Gaur goizean LABeko Bilboko egoitzan Labore ekimenaren bisita jaso dugu. Proiektu honek, elikadura burujabetzan sakontzeko tresna izan nahi du. Saltoki itxura izango du kontsumo elkarte honek eta nahiz eta oraindik ez den publikoki martxan jarri, aurki zabalduko ditu bere ateak. Ekimen berri honi ongi etorria emateaz gain LABek elikadura burujabetzaren alde eginiko apustua berretsi du.
Laborek, hiru zutaberen gainean lan egiten du. Alde batetik, eta esan bezala, kontsumo talde potente bat osatzeko asmoa du; bestalde, aliantza estrategiko bat sustatu nahi du nekazarien eta kontsumitzaileen artean; eta azkenik, zerbitzu bat eskaini du, bertakoa, agroekologikoa eta soziala izango dena.
LABek elikadura burujabetzaren alde eginiko apustua berretsi nahi du. Horrela, ospatu berri dugun IX. Kongresuan erabaki bezala, lana-kapitala kontraesanetik bizitza-kapitala kontraesanera igaro gara. Zentzu horretan, elikadura burujabetza elementu zentrala da justizia sozialaren bidean eta bizitza duinak gaurdanik eraikitzeko. Labore bezalako proiektuak dira, hain zuzen ere, hauspotu nahi dugun aldaketa sozialaren mugarriak. Gainera, LABek ildo honetan, lan eremu bat irekia du dagoeneko: arrantzaren berreskurapenaren eta jangela proiektuen arteko konplizitateak bilatzen ari gara, elikadura burujabetza izanik iparra.
Hurrengo zita, Via Campesinak Derion uztailaren 16tik 24ra ospatuko duen nazioarteko konferentzian daukagu. Urte honetako leloak dioen bezala, Gure herriak elikatzen ditugu eta mugimendua eraikitzen dugu mundua aldatzeko.