2026-04-28
Blog Page 678

Kurdistanekiko Elkartasun Komiteak manifestaziora deitu du iganderako, Bilbon

admin
-
0
Kurdistanekiko Elkartasun Komiteak manifestaziora deitu du iganderako, Bilbon

Euskal Herriko Kurdistanekiko Elkartasun Komiteak, beste hainbat eragile politiko, sindikal eta sozialekin batera, LAB barne, igandean, 13:00etan, Bilboko udaletxetik abiatuko den manifestaziora deitu du, Kurdistango gose grebalariekiko elkartasuna adierazteko eta Abdullah Öcalanek pairatzen duen isolamendu egoera salatzeko.

Pasa den urteko azaroan, Leyla Güven preso politikoak eta HDP ezkerreko koalizioko kideak gose greba hasi zuen PKK-ko sortzaile den Abdullah Öcalanek pairatzen duen isolamendua salatzeko, zeinak 20 urte daraman Imraliko irla-kartzelean preso.

100 egun baino gehiagoko gose grebaren ondoren, Leyla Gúven ez da bere osasuna arriskuan jarri duen bakarra, eta ehundaka preso politikok eta Estrasburgotik Britainia Handiraino hainbat aktibistek ere neurri hau babestu egin dute.

Muturreko protesta honen egoerarik latzenak Turkiako kartzela ezberdinetan emaniko 4 inmolazioak izan dira; Ayten Beçet, Zehra Saglem, Zulguf Gezen eta Medya Çinar-ek bere buruaz beste egin dute kartzelan.

Momentu honetan, berriro ere, Europa giza eskubideen urraketa larri hauen aurrean isilik dago, eta Torturaren Prebentziorako Komiteak egoerari aurre egin gabe jarraitzen du.

Egoera honen aurrean, Euskal Herriko Kurdistanekiko Elkartasun Komiteak, eragile politiko, sindikal eta sozialekin batera, gure elkartasuna adierazteko eta beharrezkoak diren neurriak har daitezen exijitzeko kalera irteteko beharra ikusten dugu.

Manifestazioaren ondoren, Euskal Herriko Kurdistanekiko Elkartasun Komitea ordezkatzen duten pertsonek prentsari adierazpenak egingo dizkiote.

 

 

 

Bertan behera utzi dugu DIA supermerkatuetako greba

admin
-
0
Bertan behera utzi dugu DIA supermerkatuetako greba

EEEari aurre egiteko grebak arrakastatsuak izan dira, bai lehen egunak bai mugagabea, negoziazioa baldintzatzeko helburuarekin deitu genituenak.

LABetik, lortu dugula uste dugu, negoziazioetan ikusgarritasuna izanda. Enpresa presionatu dugu, hemen negoziatu nahi genuen eta hau eman ez bada ere argi dago gure mobilizazioek izan dutela eragina, baina garrantzisuena da langileek ez duitela etsi eta kolektibo moduan borrokan egin dutela guztion lanpostuagatik.

Helburu hori zuen greba mugagabeak eta kontsulta aldiaren amaierak beste egoera batera joatera behartzen gaitu eta horrela, LABek bertan behera uzten du pasa den martxoaren 11n ELArekin batera deitu zuen greba mugagabea.
Adi egongo gara prozesua eta konprometitutako denden aurrean, eta aholkularitza ere emango diegu kaleratze- gutunak jasoko dituzten langileei, iragarritako “subrogazioak” ez duelako ezer argi uzten.

Ez inork ez ezerk ez dute ekarriko konfrontazioari uko egiterik, baldintza duinen alde borrokan jarraituko dugun enpresan, eta orain, inoiz baino esanahi sakonagoa hartzen du “osasun gehiago, enplegu gehiago” lemarekin egindako borrokak.

Adi jarraituko dugu, bestelako mobilizazioei aterik itxi gabe.
 

 

 

EAEko neoliberalek ez diote langileon prekarietateari aurre egin nahi

admin
-
0
EAJ, PSE eta PPk EAEn 1.200 eurotako gutxieneko soldata ezartzearen kontra agertu dira Legebiltzarrean.

Gaur Gasteizko Legebiltzarrean EHBilduren ekimenez, EAEn gutxienezko soldata 1200 eurotan ezartzeko proposamena eztabaidatu da. Zehazki, proposamen horrek planteatzen zuen:

– EAEn beharrezkoa dela 1.200 eurotako gutxieneneko soldata.

– Gizarte eragileei plazaratzea helburu hori lortzeko Akordio Interprofesional baten beharra.

– Jaurlaritzari 1.200 eurotako gutxienezko soldata ezarriko lukeen Akordio Interprofesional bat lortzeko jarrera proaktiboa izatea.

– Erakundeak publikoki interpelatzea, kontratazio publikoan 1.200 eurotako gutxienezko soldata ezartzeko neurriak hartzera.

Langileok azken urteetan jasan dugun murrizketa, blokeo eta eraso guztiei aurre egiteko beharrezkoa dugu erakunde eta botere politikotik gure aldeko politikak martxan jartzea eta neurri zehatzak hartzea, eta bide horretan baloratzen dugu EH Bilduk Legebiltzarrera eramandako proposamena. LABek askotan eskatu du 1200 eurotako gutxienezko soldata ezartzearen beharra, baita aldarrikapen hori Lege Biltzarrera eraman, langileak pairatzen ari garen prekarietate egoerari aurre egiteko.

EAJk, PSEk eta PPk kontra bozkatu dute, eta beste behin herri honen gehiengoa garen langileei lepoa eman digute, eta patronalarekin lerrokatzea eta hauen interesak defendatzea erabaki dute.

EAJ alderdiak, beste behin ere, azken bi lan erreformak inposatu zituzten alderdiekin bat egin du politika neoliberalak aplikatzen jarraitu ahal izateko. Betiko moduan EAJ patronala eta botere ekonomikoaren lagun.

Langileei lepoa emateaz gain, Lan Harremanetarako eta Babes Sozialerako Euskal esparrua lortzeari ere lepoa eman diote, berton gutxienezko soldata ezartzea esparru propioa osatzeko neurri oso garrantzitsua delako.

EAJk atzo Gipuzkoako Batzar Nagusietan, LABek aurkeztutako eskaera bati erantzunez, EH Bildurekin batera injerentziarik gabeko Lan Harremanak eta Babes Sozialerako Euskal Esparrua aldarrikatu zuen, eta gaur Legebiltzarrean, esparru propio hori osatuko luken gutxienezko soldata propio bat ezartzeari kontra egiten dion. Adierazpen formaletatik harago, prekarietateari mugak jarri eta Lan Harremanak eta Babes Sozialerako Euskal Esparruan eraikuntzan urratsak emateko ez du inolako borondaterik.

LABek 1.200 eurotako gutxieneko soldata ezartzearen beharra berresten du, langileak jasaten dugun egoera guztiz prekarioari aurre egiteko.
 

 

 

Kristau Eskolaren teilatuan dago akordioaren pilota

admin
-
0
Kristau Eskolaren teilatuan dago akordioaren pilota

LABek oso garbi dauka non dauden Gizarte Ekimeneko ikastetxeetako gatazkarekin amaitzeko akordiorako gakoak. Gure helburua gatazka honetan ez da inolaz ere itunpeko sarearekin bukatzea, hori intoxikazio hutsa da. Sindikatuok negoziaziorako prestutasuna adierazi dugu; patronalaren teilatuan dago, beraz, akordioaren pilota, ez ditzala baloiak kanpora bota. Gauzak horrela egonda, LAB negoziazio erraztuko lukeen intermediazio prozesu bat onartzeko prest egon daiteke, baina inolaz ere ez ditugu geure buruak hirugarren batek egindako proposamen itxi bati binkulatuko. Argi daukagu langileok egindako ahalegin guztiak garaipenera eramango gaituela.

Astelehenean izandako mahai negoziatzailearen bilera ondoren sindikatu guztiok ez nahikotzat jo genuen patronalak egindako proposamena. Egia da aurrera pauso nabariak egon badaudela, baina oraindik gure ustez ezinbestekoak diren gai batzuetan hutsuneak daude:

• Langileen birkolokazio prozedura ez da zehazten. Patronalak planteatu duen bakarra enplegu galera egon daitezkeen zentroak identifikatzea da. Beste guztia asmoak besterik ez dira.

• Ordezkapenak Haur eta Lehen hezkuntza osoan ez dira egingo lehenengo egunetik.

• Planteatzen den soldata igoera puntuala da, ez da kontsolidatzen eta ez du soldata baxuenak dituzten langileak kontutan hartzen. Ez dugu onartuko kategorien arteko soldata arrakala handitzea eta kategoria prekarioenak zigortzea.

• Finantziazio Publikoari lotutako proposamenak eta negoziazio kolektiboa balio gabetzea ez dugu onartuko

• Lan hitzarmenerako planteatzen den indarraldia, 2023 urtera arte, luzeegia dela deritzogu.

Behin eta berriro esaten ari gara akordiorako gakoak ez daudela finantziazioan. Itunpeko ikastetxeetan gaur egun dauden arazoei aurre egiteko borondatea besterik ez da behar. Gure ustez Kristau Eskola patronalak ez du orain arte negoziaziorako borondate argirik erakutsi. Gatazkaren hasieratik sindikatuon desgastea bilatu du etengabe, negoziazio mahaian egoerari aterabidea emateko inolako proposamenik aurkeztu gabe.

Hilabete luze hauetan zehar Ikastolen lan hitzarmenerako izandako akordioari heldu nahi izan dio Kristau Eskolak. Bere bozeramailearen ahotan LABn ekinbidea ez dator bat Ikastoletan eta Gizarte Ekimeneko eskoletan. Argi eta garbi esan behar dugu hori gezurra dela, patronalaren bozeramaileak sindikatuon desgasterako erabiltzen ari den enegarren azpijokoa hain zuzen. Ezberdintasunak patronalaren negoziazio borondatean eta edukietan daude, ez beste inon.

Ikastoletan mobilizaziorik egin gabe akordio batera iristeko gaitasuna eduki dugu eta Gizarte Ekimenean 39 mahai negoziatzaile, 21 greba egun eta mobilizazio ugari egiten ari gara akordio bat erdiesteko:

• Guretzat oso garrantzitsua den birkolokazio akordioa hobetu dugu. Ikastoletan ez da matrikulazio jaitsieraren ondorioz enplegua galduko.

• Lan baldintza okerrenak dituen 0-3 zikloan soldatak parekatu eta lan zamak hobetu dira Ikastoletan. Gainera ordezkapenak lehen egunetik kategoria guztietan bermatzen dira.

• Bi urteko indarraldia daukan akordioa sinatu dugu, hurrengo urtean berriro negoziatzera goaz.

• Soldatarik baxuenak dituztenak izan dituzte soldata igoera altuenak ikastoletan.
 

 

 

Uste dugu Nafarroako Parlamentuak onartutako Berdintasun Foru Legea aurrerapauso bat dela, baina ez da nahikoa

admin
-
0
Gaur, Nafarroako Parlamentuak Gizon eta Emakumeen arteko Berdintasun Legea onartu du. Lege horren helburua da nafar jendarte askeago, justu, demokratiko eta solidario baterantz urratsak egitea, bizitzako esparru eta etapa guztietan emakume eta gizonen arteko berdintasunerako eskubideak sustatuz. LAB sindikatuaren aburuz, legea aurrerapausoa da, bai, baina aurrerapauso hori ez da nahikoa. Eta ez da nahikoa legeak biltzen dituen gomendioak ez direlako benetako betebeharrak, den-dena aldeen borondatearen esku uzten baitu. Gainera, gure ustez, gizon eta emakumeen arteko berdintasunari buruzko ikuspuntu kontserbadore batean du abiapuntua.

Legearen hitzaurreak jasotzen du eredu soziala aldatzeko beharra, bizitzaren jasangarritasunaren garrantzia azpimarratze aldera eta genero estereotipo eta rolak apurtze aldera. LABen iritziz, bide onean doa hori. Baina artikuluak garatzeko orduan oso eskas gelditzen da legea, “gomendatzen” baitu, “errazten” baitu, baina ez du “exijitzen” edo “behartzen”. Legea ez da urratzailea, ez dago artikulatua benetako aldaketa soziala ekartzeko; areago, ez dago artikulatuta hitzaurrean aipatzen diren helburuak lortzeko.

Konparazio batera, kontratazio publikoetan edo baldintza agirietan, ez zaie erakundeei edo enpresei exijituko emakumeen eta gizonen arteko ezein lan bazterketa eragozteko neurriak hartzea edo kontziliazioa erraztea. Bakarrik erraten du aukeraketan lehentasunak ezarri ahal izanen direla halako neurriak hartzen dituztenen artean. Era berean, laguntza publikoak eskatzeko orduan, legeak ez die erakunde edo enpresei exijitzen berdintasun planak izatea.

Legea emakume eta gizonen berdintasun politikaren irakurketa kontsebadoretik abiatzen dela uste du LABek. Anbizio gutxikoa dela, alegia. Emakumeon diskriminazioa estrukturala dela onartzen duen arren ez du sistemaren irakurketarik egiten, ez du heteropatriarkatua aipatu ere egiten, ezta bizi dugun sistema kapitalista basatia ere. Eta bizitza erdigunean jartzea aipatzen badu ere, eredu produktiboa zentrotik alboratzeko neurririk ez du proposatzen. Ez du zaintza lanen berrantolaketa sozialean sakontzen.

Abortuaren inguruan ere ez du ezer aipatzen. Emakumeen eskubide sexualak eta ugalketa-eskubideak bermatuko dituela aipatzen du, bai, baina ez dio abortatzeko eskubidearen gaiari heltzen.

Laburbilduz, LABek uste du Nafarroako Gobernuak eta Parlamentuak bide luzea aukeratu dutela emakumeak baztertu eta hiltzen dituen arazoari ekiteko. Horren aitzinean, LABek berresten du bizitzak erdigunean jarriko duen eredu feminista baten alde borrokatzen jarraituko duela.

 

 

 

Estampaciones Bizkaiako langileak metalgintzako hitzarmenaren alde mobilizatu dira

admin
-
0
Estampaciones Bizkaiako langileak metalgintzako hitzarmenaren alde mobilizatu dira

"Bada denbora alarma gorria piztuta dagoela, metalgintzako herrialdeko hitzarmen baten faltak, lan-baldintza duinak bermatuko dituenak, sektore langile guztiontzako prekarietate handiagoa dakar. Elkartasuna baino gehiago da Bizkaiko metalgintzako hitzarmena, beharrizana eta eskubidea da", adierazi du enpresa batzordeak.

Hauxe da Estampaciones Bizkaiako enpresa batzordearen oharra:

Estampaciones Bizkaiako langileok metalgintzako hitzarmen sektorialaren baldintzak askogatik hobetzen dituen hitzarmen propioa dugu. Gaur egun hau bezalako hitzarmena izatea, daukagun antolaketa eta borrokarako gaitasunagatik da, baina baita ere Bizkaian metalgintzako hitzarmen sektoriala egon delako, eta honek oinarriak finkatu dituelako sektoreko enpresek, gureak bezala, euren lan-baldintzak are gehiago hobetu ahal izateko. Sektoreko hitzarmena desagertu egiten bada edo urteetan hobekuntzarik gabe baldin badago, sektoreko langile guztiok jasaten dugu honen eragina. Sektoreko hitzarmen eguneraturik ez badago, herrialdeko hitzarmena ezartzen duten enpresa guztiek merkeago eskaintzen dituzte euren zerbitzuak, eta hau aitzakia bezala erabiltzen dute hitzarmen propioa duten enpresek lan-baldintzak ez hobetzeko, okertzeko, kontratazio berriak are baldintza prekarioagoetan egiteko…

Bada denbora alarma gorria piztuta dagoela, metalgintzako herrialdeko hitzarmen baten faltak, lan-baldintza duinak bermatuko dituenak, sektore langile guztiontzako prekarietate handiagoa dakar. Elkartasuna baino gehiago da Bizkaiko metalgintzako hitzarmena, beharrizana eta eskubidea da.

Horregatik, Estampaciones Bizkaiako langileok mobilizazioa egin dugu gaur. Sektoreko langile eta sindikatu guztien borrokak soilik ekarriko du Bizkaiko metalgintzako hitzarmen duina. Estampaciones Bizkaiako langileok Bizkaiko metalgintzako hitzarmen duinaren aldeko gure konpromisoa erakusten dugu.
 

 

 

Sunrise Medical enpresako langileek greban jarraitzen dute, zuzendaritzak negoziatzeko duen borondate ezaren aurrean

admin
-
0
Sunrise Medical enpresako langileek greban jarraitzen dute, zuzendaritzak negoziatzeko duen borondate ezaren aurrean

Sunrise Medical, aulki elektrikoak eta ortopediarako osagaiak ekoizten dituen eta Arrankudiagako Bakiola industriagunean kokatua dagoen enpresa, martxoaren 20tik greban dago. Joan den irailean, plantilla osatzen duten ekoizpeneko 43 langilek eta bulegoetako beste horrenbestek hitzarmenaren negoziazioari ekin zioten. Lehenengo unetik, negoziatzeko borondate eza adierazi du enpresak, lantokiaren langileek aurkeztu zioten plataformaren puntu garrantzitsuei buruz hitz egiteari uko eginez.

Bakiolako Sunrise Medicaleko plantak urtero-urtero etekinak ematen ditu eta bere ekoizpen mailak gora egiten du. Bere osasun ekonomiko onaren seinalea da dibidendu garbien banaketa enpresaren kideen artean, baita Euskal Lantegiak enpresaren beste lantegiak finantziatzen dituela bere inbertsioak bakiolako lantegiari zuzendu barik.

Errealitatearen parez pare, berriz, plantillaren lan baldintza onartezinak daude, zeinei lan erritmoen azkartzea gaineratzen zaien. Enpresak onartu nahi ez dituen plantilaren aldarrietako batzuk: azkeneko urteotan galdutako eroste ahalmena berreskuratzea, Bajak bete daitezela, kategoria profesionalak ez daitezela betikotu edo ETTak ez daitezela kontratatzeko erabil, egiturazko lanpostuentzako behin-behinekotasuna erabiltzeari uko egin diezaiotela.

Enpresaren zuzendaritzak negoziatzeko borondate ezaren aurrean, plantillak, ELAko delegatuen eta LABeko delegatuaren laguntzaz martxoaren 20rako greba deialdia egin zuen. Bada, asanblada baten bidez, beharrezkoa izango den denbora, beren aldarrikapenak gauzatu artean tinko eutsiko diotela erabaki dute langileek. Juxtutzat jotzen dituzte delako aldarrikapenak eta ez dute enpresaren zuzendaritzaren jarrera itxia ulertzen enpresaren ekoizpen egoera eta egoera ekonomikoa ikustita.

Beren egoeraren berri jendarteari baita Sunrise Medicalen bezeroei emateko asmoz, mobilizazio berriak iragarri dituzte langileek.

 

 

 

Ambazoniako Gobernu Kontseiluko ordezkariekin bildu gara, herrialdeak pairatzen duen errepresio bortitzaren berri izateko

admin
-
0
Ambazoniako Gobernu Kontseiluko ordezkariekin bildu gara, herrialdeak pairatzen duen errepresio bortitzaren berri izateko

Ambazonia, Amba Land izenarekin ere ezaguna, aldarrikatutako Estatu bat da, lehen Kamerun hegoaldearen parte zena. Bada, Ambazoniako Gobernu Kontseiluko ordezkariak izan dira gurean, eta Garbiñe Aranburu idazkari nagusiarekin eta Nazioarteko idazkari Koldo Saenzekin bildu dira. 

Ambazoniako ordezkariak Euskal Herrian izango dira bihar arte, eta Gasteizko Legebiltzarrak ere hartuko ditu. Ambazoniako Gobernu Kontseilua 2013. urtean egituratu zuten, Ambazoniako bertako askapenerako mugimendu desberdinetako ordezkarien eskutik. Burujabetza osoa aldarrikatzen dute, baina azken urteetan errepresio bortitza pairatzen ari dira Kamerungo Estatuaren aldetik, milaka hildako eta erbesteratuekin. Etxeak ere erre dizkiete, eta krisi humanitario larrian daude. Honen guztiaren berri jaso dugu gaur, bertatik bertara.

 

 

Enplegu duina eta segurua aldarrikatu dugu Gasteizen, Michelin Hirien Biltzarra dela eta

admin
-
0

Michelin Hirien Biltzarra egiten ari dira egunotan Gasteizen. Bada, hitzordu hau baliatu dugu enplegu duina eta segurua aldarrikatzeko. Izan ere, azken bi urteetan, Gasteizko Michelingo lantegian lau langile hil dira, eta, hala ere, gai hau ez dute jorratuko egunotako biltzarrean.  
 

 

 
1...677678679...1,612Page 678 of 1,612

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus