Egun berean, urtarrilaren 26an, Huerta de Peraltako gatazkaren harira, LABek zita garrantzitsua du Iruñean prekarietatearen eta esplotazioaren aurka. Hala ere, argi izan behar dugu Iruñeko eta Bilboko deialdiek helburu bakarra dutela: langileon beharren arabera eraikiko den Euskal Herriaren alde borrokan sakontzea.
Bilboko Metropoliaren Hegoaldeko Saihesbidearen (Supersur bezala ezagutuagoa) 2. fasearen eraikuntzak logika sozial, ekonomiko eta ekologikorik ez duen proiektua da. Beraz, ikuspegi guztietatik ikusita, gelditu beharreko proiektua da. Aipatu beharrekoa da Supersurreko lehenengo faseak izandako bilakaera; ez ditu erabilera aurreikuspenak inondik inora bete eta gainera, estatuko errepiderik garestienetakoa izan da. Horrek argi uzten du hasieratik ez duela zentzurik izan eta 2. fasearen eraikuntza zulo horretan sakontzea izango litzatekeela. Bestalde, ezin dugu aipatu gabe utzi Bolintxuren kontra egingo litzatekeen sarraskia. Bolintxuko gunea babestu beharreko inguru gisa definituta dago, bertan dagoen flora eta faunaren ezaugarriengatik. Supersurraren 2. fasea eraikiz gero, bertan izango diren inpaktuak nabarmenak izango dira.
Beraz, Supersurreko proiektua bertan behera uztea eskatzea dugu; Bizkaiko Foru Aldundiak mugikortasunaren inguruan duen politikak ez du planifikazio erreal eta sostengarririk. Azpiegitura politika adjudikazio eta kontratazio esparru bezala ulertzen dute eta ez herritarron mesedetara egongo den eredu bat eraikitzeko tresna bezala.
Venezuela Aurrera plataformark deituta, esku-hartze inperialista salatzeko, mobiliazioak egingo dituzte ostiralean, Bilbon (Arriaga, 19:00) eta Gasteizen (Andra Mari Zuria, 19:30).
Hauxe da Venezuela Aurrera plataformaren adierazpena:
Venezuelako Iraultza Bolibartarrarekiko Venezuela Aurrera ekimenetik, Hego Amerikako herrialde honetan ematen ari diren gertakizunen aurrean, herrialdean esku-hartze bat emateko baliatuko duten estrategia inperialista bat garatzen ari dela salatu nahi dugu. Elkartasun internazionalista eta Batzar Nazional Konstituziogilearen zilegitasun demokratikoaren defentsa aktibatzea behar-beharrezkoa dela uste dugu, eta beraz legearen arabera lehendakari izendatua izan den Nicolas Maduroren zilegitasun demokratikoa.
Oposizio kolpista, Venezuelan nazioarteko esku-hartze hau jusifikatuko lukeen eszenatokia prestatzeko eskura dituen errekurtso guztiak aktibatzen ari da, demokratikoki hautatua izan den Nicolás Maduro lehendakaria kargugabetzeko, eta bere interesen aldeko lehendakaria edo gaizki deituriko trantsizio prozesu bat errekonozitzeko, azken finean oligarkiaren interesei erantzuten dien pertsona bat ezartzeko, ez dena Venezuelako herriaren borondate demokratikoarekin hautatua izan.
Horregatik guztiagatik Venezuela Aurreratik honakoa esan nahi dugu:
1) Nicolás Maduroren, prozesu konstituziogilearen eta ondoren emandako hauteskundeen zilegitasun demokratikoa ontzat ematen dugu. Garantia judizial eta politiko guztiekin egindako prozesuak izan ziren, Venezuelako konstituzioan onartuta dagoena hain zuzen ere. Hauteskunde garantia guztiekin egindako hauteskunde prozesu honetan Nicolás Madurok 6 milioi bozka baino gehiago lortu zituen.
2) Venezuelako herriaren borondate demokratikoaren ondorio diren neurrian, Nicolas Maduro kargugabetu eta Batzar nazional konstituziogilea ez onartzea helburu duen estrategia inperialista arbuiatu eta gaitzesten dugu. Gerra ekonomiko, diplomatiko eta biolentoa uztartzen dituen estrategia inperialista honen atzean oligarkiak iraultza bolibartarra suntsitzeko helburu garbia dago, Iraultza bolibartarrak burgesiaren interesen gainetik Venezuelako herriaren bizitza duin baterako duen eskubidea agendaren erdian jarri duelako.
3) Ozen eta argi esaten dugu Venezuelak dituen arazoak Venezuelako herriak demokratikoki onartu dituen bide demokratiko eta legalen bidez konpondu behar dituela. Venezuelaren ezegonkortasun ekonomiko, politiko eta soziala bilatzen duen edozein nazioarteko esku-hartze onartezina da. Estatu Batuei eta Europar Batasunari, nazioarteko inperialismoaren adierazle diren neurrian Venezuelako herrian bakean uztea eta Venezuelako herriak harturiko erabakiak errespeta ditzala exijitzen diegu.
Azaldutako guztiagatik, Euskal Herritarrak datorren urtarrilaren 25ean Bilboko Arriagan arratsaldeko 7etan eta Gasteizko Andra Mari Zuriaren plazan arratsaldeko 7 t’erdietan egingo diren elkarretaratzeetan parte hartzera deitzen dugu.
Huerta de Peraltako greba mugagabeak 28. eguna bete duen honetan, grebalarien batzarrak gaur oniritzia eman dio LAB sindikatuak eta zuzendaritzak lotu duten akordioari, gatazkari bukaera eman eta garai berri bat irekitzen duena. Akordioaren ondorioz greba mugagabea nahiz enpresarekiko bestelako presio bideak bertan behera gelditzen dira; hala ere, urtarrilaren 26an Iruñean eginen den mobilizazioari eutsi egiten dio LABek, prekarietatearen kontrako borrokak aurrera jarraitzen duelako, hala landa eremuan nola hirigunean.
Akordioak langileen aldarrikapen nagusiak jasotzen ditu: zigorrak bertan behera utzi eta kaleratuak berriz hartu; hitzarmena ez betetzearen ondorioz sortutako zorra ordaindu; eta Enpresa Itun baterako negoziazioak ireki.
• Kaleratzeei dagokionez, enpresara bueltatu nahi zuten langile horiek berriz hartzea aldarrikatzen zuen LABek, bereziki jazarpen sindikalaren ondorioz kaleratutako lau langilerengan arreta jarriz. Bada, langile horiekin adostutako eta zuzendaritzak onartutako konponbidea honako hau da: bi langile berriz hartuko dituzte, hirugarrenak kalte ordain bat jasoko du eta laugarren kasua epaitegiak zer erabakiko zain geldituko da.
• Lan hitzarmena ez betetzeagatik enpresak sortutako 440.000 euroko zorrari dagokionez, zuzendaritzak onartu du zor duenaren %70 ordaintzea. Oroituko denez, jada urtarrilaren 2an LABek portzentaje hori ordaindu eta %30eko kita bat adostea proposatu zuen, akordio orokor bat errazteko asmoz.
• Azkenik, hirugarren aldarrikapenari dagokionez, Enpresa Batzordearen eta Zuzendaritzaren artean Huerta de Peraltaren eta bertako langileen errealitate eta beharren araberako Enpresa Itun baterako negoziazioak irekitzea adostu dute bi aldeek.
Langileen determinazioak egin du posible akordioa, baina baita -nagusiki emakumeez osatutako- grebarekiko babes-sareak nahiz langile jendearen, kolektibo nahiz pertsona ugariren elkartasunak ere, grebalarien aldarrikapenak babestu, horien alde mobilizatu eta Elkartasun Kutxan ekarpena egin baitute. Horiei guztiei, eskerrik asko bihotzez!
LAB sindikatuak akordioaren balorazio oso positiboa egiten du. Lehenik eta behin, greba eragin zuten aldarrikapen nagusiak jaso eta Huerta de Peraltan egondako aldaketa egonkortu egiten duelako: duela bi urte, enpresa honetan ez zegoen Enpresa Batzorde eraturik, 204 langiletik 152k aldi baterako kontratua zuten, 13 orduko lanaldiak ematen ziren eta ez zen ordaintzen ez oporrik, ez antzinatasunik ezta gaueko lanik ere. Orain, aldiz, Enpresa Batzorde indartsu bat dauka, langileak ahaldundu egin dira, herrialdeko hitzarmena bete egiten da eta Enpresa Itun bat negoziatzen da.
Bigarrenik, enpresaz gaindiko garrantzia du akordio honek. Izan ere, Huerta de Peraltako gatazkak Nafarroako landa eremuan dagoen prekarietatea utzi du agerian. Hori gainditzeko, Nafarroako nekazarien, jendartearen eta instituzioen arteko elkarlana beharrezkoa da. Egin dezagun denon artean Nafarroako landa eremua garatzearen aldeko apustua, bihur dezagun eredugarri, hala produktuaren kalitatearen aldetik nola lan eskubideen errespetuari dagokionez ere.
Hirugarrenik, Huerta de Peraltak argi erakutsi du antolakuntza eta borroka sindikalaren garrantzia landa eremuan nahiz hirigunean zabaltzen ari den prekarietateari aurre egiteko. Babesik gabe egoteagatik esplotatuak diren langile migranteen ekintza sindikal kolektiboak, langileriak azaldutako elkartasun itzelarekin uztartuta, prekarietatearen aurkako urrats garrantzitsua ematea lortu du. Prekarietatea pairatzen duten langileak antolatzen jarraitzea da orain dagokiguna, langileria osoak babestuko dituen prekarietatearen kontrako borrokak antolatuz.
Ildo horretan, LAB sindikatuak larunbat honetarako Iruñean deitu duen mobilizazioari eutsi egiten dio; 17:00etan Gaztelu Plazatik abiatuko da. Mobilizazio horren bidez, kasik hilabete bateko greba egin duten langileei babesa eman eta jasotako elkartasuna eskertzearekin batera, antolakuntza eta borroka sindikalaren balioa aldarrikatuko dugu. Huerta de Peraltan bezala Euskal Herrian barna irekita dauden hamaika gatazkatan, borroka da bidea!
Nafarroako ordezkari Imanol Karrerak balorazio bat egin du akordioari buruz, eta prekarietatearen aurka borroka dela aukera bakarra nabarmendu du.
Prekarietatearen aurrean, landa eremuan nahiz hirigunean, ekin borroka sindikalari!
Gipuzkoako suhiltzaileek elkarretaratze bat egin dute Donostian, Foru Aldundiaren egoitzaren aurrean. Mobilizazio honekin, Iñaki Igerategi lankidea berronartzea eskatu diote Aldundiari, eta gutun bat helarazi diote Gipuzkoako ahaldun nagusi Markel Olanori eskaera horrekin.
Goizeko 9:00etan, Gipuzkoako Aldundiko 50 bat suhiltzaile elkartu dira Aldundiaren aurrean, Iñaki Igerategiren kaleratzea salatzeko eta bere suhiltzaile lanpostura itzultzeko exijitzeko. "Zigor bikoitzik ez. Iñaki lanera! Aldundira!" zioen pankarta baten aurrean bildu dira.
Unai Badiola kolektiboaren izenean mintzatu da, gogoraziz orain arte egin diren mobilizazioak; uztailean prentsaurrekoa kanporaketa salatuz eta irailean estropadetan elkarretaratze bat, eskuorri banaketa eta txalupa bat pankarta batekin. Hau guztia, EAJren jarrera salatzeko, Iñaki bere zigorra beteta bigarren zigor bat ezarri diotelako, lanetik kanporatuz. Hala, Iñaki Igerategi lanpostura bueltatu arte suhiltzaileak mobilizatuko direla berretsi du Unai Badiolak. Azaldu du hitzordua eskatua dutela Markel Olanori. Eskura eman nahi diote 150 bat suhiltzailek sinatu duten gutun bat, sinadurekin batera, baina bilerarik ez diete eman.
Zentzu honetan, gaur saiatu dira Markel Olanorekin biltzen, baina ez ditu hartu eta salatu dute oraindik ez diela eman hilaren 11n eskatutako hitzordua.
Hain justu, hauxe da Gipuzkoako ahaldun nagusi Markel Olanori zuzendutako gutuna:
Jaun agurgarria,
Jakina duzunez, Iñaki IGERATEGI LIZARRIBAR Gipuzkoako Aldundiko suhiltzailea zen eta Tolosako parkean jarduten zuen 2012. urteko otsailean Espainiako poliziak atxilotu zuenean.
Espainiako Auzitegi Nazionalak, epaitu eta gero, 6 urteko espetxe eta inhabilitazio zigorrak ezarri zizkion. Bere zigorrak beteta, 2018. urteko otsailean espetxetik atera zen eta bere suhiltzaile lanpostura itzultzea eskatu zion Aldundiari.
Aldundiak, aurrekari legalei muzin eginez, ukatu zion bere lanpostura itzultzeko eskubidea eta Funtzionario Karreratik baztertu zuen, beteta zuen zigorrari beste bat erantsiz.
Erabaki hori oso larria iruditzen zaigu, Iñakik eskubide osoa duelako bere lanpostura bueltatzeko. Eta are larriagoa, Gipuzkoako Aldundiaren Suhiltzaileen Zerbitzuan gabezia pertsonal handiak daudenean, azken asteotan suhiltzaile-etxe bat itxita izatera ere behartu dutenak. Eta bitartean gure lankidea, Iñaki, bere profesionaltasuna urteetan erakutsi zuena eta herritarren zerbitzurako prestutasun guztia agertu duena, kalean utzi duzue. Suhiltzaileak soberan izango bazenituzte bezala.
Gutun hau sinatzen dugun suhiltzaileek argi utzi nahi dizugu gure lankide Iñakik eskubide, prestutasun eta gaitasun osoa dituela bere lanpostuan berriro ere aritzeko eta horretan berriro ere onartzeko exijitu nahi dizugu. Argi utzi nahi dizugu ez garela geldi egongo Iñaki parkean gurekin, herritarren zerbitzura, berriro ikusi arte.
Gure eskakizunak ulertzen eta aintzat hartuko dituzulakoan,
Larunbatean, Huerta de Peraltako langileek hiilabete bat beteko dute greba mugagabean. Hori dela eta, manifestazio batera deitu dugu Iruñean, 17:00etan, Gaztelu plazatik abiatuta. Mobilizazio horren atarian, agerraldi bat egin dugu, Azkoiengo enpresaren lan gatazka zertan den azaltzeko.
Huerta de Peraltako langile Abdellatif Goualek grebalarien asmoak laburtu ditu esaldi bakar batean: “Greba oso gogorra izaten ari da, eta oso luzea, baina ez dugu etsiko”.
LABeko Nafarroako ordezkari Imanol Karrerak hitz horiek berretsi ditu, eta deitoratu du enpresaren blokeo jarrera. Azaldu du gutxieneko bitartekaritza bat dutela irekita zuzendaritzarekin, baina hori bakarrik, mahaiaren beste aldean ez baitago borondaterik gatazkarekin amaitzeko. Enpresak LABek urtarrilean egindako proposamena baztertu du erabat, eta berean jarraitzen du; gainera, langileak kontratatu ditu grebaren eragina arintzeko, legez kanpo, eta kanpotik produktuak ekartzen ari da lanari aurre egiteko. Honi gehitu behar zaio Nafarroako Foruzainen jarrera oldarkorra.
Karrerak nabarmendu du grebalariak euren eskubideen alde ari direla, sufritzen duten egoera bidegabearekin amaitzeko. Hala, euren eskakizunak bidezkoak direla berretsi du: kaleratutako langileen berronartzea, azken hilabeteetan ezarritako zigorrak bertan behera geratzea eta grebalarien aurkako neurririk ez hartzea, zor zaien dirua (440.000) langileei itzultzearekin batera.
Era berean, LABeko ordezkariak jakinarazi du negoziazio prozesu bati ekiteko konpromisoa eskatzen dutela langileek. Hain zuzen ere, negoziazio prozesua itun bat lortzeko izango litzateke, egunerokotasunean oso gatazkatsuak diren hainbat gai lantzeko; hala nola, egutegia, oporrak, lan osasuna, kontratazioak edo soldatak. Horrela, lan harreman normalizatuak lortuko lirateke.
Larunbateko mobilizazioari dagokionez, agerraldian izan direnek jakinarazi dute klase elkartasuna aldarrikatuko dutela Iruñeko kaleetan, prekarietatearen aurkako borroka guztiak batuko baititu manifestazioak. Izan ere, Huerta de Peraltako gatazka helduleku hartuta, borrokan diren langile eta kolektibo guztiak daude deituta mobilizazioarekin bat egiteko.
Agerraldia egin dugu Euskal Herriko Eskubide Sozialen Karta osatzen dugu eragileek, eta Gasteizko Legebiltzarrari eskatu diogu 51.000 pertsonek sinatutako ekimenaren eztabaida demokratikoa berma dezala.
Hauxe da, gaurko agerraldia dela eta, Euskal Herriko Eskubide Sozialen Kartak osatutako adierazpena:
KOHESIO SOZIALAREN BIDEAN HERRI EKIMEN LEGEGILEARI BAI
Orain hilabete batzuk, Euskal Herriko Eskubide Sozialen Karta ordezkatzen dugun eragile sozio-sindikalek Herri Ekimen Legegilea martxan jarri genuen. Ekimen horren helburua da egun indarrean dagoen babes sozialaren estaldura zabaltzea, handitzea. Konkretuki bi lege aldatu nahi ditugu: Diru Sarrerak Bermatzeko Errenta (hemendik aurrera DSBE) 18/2008 eta Etxebizitzaren Legea 3/2005.
Datuen arabera gero eta jende gehiagok babesa behar du. Alegia 2008. urtean DSBE jasotzen zutenek 83,023 ziren, populazio osoaren %3,9a. 2016. urtean berriz 134,563 pertsonek jaso zuten prestazioa, populazio osoaren % 6,3. Ikusten den bezala, urte hauetan zehar %62a igo da prestazio hau jasotzen dutenen kopurua.
Tamalez, Eusko Jaurlaritzaren borondate politikoa gutxieneko estaldura eskaintzea da eta horretarako sistema deseraikitzen ari dira azkenengo urte hauetan. Hau da, 2012. urtetik gaur egun arte, %13,5eko murrizketa jasan izan du eskubide horrek. Gainera, Eusko Jaurlaritzaren proposamenaren arabera DSBEn kopuruak 2019rako %30 inguruko murrizketa izanen luke. Norabide horren kontra argi eta garbi azaltzen gara.
HELan agertzen diren horietako aldaketa batzuk aipatzearren: egungo legediak eskubidea eskuratzerako hogeita hiru urteko baldintza ezartzen du; gure proposamenak hemezortzi urte ezartzen ditu; egungo legediak, eskubidea eskuratu ahal izateko, hiru urte erroldatua egotea ezartzen du; gure proposamenak urte betera mugatzen du. Etxebizitzaren Legearen inguruan, etxebizitza eskuratzeko eskubidea kopuru ekonomiko batekin ordezkatua ez izatea eskatzen dugu. Alegia, bai ala bai, etxebizitza eskubidea bermatzea eskatzen dugu.
Proposaturiko aldaketa hauek egikarituko balira gauzak asko aldatuko lirateke eta orduan bai Eusko Jaurlaritzari hainbeste gustatzen zaion baina aplikatzen ez duen kohesio sozialaz hitz egin genezakeen.
Konkrezio legal hauetaz gain Gobernuak pausuak eman ditzan eskatzen dugu Lan Harreman eta Babes Sozialaren Euskal Esparruaren alde: beharrezkoa baititugu ahalmen horiek eskuratzea gure jendartearen eta produkzio ehunduraren araberako araudiak eraikitzeko.
Gure Ekimen Legegileak 51.000 sinadura lortu ditu; kopuru itzela gure aburuz. 51.000 bai eramanen ditugu Lege Biltzarrera bestelako babes soziala eraikitzeko. 51.000 sinadura bizi baldintzen prekarizazioaren, bazterketa sozialaren eta pobreziaren kontra. 51.000 bai bizitza duinari.
Lege Biltzarrak HEL-ren tramitazioari argi berdea eman bazioen ere, Eusko Jaurlaritzak jada bere kontrako jarrera agertu du. Gainera ezin ahaztu, PNV eta PSEk gure HEL neutralizatzeko asmoz aurkeztutako Lege Proposamena, non DSBEren erreformarako tramitazioa azkartzea duen helburu, inolako adostasun sozial lortu barik eta eduki oso murriztatzaitatzaileekin.
Ondorioz, EHESKk Lege Biltzarrari eskatzen dio 51,000 pertsonek sinaturiko ekimenak eztabaida demokratikoa izan dezan bermatzea eta proposaturiko aldaketei argi berdea ematea, bertan proposaturikoak asko hobetuko bailuke, jende andanaren bizitza.
Sektoreko hamahirugarren greba eguna da gaurkoa, eta gaurkoan ere babes zabala izaten ari da langileen aldetik (aurrekoen antzekoa, %60-65 bitarte). Gizarte Ekimeneko ikastetxeetan 9.000 langile inguru daude; EAEko itundutako ikastetxeen %70a inguru dira, eta 120.000 bat ikasleri ematen diote zerbitzua.
Sindikatuok eta langileok familien kezka eta ardura ulertzen dugu, eta geu ere erabat arduratuta gaude egoera honekin. Arduragabekeria hutsa iruditzen zaigu sektoreko hamairugarren greba egunean patronalen aldetik inolako mugimendu eta proposamen gehigarririk ez egotea. Are arduragabeagoa oraindik Uriarte Sailburuak aste bukaera honetako manifestazio jendetsuan familiek luzatutako eskaerari eman dion erantzuna. Pasa den astean Eusko Jaurlaritzak familien aurrean bere burua zuritzeko asmoz greba honetarako zerbitzu minimoak handitu zituen greba eskubidea larriki urratuz, eta ondoren inolako zehaztasunik gabeko adierazpenak egitera mugatu zen. Gaur berriz, inolako oinarririk gabe, Cristina Uriarte hezkuntza sailburuak, bere gain edozein ardura hartzea ekiditeko eta sindikatuok salatzen ari garen egoeran duen erantzunkizuna desbideratzeko saikeran, grebaren atzean ezkutuko beste helbururen bat egon daitekeela bota du.
Uriartek ulertarazi nahi izan duenaren kontra, hamar urtez Lan Hitzarmena berritu gabe egonik, sektore honetako langileen lan baldintzen berreskurapena eta hobekuntza dugu greben helburu bakarra, konbentzituta baikaude hobekuntza hauek gure ikastetxeetan eskaintzen den hezkuntza kalitatean eragin zuzena dutela eta beharrezkoak direla. Beraz, grebaren helburuak argiak, bidezkoak eta aski ezagunak dira. Langileak eta berauek ordezkatzen ditugun sindikatuok oso arduratuta gaude ikastetxeetan gero eta baldintza kaskarragoetan lan egitera behartzen gaituztelako, eta honek duen eraginagatik, ez bakarrik gure lan baldintzetan, baizik eta baita ikasleek jasotzen duten hezkuntza kalitatean ere.
Hori dela eta, ELA, STEILAS, CCOO, LAB eta UGT sindikatuok negoziaziorako gure borondatea berretsi nahi dugu berriro ere eta egoera honi buelta emango dion taxuzko proposamen baten zain jarraitzen dugula adierazi.
Sindikatuok bai patronalei, bai Eusko Jaurlaritzari eskatzen diegu bakoitzak dagokion ardura eta erantzunkizuna bere gain hartu eta gatazka honi irtenbidea emateko neurriak har ditzatela, langileen aldarrikapenei taxuzko erantzunak emanez eta akordioetara iristea posible egingo duten planteamenduak eginez.
Aldi berean, langile guztiak animatzen ditugu bihar Gasteizen goizeko 11.30etan Bilbo enparantzatik irtengo den manifestazioan parte hartzera.
Datorren astean bilera garrantzitsu batera deitu gaituzte. Bilera horretara administrazioak proposamen berri bat ekarriko omen du eta irakasle hauek bizi duten egoera espezifikoari (OPEra ezin dira aurkeztu) aterabidea aztertzen hasiko gara. Lab sindikatutik gure indar guztiak jarriko ditugu irakasle hauek beraien egoera normalizatu dezaten. Eskubide berdintasuna eskatzen dugu.
Administrazioari arduraz jokatzeko eskatzen diogu. Gatazka laboral berri baten aurrean aurkitu gaitezke. Urteetan sistema barruan lanean dauden langileak beraien lanpostua galtzeko arriskuan aurkitzen dira. Ez dugu onartuko!
Hainbat eragilek eta sindikatuk, LABek barne, bat egin dugu Etxeko Langileen Elkarteak deitutako elkarretaratzearekin.
Hauxe da gaurko mobilizazioaren harira osatutako adierazpena:
Osakidetza salatu nahi dugu eta bereziki Jon Darpon bere arduraduna, honako arrazoiak direla eta:
Talde parlamentarioek, EH Bilduren eskariz, mozio bat adostu zuten 208ko ekainean, Osalan eta Osakidetza elkarrekin koordinatu zitezen etxeko lanetako istripuak detektatzeko asmoz.
Darpon sailburuak, EH Bilduren galdera bati, 2018ko abenduaren 28an erantzun zion Osakidetzak ez duela inolako hausnarketa edo jarduerarik aurrera eraman lan-istripuak detektatzeari buruz, istripuak ez baitira bere ardura. Erantzuna harrigarria iruditzen zaigu. Osakidetzako langile medikuek osatzen dituzten baja parteetan ezinbestean zehaztu behar dute baja hori arrunta edo lanekoa den.
Honetaz ari gara hitz egiten: – Modu nabarmenenean lan-istripuak diren lesioekin Osakidetzako kontsultara doazen langileak eta kontingentzia arruntagatiko parte batekin ateratzen direnak.
Lesio fisiko eta psikikoak. Aholkularitzan aurkitu ditugun kasuak barruko langile batek aurpegia eta garezurra erretzea presiozko eltze batengatik, berak bakarrik gizon handi bat mugitzen zuen langile baten sorbalda eta besoko lesioak edo larrialdietara langile bat joatea egun eta gau burua galduta zuen langile bat hilabeteez zaintzeagatik, atsedenik hartu gabe eta antsietatea eraso bat jasan zuena.
Gainera, gogoratu behar da Osalaneko ez duela erabilgarria eta serioa izango den etxeko lanen lan-osasunaren inguruko gida bat egin, berau egiteko epea pasa den abenduan amaitu arren.
Gogoratu nahi dugu etxeko langileak, bereziki zaintza lanetan ari direnak, berandu eta gaizki jotzen dute medikuaren kontsultara (gaixoatsun arrunt zein lanekoekin), ezin baitute lana utzi euren osasuna zaintzeko.
Badakigu zaintza lanak egiten dituzten langileen oinarrizko arazoa da merke egiten dituztela oinarrizkoak diren atazak, beste modu batera gastu soziala modu nabarmenean igoko zutenak. Beste alde batera begiratzea da EAJren gobernuaren aukera.
