Arabako patronalaren zati bat bildu da gaur, hilak 10, langileok pobreziara garamatzaten errezetei eusteko asmoz. Hau salatzeko LABek elkarretaratzea egin du eta hemendik aurrera ere arlo politiko, ekonomiko eta sozialean aldaketa lortzera bideratutako beharrekoz ekimenak garatzen jarraituko dugu eta Patronalak bultzatzen dituen desberdintasunak salatuko ditugu.
Beste behin, Arabako patronalaren zati bat bildu da gaur hilak 10, euren betiko errezetei eusteko. Patronalarentzat langileok euren emaitza kontuetako zenbaki hutsak baino ez gara eta behar duten ibilbide-orria markatzen die politikariei. Izan ere, ordezkari instituzionalak ere etorriko dira txalo egitera eta irabazi enpresarialak handitzeko langileriaren prekarietatea besterik bilatzen ez duten errezetak babestera.
Enplegua sor dezaketen bakarrak bailiran aurkezten dute euren burua eta era berean, desberdintasun sozialak sustatzen dituzte muga jasanezinetaraino. Hain zuzen ere, duela egun batzuk txosten ekonomikoa aurkeztu zuen SEAk, titular handiek lagunduta. 9.000 lanpostu berri sortu omen dituzte, baina letra txikia irakurrita, 2.450 izatera pasatzen ziren eta hauetatik %29,1 soilik ziren mugagabeak eta asko eta asko lanaldi partzialekoak. Herritar guztiongatik sakrifikatzen omen dira, euren zergak murriztea exijitzen duten bitartean. Laguntza ekonomikoak eskatzen dituzte lortutako plusbalia ez baita nahikoa euren beharrizanetarako eta era berean, laguntza sozialak kontrolatzeari buruz edo langileon soldatak murriztearen inguruan hitz egiten dute.
LABek azken asteotan enpresetako prekarietatearen salaketa dinamika sendoa egin du. Bertan, besteak beste, kontratazio berrietako eta soldata desberdintasunak dakartzan prekarietatea, UGT eta CCOOekin lankidetzan enpresarioen interesak lehenesten dituzten hitzarmenekiko babesgabetasuna, lan istripuen aurreko babes falta salatu ditgu. Nabarmentzekoa da prekarizazio prozesuak gero eta gehiago eragiten diola langileen osasunari, gero eta arazo gehiago eta larriagoak ditugu prekarietatearen ondorioz. Michelinen dugu adibide garbienetako bat. Lanaren ondoriozko osasun kalteak dituztenei ez diete bajarik ematen sendatzeko, lanpostua aldatzen diete edo ordaindutako baimen bat eman lan-istripu eta laneko gaixotasun moduan ager ez dadin.
LABek argi du beharrezkoa dela Arabako patronalak bultzatzen duen eredua hau alboratzea, lan-harremanak enplegu prekarioaren sinonimo baitira. Ezinbestekoa da negoziazio kolektiborako esparru propioa izatera bideratutako akordioak bultzatzea, gaitasun legegile propioa behar dugu eta erabakitzeko gaitasun horretan oinarritutako enplegu politikak. Politikariek beste alde batera begiratzeari utzi behar diote eta beharrizan kolektiboen aldeko apustua egin.
Guzti honengatik, gaur, hilak 10, elkarretaratzea burutu dugu. Eta hemendik aurrera arlo politiko, ekonomiko eta sozialean aldaketa lortzera bideratutako beharrekoz ekimenak garatzen jarraituko dugu eta Patronalak bultzatzen dituen desberdintasunak salatuko ditugu.