LABeko batzarrak baiezkoa eman dio aurreakordioari. Eskerrak eman nahi dizkiegu gurekin bidelagun izan ditugun mugimendu sozialei, eta, argi izan dezatela, aurrerantzean ere bide lagun izango garela, gure borroka beraiena izan den bezala beraiena ere gurea delako. Zorionak ere borroka egin duten Metalgintzako langile guztiei, borrokatzeak merezi duela argi utzi dutelako. LAB sindikatuaren oinarri osoa eskertu nahi dugu, gure Metalgintzako afiliazioari harrotasuna adierazi. Dena eman dute borroka honetan.

Luzea eta gogorra izan da. Urte eta erdi baino gehiago ibilin gara borrokan. LABek 2018ko ekainean mahaitik joatea erabaki zuenetik, langileekin batera borrokatzea erabaki genuen, hitzarmena lortzera gindoazela esan genuen, eta lortu dugu.

Gaur, delegatuekin batera, borrokaren garapena gogoratu dugu; FVEMeko okupazioa eta 2019ko urtarrilean aliantzen eta greben beharraz gainerakoak interpelatu genituenekoa, kasu. Gerora, lortu den aliantza historikoa da, sindikatuen artekoa eta mugimendu sozialekin erdietsitakoa. Mobilizazioen eta greben jarraipenak ere denon aurreikuspenak gainditu ditu. Hain zuzen ere, hori guztia izan da aurreakordioa mahai gainean egoteko gakoa.

LABeko delegatuek pozez gainezka jaso dute lortutakoa; aurten langileek 527 euro baino gehiago jasoko dute (hori da minimoa); eta tabletatik gora daudenek 395 eta 422 euro bitartean; gainera, lehen aldiz, subrogazioa eta ABLEen gaia jasoko da hitzarmenean; lan osasun arloan, IT osagarria kendu dute eta prebentzio delegatuak ahaldunduko dira; berdintasun arloan, industrian klausula historikoa lortu dugu; era berean, lan erreformaren aurkako klausulak eta ultraaktibitate mugagabea aplikatzekoa jaso ditugu.