Elecnor Infraestructuras enpresaren zuzendaritzak Gasteizko lantegiko sindikatuetako ordezkaritzari jakinarazi dio bost emakume-langile lekualdatu egin dituela Getafeko lantegira (Madril), antolaketari loturiko arrazoiak argudiatuta. Gasteizeko lantokian egiten duten lan bera egiteko bost langileak beste lantoki batera bidaltzeko aginduaren zergatia ez datza haren baliabideak egokiro birbanatzean, begi-bistakoa baita honen bidez talde hau bota nahi dituela, kostuak merkatzeko eta bulego lana Madrilen egin dadin, bertako langileekin.
Enpresa zuzendaritzak genero bazterkeria ageriko eta onartezina burutu du, eragindako guztiak emakume langileak direlako eta denak, bat izan ezik, legezko jagoletza betetzen ari direlako, lanaldia murriztuan lan eginez. Hau ez da jasan duten lehen bazterkeria egoera, larriena bai ordea. Hori dela eta, kaltetutako langileek eta langile ordezkariek, denak LABekoak, aipatutako bazterkeria salatzeko dinamikari ekingo diote aipatu bazterkeria Laneko Ikuskaritzan, Emakunden eta beste esparru batzutan salatzeko. Horrez gain, langile guztiak eta jendarte osoari dei egiten diogu mobilizazioetan parte hartzera.
Hau dela eta, LABek bere konpromisoa emakumeen aurkako bazterkeriari aurre egiteko eta guztion aldeko eskubideen alde jarduteko bere konpromisoa berresten du. Era berean, Araban eta Euskal Herri osoan enplegu duina izan dadin borrokatuko gara, oraingo honetan, emakumeen enplegu duinaren alde.