AISA patronalak berriro erakutsi du mahai negoziatzailean ez duela lan-baldintzak hobetzeko borondaterik. Jarrera horren aurrean, ELA, LAB, CCOO eta ESK sindikatuek datozen egunetan izango dugun egoeraren balorazioa egingo dugu, negoziazioa desblokeatzeko helburuarekin, blokeo hori saihesteko.
Gaur, uztailaren 9an, burutu dugun mahai negoziatzailean, AISA patronalaren blokeo-jarrera errepikatu da. Bere ustez irregularra den aholkulari baten izendapenean oinarritzen da ez negoziatzeko. Gaur negoziazioari ekiteko proposamen bat ekarri dute, baina adierazi dute ez dutela horri buruz eztabaidatuko izendapena eten arte. Argi eta garbi, AISAren erabaki politiko baten aurrean gaude, nahiz eta euren esanetan juridikoa izan.
ELA, LAB, CCOO eta ESK sindikatuontzat izendapena zuzena da eta sindikatuon askatasun sindikalaren barruan dago. Hori esanda, horri buruzko balorazioa egingo dugu, eta horren gaineko neurriak hartuko ditugu. Argi dugulako ezin dugula horrela jarraitu datorren ikasturtean.
Patronalaren jarrera ez da berria. Hasieratik dabil negoziazioa blokeatu eta atzeratu nahian. Sindikatuok uste dugu mahaian aholkulari baten izendapena erabiltzen dela negoziazioa geldiarazteko aitzakia gisa. Eta bitartean, ez dugu aurrera egiten sektoreko lan-baldintzak hobetzeko negoziazioan. Urte erdi baino gehiago igaro da aurrerapenik eman gabe, eta sindikatuok duela 2 hilabete baino gehiagotik mahaigaineratutako plataformak ez du erantzunik izan.
Azkenik, sektoreari jakinarazi nahi diogu datorren astelehenean, hilak 14, Arabako Batzar Nagusietan parte hartuko dugula, bertan sektoreko hitzarmenaren negoziazioaren egungo egoeraren berri emateko.