Hego Euskal Herrian erregistraturiko langabeziak behera egin du martxoan, baina 2016 urte amaieran baino altuagoa izaten jarraitzen du. Sortzen den enplegua oso prekarioa da; sinatzen diren kontratuen %90 baino gehiago aldi baterakoak dira eta %40 lanaldi partzialekoak.

Martxoan Hego Euskal Herrian erregistratutako langabeziak behera egin du. Datu ofizialen arabera 178.510 pertsona daude langabezian, 2016ko abenduan baino 2.292 gehiago. Hauetatik %44,17 gizonezkoak dira eta %55,83, aldiz, emakumeak.

Hala ere bilakaera desberdina izan da Nafarroan eta EAEn; Nafarroan langabezia 308 pertsonatan handitu den bitartean EAEko hazkundea 1.984koa izan da.

Urte arteko bilakaera aztertzen badugu, hau da, 2016ko martxoko datuekin alderatuz, 19.545 langabe gutxiago daude erregistraturik Hego Euskal Herrian (15.779 gutxiago EAEn eta 3.766 gutxiago Nafarroan).

Hala ere, aurreko hilabeteetan salatzen genuen moduan, aipatu beharra dago sortzen diren enpleguak oso prekarioak eta epe motzekoak direla; sinatzen diren kontratuen %90 baino gehiago aldi baterakoak dira eta %40 lanaldi partzialekoak.

Gainera, epe luzeko langabeen kopurua ere izugarria da eta horren ondorioz langabeziagatiko babes sistemak eskaintzen duen estaldura tasa oso ahula da. Gaur egun 3 langabetik 1ek baino gutxiagok jasotzen du langabezia prestazioa.

Beraz, datu hauek garbi erakusten dute pobrezia eta prekarietatea zabaltzen ari direla jendartean, landun eta langabeen artean, eta ezinbestekoa dela neurri eraginkorrak hartzea kalitatezko enplegua sortzeko.