, Aita barandiaran edo Josefina Arregi bezelako zentruen kudeaketa publikoa lehenetsiz, Osasun Zentruetako funtzionamentua bermatuz bai ordutegietan, bai hedapenean, bai langileen kopuruan.
• Sakanan, jada, ehundaka lagun dira langabezi subsidiorik gabe gelditu direnak. Baldintza duhinetan bizitzeko hainako babes sozial eta ekonomikoa bermatu behar du.
Sakana eta gure etorkizuna defendatzeko datorren otsailak 28an SAKANAN GREBA OROKORRA EGINEN DUGU DENOK PARLAMENTU AURRERA JOATEKO dadozkigun eskaerak aurrez aurre egiteko.
Sakanan Bizi eta Lan!
Oraingoz, deialdiarekin bat egin duten sindikatu, alderdi, udaletxe eta eragile sozialak hauek gara:
Sindikatuak: LAB, EHNE.
Itxitako enpresen odezkariak: Hisphording Ispaniako, Arfe, Recindsa eta Inasako langile ohiak. Sunsundegui eta bere azpikontratetako langileen ordezkariak Tapicerias del Car eta Montajes Zapardi, hurrengo egunetan enpresa komite gehiagotako atsekimenduak jasoko ditugu
Eragileak: Askapena, Bilgune Feminista, Altsasuko Fenministak, Ikasle Abertzaleak, Sakanako Gazte ZukGua prozesuko gazteak, Arbizuko gazte asanblada, Bakaikuko gazte asanblada, Iturmendiko gazte asanblada, Ziordiko Gazte Asanblada, Altsasuko gazte asanblada, FP eta Institutuko langileen ordezkariak, Langabetuen Batzarra, Abian, Osasungintzako eta Zerbitzu Sozialetako langileen ordezkariak, Pentsionistak Martxan eta Sasoiak.
Alderdi politikoak: Ezker Abertzalea, Geroa Bai, Bildu, Aralar eta IU.
Erakundeak: Sakanako Mankomunitatea, Sakanako Garapen Agentzia, Uharte Arakil, Lakuntza, Arbizu, Etxarri Aranatz, Bakaiku, Iturmendi, Altsasu eta Olaztiko udalak. Hurrengo eguneatn gainontzako udaletan plenoak eginen dira atsekimendua erabakitzako.»
