Otsailaren 20an, TESA enpresak Eskoriatzako Enpresa Batzordeari jakinarazi zion Eskoriatzako lantokian langile baten aurkako zehapen prozesua hasteko asmoa zuela. Gaur epaiketa izan da Eibarko epaitegian, eta mobilizazioa egin dugu laneko jazarpen kasua dela salatzeko eta beharginari elkartasuna adierazteko asmoz.
Enpresak arrazoitu du, langileak, medikuaren baja izanik, bere konturako lanak egiten zituela, eritasun bat simulatuz. Horrenbestez, enpresak langileari diziplinazko kaleratzea ezartzeko erabakia hartu zuen.
Ez da egon kaleratzeko arrazoirik. Ez da izan eritasuna luzatzeko gaixotasunaren simulaziorik, ezta manipulaziorik ere. Beraz, kaleratze hori langile guztienganako beste errepresalia bat gehiago da.
LAB sindikatutik gire desadostasuna adierazi nahi dugu erabaki erabat neurrigabe eta bidegabe horren aurrean. Gure ustez, kaleratze hori bajan dauden langileak kriminalizatzeko egiten da, eta jarrera horrekin, kolektibo hori jazartzeko aurrekari bat irekitzen da.
Gaurkoan, Eibarko epaitegien aurrean gure elkartasuna adierazi nahi izan diogu kaleratutako langileari eta enpresak kaleratze honekin izan duen jarrera baztertzailea salatu dugu.