2024-02-27
HomeJardunaldiak"Kapitalismoaren eta inperialismoaren krisia. Egoeraren azterketa, Europan eta munduan"

“Kapitalismoaren eta inperialismoaren krisia. Egoeraren azterketa, Europan eta munduan”

Ipar Hegoa Fundazioak eta LAB sindikatuak JAMES PETRAS eta LUCIANO VASAPOLLO izango ditugu gurekin Bilbon eta Iruñean, maiatzaren 17tik 20ra bitartean ospatuko den "Kapitalismoaren eta inperialismoaren krisia. Egoeraren azterketa, Europan eta munduan" hitzaldi zikloan. 

JAMES PETRAS
"Soziologo eta idazlea."

LUCIANO VASAPOLLO
"Irakaslea Erromako “Sapientza”  eta Kubako Habana eta Pinar del Ríoko Unibertsitateetan"
Helburu nagusia izango da kapitalismoaren eta inperialismoaren oraingo krisiaren kausak eta ondorioak aztertzea, mundu mailan; horrekin batera, ezker eraldatzaileak mundu mailan izan ditzakeen alternatibak ere jorratuko dira, Europako egoerari arreta berezia eskainiz. Izan ere, oraingo krisi sistemikoak erronka eta zeregin berriak planteatzen dizkigu sindikatuoi eta ezkerreko mugimenduoi; analisi eta praxi politikoan asmatzeko dugun gaitasunaren mende egongo da, neurri handi batean, oraingo sistema kapitalistari aurre egiteko alternatiba erreal eta erradikal bat ezkerretik –sozialismotik- eraikitzeko ahalmena.

Mundua mundu mailako krisi kapitalista baten ondorioak pairatzen ari da. Sistema kapitalista osoaren krisi integral bat da; krisi ekonomikoa, soziala, politikoa, energetikoa, ingurumenekoa, eta abar. Horrenbestez, inperialismoaren krisia ere bada, zeren gatazka ugari bultzatzen ari baita mundu osoan, bere hegemonia datozen hamarkadotan finkatzeko eta segurtatzeko xedez.

Paradoxikoa bada ere, sistema kapitalistaren kudeatzaileek eta beraren zerbitzuan diharduten elite politiko eta ekonomikoek oraingo krisia erabili nahi dute, eta erabiltzen saiatzen ari dira, eredu kapitalista bidegabe eta eutsiezina sakontzen saiatzeko. Alde horretatik, langile-klasea eta Europako herriok bertatik bertara pairatzen ari gara Troikaren (EBZ, Europako Batzordea eta NDF) eta gobernu eskuindar eta sozialdemokraten politiken ondorioak: murrizketa sozialak, sektore publikoaren deuseztapena, irakaskuntza eta hezkuntzaren pribatizazioa, erretiro-adinaren atzerapena, lan-eskubideen eta eskubide sindikalen murrizketa, kaleratze merkeagoak, eta, oro har, gizartearen sektore gero eta handiagoen pobretze-prozesua.

Testuinguru horretan, espainiar eta frantziar Estatuek ezartzen dizkiguten murrizketen aurrean, Euskal Herriak beharrezkoa du gure erabakitzeko eskubidea bermatzen duen aldaketa politiko bat; izan ere, aldaketa horrek beharrezkoa den aldaketa soziala ere ekarriko du berekin, pertsonak kapitalaren gainetik jartzeko, sektore publikoaren protagonismoa indartzeko eta oinarrizko eskubideak gauzatzeko bidea bermatzeko: elikadura, etxebizitza, hezkuntza eta osasuna, besteak beste. Helburu horiei begira kokatzen dira Euskal Herrian garatzen ari garen borroka ugariak, hala nola LABek euskal gehiengo sindikalarekin eta mugimendu sozialekin batera 2013ko maiatzaren 30erako deitutako greba orokorrean parte hartzeko deia. 

Horregatik guztiagatik, eta gonbidatutako hizlarien ekarpenak kalitate handikoak izango direla sinetsita, parte hartzera animatzen zaituztegu, Euskal Herrian izango duten presentziak eskaintzen digun aukeraz baliatuz. 

"Kapitalismoaren eta inperialismoaren krisia. Egoeraren azterketa, Europan eta munduan"

BILBO
EGUNA: 2013ko maiatzaren 17a.
TOKIA: UPV/EHU. Ekonomia eta Enpresa Zientzien Fakultatea (SARRIKO) ( Lehendakari Agirre etorbidea, 83)
HIZLARIAK:
10:00 LUCIANO VASAPOLLO eta JAMES PETRAS
“Kapitalismoaren eta inperialismoaren krisia”
Europa eta Munduko egoeraren azterketa

IRUÑEA

EGUNA: 2013ko maiatzaren 20a (astelehena)
TOKIA: Plaza de la Cruz Institutua (San Fermín, 51)
HIZLARIA:
19:00 JAMES PETRAS
“Kapitalismoaren eta inperialismoaren krisia”

James Petras (Estatu Batuak 1937) soziologo eta idazle bat da, inperialismoari, klase-borrokari eta zenbait gatazkari buruz egindako azterlanengatik ezaguna. Irakaslea izan da New York, Pensilvania eta Kanadako Unibertsitateetan. 29 hizkuntzatan argitaratutako 62 liburu baino gehiago idatzi ditu, eta milaka artikulu ere bai, aldizkari profesionaletan eta egunkarietan.

Euskal Herrian liburu batzuk ditu argitaratuta Hiru eta Txalaparta argitaletxeekin.

Modu aktiboan parte hartzen du zenbait mugimendutan, hala nola Brasilgo MST-Sin Tierra mugimenduan eta Argentinako “Los Desocupados” mugimenduan.

Luciano Vasapollo (Italia, 1955). Irakaslea Erromako “Sapientza” Unibertsitatean eta Kubako Habana eta Pinar del Ríoko Unibertsitateetan.

Errektorearen Ordezkaria ALBAko Herrrialdeekiko Nazioarteko Harremanetarako. CESTES Azterlan Zentroaren eta PROTEO aldizkariaren Zuzendaria. “Nuestra América-Italia” Elkartearen eta Aldizkariaren Zuzendaria.

ALBA eta Latinamerikako herrialdeetako pozesu politiko, ekonomiko eta sozialei buruzko elkartasun, azterketa eta ikerketa lan trinkoa gauzatu du. 50 liburu baino gehiago idatzi ditu, berak bakarrik edo beste autore batzuekin batera; horietako asko itzulita daude Europan, Estatu Batuetan eta Latinoamerikan. Gizateriaren Aldeko Intelektual eta Artisten Sareetako Sarearen Italiar Kapituluaren Koordinatzailea da.

 

AZKEN ALBISTEAK | ÚLTIMAS NOTICIAS

Nafarroako Kimiketako hitzarmena adosteko patronalak egin beharreko lanketa bizkor dezan exijitzeko mobilizatuko gara

Azken hilabete luzeetan LAB eta ELA aldarrikatzen ari garen Nafarroako Kimiketako hitzarmenaren lanketaren barnean eta intersindikalak egindako eskaera baten ondorioz, pasa den otsailaren 23 eta 26an bi sindikatuak CEN patronalarekin batzartu ziren, nor bere aldetik. Baina enpresaburuen erantzuna mantso doanez eta, gainera, ez doanez bi sindikatu hauek nahi duten ildotik, martxoaren 1ean elkarretaratzea eginen dute CEN-en Iruñeko egoitzaren parean.

Salicako enpresa-batzordeak erabat gaitzesten du enpresak inposatutako Aldi Baterako Enplegu Erregulazio Espedientea

Kontserba-enpresako enpresa-batzordeak agerraldia egin du Bermeon eta bertan azaldu du, joan den azaroan, beste Aldi Baterako Enplegu Erregulazio Espedientea (ABEEE) bat hasteko asmoa zuela adierazi ziola zuzendaritzak, bigarrena jarraian. Honela, 2023an bezala, Salikako langileak dira berriz ere enpresarako plan estrategikorik ez izatearen ondorioak ordaintzen dituztenak. Berriro ere erabiltzen da ABEEEa “tresna” bezala malgutasun handiagoa izateko bide moduan.

Salatu dugu Ausolanek kanpoko enpresa bat kontratatu duela baja medikoak kontrolatzeko

Ausolan enpresako kolektibitateetarako sukaldaritzako eta garbiketako langileek elkarretaratzea egin dute gaur Espartzan (Nafarroa), enpresaren egoitzaren aitzinean, salatzeko posta elektroniko bidez izan dutela kanpoko enpresa bat kontratatzeko alde bakarreko erabakiaren berri. Kanpoko enpresa horrek langileen baja medikoak kontrolatuko ditu. Erabaki hori ez da sindikatuetako ordezkariekin partekatu ez negoziatu. Langileek aldarrikatu dute diru hori prebentziorako erabiltzea, eta ez kontrolerako.