2024-09-20
HomeZerbitzu PublikoakOsasungintzaOsakidetzak egindako EPE berri baten iragarpena propaganda hutsa da

Osakidetzak egindako EPE berri baten iragarpena propaganda hutsa da

Osakidetzak iragarri berri du familia mediku zein pediatrentzat EPE berria martxan ipiniko duela, 215 plaza betetzeko. LABen iritziz, iragapen mediatiko hau Osakidetzako zuzendaritzari pilatzen ari zaizkion arazoak estaltzeko propaganda saiakera baino ez da. Azken finean, iragarritako 215 plaza horiek ez dira berriak izango, aspaldi onarturiko 1.083 plazako EPE prozesu horren parte baizik.

Osakidetzak iragarri berri du familia mediku zein pediatrentzat EPE berria martxan ipiniko duela, 215 plaza betetzeko. LABen iritziz, iragapen mediatiko hau Osakidetzako zuzendaritzari pilatzen ari zaizkion arazoak estaltzeko propaganda saiakera baino ez da. Azken finean, iragarritako 215 plaza horiek ez dira berriak izango, aspaldi onarturiko 1083 plazako EPE prozesu horren parte baizik.

Osakidetzak konpondu gabeko arazo asko eta larriak dauzka aurrean: Lehen Arretako egoera penagarria, pasaden kurtsoan hiru greba ekarri dituena; aurreko EPEan gertaturiko filtrazioen gaineko prozesu judiziala; eta garapen profesionalaren ordainketa eta deialdi berria egitea, besteak beste. Eta berauei heldu behar den moduan heldu beharrean, euren irudi publikoa garbitu nahi dute EPE prozesuak modu bihurrian erabiliz.

Deialdi berri honen aurrean, LABek hurrengoa esan nahi du:

• Gardentasun falta: 215 plazako prozesuaren berri komunikabideetan izan dugu sindikatuok, langileon ordezkaritzaren gainetik salto eginda. Hau ez da serioa. Salatu behar dugu ekainean egindako azken Mahai Sektoriala, lehen arretari buruzko monografikoa gainera, iragarpena eta informazioa emateko lekua eta momentua zela, ez mikrofonoen aurrean. Bestaldetik, ezin da onartu soilik sinatu zuten sindikatuek jasoko dutela informazioa: sinatu ala ez, langileon ordezkari guztiok informazio hori jasotzeko eskubidea daukagu.

• Ez-nahikoa: 215 plaza horiek ez dute konponduko Lehen Arretan eta Osakidetzan dagoen egoera. Alde batetik, mediku gehiago behar direlako. Plaza horiekin gaur egun prekarioan ibiltzen diren 215 medikuk euren egoera egonkortzeko aukera izango dute, baina horiek gaur egun ere lanean dabiltza. LABek egindako ikerketaren arabera, gutxienez medikuen kontratuen %77 (hortik aurrera) prekarioak dira. Kontuan hartuta Osakidetzak kategoria guztietako 3.000 plaza ezkutatzen dituela kontratu prekarioen atzean eta 2028 urtera arte urtero 1.000 langile jubilatuko direla, 7.000 plaza beharko genituzke momentuz egoera egonkortzeko. Osakidetzak eta Satse, SME eta UGT sindikatuek sinatu zuten 1.083 plazako EPEak (horien barruan daude orain iragarritako 215 plaza horiek) ez ditu betetzen, ezta azken EPEtik jubilatu diren langileen hutsuneak ere.

Bestaldetik, azpimarratu behar dugu Lehen Arretako egoera ez dela soilik medikuekin konpontzen. Arazoa haratagoa doa eta eredua bera aldatu behar da errotik. Gainontzeko kategorien kopurua ere handitu behar da eta sakoneko aldaketak egin.

Lehen Arretaren egoera hobetzeko negoziazioa behar da, hartu beharreko neurriak denon artean adosteko. Baina hiru greba egin ostean, Osakidetzak negoziazio errealik egin gabe jarraitzen du, bat-bateko neurri partzialak ezartzen eta jendartearen eskubideak murriztuz, osasun zentroen ordutegien murrizketarekin egin duen bezala.

• Kategoria guztiak beharrezkoak dira: Osakidetzak adierazitakoaren arabera, badirudi 1.083 plazak mediku eta erizainentzat izango direla. Honen aurrean, gainontzeko kategorien beharra eta garrantzia aldarrikatu nahi dugu.

• Gardentasun propagandistakoa: Familia mediku eta pediatren prozesuan filtrazioak ekiditeko neurriak erabiliko direla ozenki iragarri du Osakidetzak, baina esan behar dugu kategoria horietan, hain justu, inoiz ez dela aparteko arazorik sortu filtrazioekin. Sindikatu guztiekin adostu ez dituen neurri horiek mediku espezialisten kategorietan aplikatu behar dira, praktika ustelak eta mafiosoak bertan daudelako erroturik.

 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.