Txorierrin Bizkaibusen zerbitzua ematen duen enpresa emakidadunean gehiengoa osatzen duten CCOOk eta UGTk greba bertan behera utzi dute, Lan Sailean izandako bileran sindikatuei proposatu zaien akordioaren ostean. LABek ez du begi onez ikusten, borrokaren bidez aldarrikapenetan aurrera egiteko egiteko aukera baitago oraindik. Gainera, mesfidati agertu da, akordio horretan enpresak eman beharreko urratsak ez baitira konpromiso zehatz gisa ageri.
Negoziazioan aurrerapausoak egon dira, baina, hala ere, proposamena ez zaigu nahikoa iruditzen asanbladara eraman ahal izateko.
Izan ere, planteatutako artikulu askotan enpresak ez du inolako konpromisorik hartzen. Lan-batzorde bat baino ez da proposatzen, eskariak aztertu, baloratu eta, enpresak horretarako borondaterik balu, adosteko.
Aurreko hitzarmena indarrean egon bitartean enpresak hainbat bider urratu ditu bertan jasotakoak. Hori dela eta, ez dira fio lan-batzorde horietan akordioak erdietsi eta, gero, enpresak horiek betetzeaz.
Alde sozialari, aldiz, konpromiso askoz ere irmoagoa exijitzen diete: ekintza administratibo eta judizialei uko egitea eta hitzarmen kolektiboaren indarraldia amaitu arte greba-eskubidea ez baliatzea hitzarmen horren edukiak aldatu edo hobetzeari dagokionez. Hau da, trukean bake soziala exijitzen zaie langileei.
Hori gutxi balitz, aipatutako akordioak ez du jasotzen aurrerapenik aldi baterako ezintasunei dagokienez edota lanpostuak ez amortizatzeari dagokionez.
Hala, LABek langileen borrokaren balioa aitortu nahi izan du, eta proposamena urriegitzat jotzeaz gain, enpresari proposamen zehatzak eskatu dizkiote. Izan ere, Vectaliako beharginek behin eta berriz ikusi dute hitzarmenean jasotakoa enpresak ez duela betetzen. Hala gertatu izan da aurreko hitzarmenarekin, CCOOk eta UGTk sinatu zutenarekin.
Esaterako, enpresak amortizaziorik ez egiteko konpromisoa hartu bazuen ere, gaur-gaurkoz 20 egin dira jada, hitzarmen horren sinatzaileek onartu egin dituztenak. Bestalde, enpresak ez du betetzen eguneroko zerbitzuak publiko egiteko agindua. Enpresak ez ditu langileak aintzat hartzen; hala, adibidez, autobus lineak eta horietan jarduteko esleitutako langile taldeak nahastu egiten dituzte alde sozialaren oniritzirik gabe, eta gerora helarazten dute informazioa. Guzti horrez gain, beste hainbat egoerari egin behar diete aurre egunerokoan: langile gutxi, azpikontratazioak eta abar.