2023-12-08
HomeIrakaskuntzaHezkuntzaSexu heziketari buruzko gida aurkeztu dugu Haur eta Lehen Hezkuntzako eskola komunitatearentzat

Sexu heziketari buruzko gida aurkeztu dugu Haur eta Lehen Hezkuntzako eskola komunitatearentzat

Sexualitate askatzaileak iruten dinamikaren barruan, eta sexu heziketa txiki txikitatik landu beharrekoa dela-eta, hezkuntzako ziklo guztietarako gida eta material zehatzak sortzea dugu helburu. Gida hau Haur eta Lehen Hezkuntzako etapak kontuan hartzen ditu, eta irakasle, hezitzaile, begirale, guraso, edo eta ikasleekin esku-hartzea duen edonori zuzenduta dago.

Orotara 4.000 ale banatuko ditugu eskoletara, baita Interneten ere eskuragarri izango du interesa duen edonork eskura dezan.

Badira urte batzuk LAB irakaskuntzan Euskal Eskola Publiko Komunitarioa eraiki bidean pedagogia feministari bultzada ematen ari garela. Hasieran, Nafarroatik ekin genion bideari, hainbat material didaktiko osatu ondoren, data jakinetan zabalduz. Ondoren, hilabete bakoitzeko 8an proposamen didaktiko ezberdinak bidaltzen hasi ginen, "8 oro da martxoa" dinamikari hasiera emanez. Egun, LABeko Irakaskuntzako hezitzaile guztiek hilabetero proposamen didaktiko hezkidetzaile bat jasotzen dute euren eskoletan nahieran landu ahal izateko.

Egindako lan eskergak bere fruituak eman zituen, eta urrats bat gehiago emateko helburuarekin sexu heziketari buruzko gida aurkeztu genuen iaz LAB irakaskuntzak Nafarroan. Nafarroak hasitako bidearen lekukoa hartu eta Araba, Bizkaia eta Gipuzkoaren txanda da oraingoan. Hori da gaur aurkeztera gatozena: Sexu heziketari buruzko gida Haur eta Lehen Hezkuntzako eskola komunitatearentzat. Eskola guztietara iristeko asmoarekin 4000 kopia banatzera goaz!

LAB sindikatuan denbora luze daramagu sexu heziketa eta sexualitate askatzaileak lantzeko asmoarekin, horregatik “Sexualitate askatzaileak iruten” dinamika abiatu dugu. Garrantzitsua iruditzen zaigu egungo txikiekin gaia lantzea, izan ere, lanketak edo beronen faltak dituzten bizipenetan zuzenean eragiten baitu orainean zein etorkizunean ere.

Sexu heziketa ahalik eta lasterren lantzen hastea garrantzitsua da (sexualitatea bizitzan etengabekoa delako, jaiotzen garenetik, hil arte); eta horregatik, derrigorrezko hezkuntzako ziklo guztietarako gida eta material zehatzak sortzea da dinamika honen bidez landu nahi dugun asmoa. Gaur aurkeztu dugun gida hau, zehazki, Haur eta Lehen Hezkuntzako etapei zuzendua dago, eta haurren garapeneko aro bakoitzeko ezaugarriak kontuan hartzen ditue.

Gida didaktikoa edozein hezitzaileri zuzendua dago, izan irakasle, hezitzaile, begirale, guraso, edo eta ikasleekin esku-hartzea duen edonor. Gidaren helburua ikasleen aniztasuna eta haurren garapenaren ezaugarriak kontuan izanik haurrekin gaia lantzeko zenbait gako ematea da. Gerora sortu daitezkeen zalantzak argitzeko tresnak eskuratuz.

Gida, atal ezberdinek osatzen dute bakoitzak galdera edo aspektu bati erantzuna emanez, besteak beste:
1. Zer dela-eta material hau?
2. Zergatik eta zertarako sexu heziketa?
3. Zertaz ari gara sexualitateaz ari garenean?

4. Nork eta nola landu behar du gai hau?
5. Sexu-garapenari buruzko gakoak.
6. Sexu heziketa “osasuntsu” baterako klabeak. 7. Baliabideak eta material didaktikoa.

Datozen asteetan LAB irakaskuntzako kideok aurkeztu berri dugun gida hau eskola komunitatea osatzen dugunon artean zabalduko dugu, ahalik eta eskola gehienetara heltzeko asmoarekin.
 

 

 

AZKEN ALBISTEAK | ÚLTIMAS NOTICIAS

Lizarran erditzeko zerbitzua itxi izana Osasun Departamentuaren aurreikuspenik ezari egozten diogu, haren utzikeria eskualdeko osasun zerbitzu publikoak desegiten ari baita

LAB sindikatuan hilabeteak daramatzagu Lizarrako Osasun Barrutiko osasun zerbitzu publikoen egoera larria salatzen, eta duela aste batzuk informazio kanpaina bat egin genuen datu ofizialen bidez frogatzen zuena Estellerriko herritarrak sufritzen ari direna egiazkoa dela, eta ez sentsazio hutsa. Orain, aurreko gerentearen kudeaketa tamalgarriak eta Osasun Departamentuaren ekimenik ezak eskualdeko ospitalea erditzeko zerbitzurik gabe utzi dute, zerbitzua berreskuratzeko datarik gabe, bere garaian etxeko ospitalizazioarekin gertatu zen bezalaxe.

Estatuan baino gutxiago ordaindu beharko dutenez, Fortuna Handien gaineko Zergaren inguruko akordioak patronalari eta kapital errentei mesede egiten die

Ditugun eskumenak presio fiskala areagotu eta zerga sistema sakonki eraldatzeko baliatu behar direla uste dugu LAB sindikatuan. Hala, EAJ-PSEren gobernuak Elkarrekin Podemosekin egindako akordioa ez da inondik inora ere nahikoa, eta kontrako norabidean doa.

Salatzen dugu atzo Erandion hildako langileak 66 urte zituela eta bakarrik ari zela soldadura lanak egiten

Lankide, senitarteko zein lagunei elkartasuna adierazteaz gain, lan-erreformek prekaritatea areagotu baino ez dutela egin nabarmendu du sindikatuak, lan-osasuna bermatu behar duten instituzioek gaiarekiko duten axolagabekeria kritikatzeaz gain.