LAB sindikatuak pasa den maiatzaren 7an, Mertxe Sancho, SECURITAS DIRECT ESPAÑA, SAU enpresako Gasteizko langileen ordezkariaren kaleratzea salatu du.“Hau izan da langilea hauteskundeetara aurkeztu zenetik, enpresak bere kontra mantendu duen jazarpenezko jarreraren azken atala”.
2011ko udan dagoeneko, LABek hauteskundeak deitu zituenean, enpresak delegatua aukeratua izan zedin saihesteko ahalegina egin zuen: idazkiak faltsutuz, hautez-mahaikideak presionatuz, langileak mehatxatuz eta epez kanpo bere interesen aldeko hautagai bat aurkeztuz. Hala ere, ez zuten helburua lortu.
Kaleratzea, Mertxe bere lankideen eskubideen defentsa hutsa egiteagatik besterik ez da gertatu: dagozkien kategoria eskatzea egiten dituzten funtzioen arabera; enpresa infrakotizazioetan erortzen dela salatzea; bere lan sindikala aurrera eramateko dagokion informazioa eskatzea,…
Egindako lana, pairatu duen jazarpen eta eraso ezberdinen artean burutu behar izan du: lan lerroa kendu zioten, bere emaitzak baldintzatzeko oztopatu egin dute, eta bere lan errendimenduari buruzko gutunak jaso ditu bera presionatzeko asmoz.
Kasu hau enpresa honen jarrera antisindikalaren adibide bat gehiago baino ez da. Izan ere, estatu mailan kaleratzeak hainbat izan dira kategoria aldaketa eskatze soilagatik. LAB sindikatuak gehiegizko jarrera hauek gaitzesten ditu eta langilea bere lanpostuan berriro hartu dezatela exijituko du, mobilizatzeko beharraren garrantzia azpimarratuz eta autoritario eta zuzenak ez diren jarrera eta erabaki enpresarialen aurrean irmotasunez kontra eginez.
