Ipar Euskal Herrian ere, odol isuriak ez du etenik. Larunbatean langile bat hil zen Baionan eta beste bat zauritu zen altuerako erorketa baten ondorioz. Atzo, berriz, Ziburuko 27 urteko M.D. langilea Landetan hil zen enpresa batean azpikontrata bezala lanean ziharduela, arrisku handikojarduera batean. 2023 honetan Ipar Euskal Herrian lan istripuz gertatutako 3. heriotza da azken hori, eta 11. nazio mailan.
LAB sindikatuak elkartasuna adierazi nahi die langilearen senideei, hurbilekoei eta lankideei zein Euskal Herriko langileria guztiari.
Ipar Euskal Herrian oso modu nabarmenean ari da areagotzen lan istripu hilkorren kopurua. Azaleratzen ari diren istripuak guztiz klasikoak dira, kontrolagarriak diren altueretako erorketak zein aldez aurretik ezagunak diren produktu toxikoekin gertatutako intoxikazioak, azken kasu honetan gertatu den modura. Istripu hauek guztiz ekidingarriak ziren eta beharrezko neurriak hartuta langile hauek gaur bizirik leudeke. Guzti hau, Frantziako estatuaren murrizketa prozesu basati baten baitan gertatzen ari da, ez dago kasualitaterik, langileriaren lan osasunak eskubideekin zerikusi zuzena du.
Gogorarazi nahi dugu enpresariek dutela lan osasunaren bermearen ardura osoa eta administrazioak egikaritu eta betearazi behar duela berme hori. Enpresarien jarrera eta utzikeria bizitzarekin ordaintzen ari gara. Lan osasunaren galera nabarmen honen aurrean, patronalari aurre egiteko LABek fronte sindikal batu baten alde dihardu lanean Iparraldean ere, eta mobilizazioak bultzatuko ditu.