Bizkaiko esku-hartze sozialerako hitzarmen duin baten alde egiten ari diren mobilizazioen barruan, sektoreko langileak 7 orduko mobilizazioa egiten ari dira Bilbon, El Corte Inglesen eta Bizkaiko Foru Aldundiaren aurrean, LAB eta ESKren deialdiari erantzunez. LABeko kideek bertan adierazi dutenez, Gizardatz patronalaren zuzendaritza batzordeak hitzarmen sektoriala sinatzeko akordio batera iristeko edozein aukera dinamitatu du.
Gaineratu dute Gizardatzek aurrekoa baino okerragoa den proposamen bat egin duela eta akordio batera iristeko behar diren zubiak boikotatzen dituen negoziazio-esparru bat inposatu. Bi urte gehiago luzatzen duen hitzarmena proposatu du eta erosteko ahalmena gehiago galtzea dakarren eskaintza ekonomikoa eskaini du.
Egoera honen aurrean honakoa adierazi dute:
- Gizardatzen helburua erakunde batzuk administrazio publikoekiko harremanetan dituzten botere- eta abantaila-egoerei eustea da gaur egun. Hau da, lehentasun osoa erakundearen “bideragarritasuna” da, zerbitzuaren kalitatea eta langileen lan-baldintzak konplexurik gabe sakrifikatuz.
- Gizardatz osatzen duten erakundeetako zuzendaritzak, gaur egun, oztopo dira zerbitzuaren kalitatea hobetzeko eta langileek egindako lana aitortzeko.
- Gizardatzeko negoziazio-taldea informazio igorle hutsa da, eta ez du negoziazioaren buru izateko gaitasunik. Negoziazio hori boikoteatzen ari diren Gizardatzeko parte diren zenbait erakunderen tresna bihurtu da, hauek nahiago baitute akordiorik ez sinatzea.
Gizardatzen arduragabekeriaren dimentsioa eta hitzarmena epe luzera blokeatzeko arriskua ikusita, LABek langileekin kontrastatuko ditu egungo egoera larriari aurre egiteko eman beharreko urratsak. Batzarrak egingo ditugu erakundeetan eta batzar orokorrak ere deituko ditu.
Erakunde eta elkarteen zuzendaritzei eskatuko die aurkeztu duten proposamena den egin dezaketen proposamen bakarra eta hori hala balitz, justifikatu dezatela.