2024-09-20
HomeIndustriaMetalgintzaTubos Reunidos, aldi baterako espedientea langileen ordezkarien babesik gabe

Tubos Reunidos, aldi baterako espedientea langileen ordezkarien babesik gabe


Amaitu da Tubos Reunidosen enpresak aurkeztuko duen aldi baterako Enplegu Erregulazio Espedientearen kontsultetarako aldia. LABek, denbora tarte honetan Zuzendaritzak izan duen jarrera salatzen du. Hasieratik planteatu genuen gure baldintzak, enplegua eta lanpostuak enpresak bermatzea zirela. Etorkizunera begirako apustu bat ere eskatzen genuen, ekintza zehatz eta neurgarriak jasoko zituen bideragarritasun plan baten bidez. Enpresaren geroarekiko akziodunen konpromisoak ere eskatzen genituen. Baldintza hauetako bat bera ez du onartu enpresak.

Honek aldi baterako EEEa aurkeztu zenean adierazi genituen susmoetan berresten gaitu, Tubos Reunidoseko zuzendaritza eta akziodunen asmoa zela piskanaka Amurrioko lantegiaren ekoizpenerako gaitasuna murrizten joatea, eta neurri berean lanpostuak eta enplegua ere, bai enpresan bai eskualdean.

Susmo hori indartzen duen xehetasunetako bat da enpresak zuen neurrigabeko interesa Batzorde negoziatzaileak bere osotasunean eta LABek bereziki, ontzat eta benetakotzat ematea Zuzendaritzak mahaigaineratutako argudioak aldi baterako EEEa aurkezteko. Zuzendaritzako kideak eurak iritsi ziren langileen ordezkariei galderak egitera kontsulten aldian zehar, euren argudioak berresteko helburuz. Uko egin genion horri.

Aldi baterako EEEa egin egingo da langileen ordezkarien sinadurarik gabe eta gure ustez, honek pentsarazi egin behar lioke enpresari hartu duen bidearen inguruan.
 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.