2026-04-30
Blog Page 643

Gipuzkoako papergintza eta grafikagintzako sektoreetako grebak erabateko arrakasta izan du

admin
-
0
Gipuzkoako papergintza eta grafikagintzako sektoreetako grebak erabateko arrakasta izan du

Gaur, ekainak 26, Gipuzkoako industria alorreko bi sektorek, Grafikagintzak eta Paperak, egun osoko greba burutu dute beren hitzarmen kolektiboen defentsan eta benetako negoziazioa aldarrikatzeko. Sektoreko langileek kontzentrazioa egin dute ADEGIren egoitzaren aurrean.

Bi sektoreetan grebak erabateko arrakasta izan du. Papergintzaren kasuan, gaurkoa hirugarren greba eguna izan da eta aurreko bi greba egunetako jarraipen berdina izan du, hau da, %90koa. Ekoizpena geldirik egon da.

Grafikagintzako sektorean gaurkoa lehenengo greba eguna izan da, eta grebak arrakasta handia lortu du, %80ko jarraipena izan baitu. Nabarmendu behar da sektore hau osatzen duten ia enpresa guztiak enpresa txikiak direla, zenbait enpresetan ordezkaritza sindikalik gabe.

Beraz, bi sektore hauetako langileek argi adierazi dute ez dutela onartzen ADEGIren jarrera inmobilista. Greba hauen helburua da Gipuzkoako patronala den ADEGIk benetan negoziatu dezala. Helburu honekin, bi sektoretako langileak ADEGIren aurrean elkarretaratu dira.

Bihar, ekainak 27, bi sektoreek beste greba egun bat burutuko dute. 12:00etan, manifestazioa egingo dute Tolosako triangulotik.
 

 

 

Arabako metalgintzako langileek pairatzen duten prekarietatea salatu dugu SEA patronalaren aurrean

admin
-
0
Arabako metalgintzako langileek pairatzen duten prekarietatea salatu dugu SEA patronalaren aurrean

Aldarrikapen Eguna egin dugu Gasteizen, Arabako metalgintzako langileek dituzten arazo eta beharrei konponbideak exijitzeko, bai enpresetan baita sektorean ere. Hala, goizean, SEA patronalaren aurrean elkarretaratzea egin dugu defendatzen duen estatalizazioa eta prekarietatea salatzeko. Era berean, gure aldarriak kaleratu ditugu: aberastasuna banatu, soldata duinen bitartez; lan baldintza duinak, bizitza erdigunean jartzeko; kontratazioan prekarietatea gelditu, enplegu duina bermatzeko; diskriminazioarekin amaitu, emakumeen eskubideak defendatzeko; eta lan osasuna bermatu, lanetik bizirik eta osasuntsu bueltatu ahal izateko.
 
Gaur, ekainak 26, LABek “Aldarrikapen eguna” deitu du Arabako Metalean. Honen bitartez, exijitu dugu sektoreko langileen dituzten arazoei erantzun behar zaiela, bai enpresetan baita sektorean ere. Egunean zehar, gure aldarrikapenak zabaldu ditugu enpresetan eta poligonoetan eta eguerdian konzentrazioa burutu dugu SEAren egoitzaren aurrean.

LABek Aldarrikapen Egunean Arabako Metalean langileek dituzten beharrei erantzutea exijitu du, bai enpresetan baita sektore mailan ere. Sindikatuak sektorearen diagnostikoa burutu zuen eta bere militantziaren ekarpenak jaso zituen, aldarrikapenen 5ekoa osatuz:

– Aberastasuna banatu, soldata duina: 1200€ gutxieneko soldata gordina.
– Lan baldintza duinak, bizitza erdigunean: lanaldia (Euskal Herriko Metaleko hitzarmenen luzeena) murriztu, malgutasuna mugatu eta hobekuntzak ezarri bizitza pertsonala garatzeko eta zaintza lanak egin ahal izateko.
– Kontratazio duina: prekarietate eta iruzurrarekin amaitzeko, azpikontratetako subrogazioa ezartzeko, ETTen bidezko kontratazioa mugatzeko,…
– Diskriminazio oro ezabatzea, emakumeen eskubideak bermatzeko: neurri erangikorrak ezartzeko, soldata arrakala ezabatzeko, emakumeen kontratazioa handitzeko,…
– Lan osasuna bermatzea, lanetik bizirik eta osasuntsu bueltatzeko.
Horrekin batera, gehiengoan sinatu behar dela eta estatalizazioari eta lan erreformari aurre egin behar zaiola planteatzen dugu.

Horiexek aldarrikatu ditugu gaurko egunean enpresetan eta poligonoetan. Aldi berean, hori ere exijitu dugu SEAren aurrean konzentrazio baten bitartez. Gure ustez, SEAk prekarizazioa mantendu nahi du, estatalizazioari eutsiz, inolako aurrepausurik eman gabe, ez soldatak duintzeko, ez kontratazioaren iruzurrarekin bukatzeko, ez subrogazioa onartzeko, ez lanaldia murrizteko, ez emakumeen diskriminazioa ezabatzeko, ez langileen osasuna bermatzeko. Horregatik, hain zuzen ere, hamarnaka langilek parte hartu dute patronalaren egoitzaren aurrean, aldarrikapenak hara eramanda.

LABek jarraituko du bere aldarrikapenak zabaltzen eta dinamikak abiatuko ditu enpresetan eta sektorean dauden arazoak konponbideak exijitzeko.
 

 

 

Eskubide Sozialen Kartak DSBE murrizteko proposamena baztertzen du

admin
-
0
Euskal Herriko Eskubide Sozialen Kartak salatzen du Eusko Jaurlaritzak, babesa ematen dioten alderdien bidez, DSBEren erreforma bat onartu nahi dute, prestazio sozialetan murrizketa berriak egitea eta prestazioak jasotzen dituztenak kriminalizatzea duena helburu moduan.

Eskubide Sozialen Kartak gogora arazten du EAJ eta PSEren lege proposamena, pobrezia eta bazterketa sozialaren aurkako Herri Ekimen Legegilea (HEL) erregistratu ondoren aurkeztu zela. HEL honetan planteatzen genuen, besteak neurri batzuen artean, DSBEren zenbatekoan hobekuntza bat (LGSren %100 kide bakarrarentzat eta %50 gehiago bizikidetza unitateko pertsona gehigarri bakoitzeko), onartutako murrizketetan atzera egitea (adibidez, urtebeteko erroldatzera bueltatzea eta egun baztertuta dauden kolektiboei sarbidea erraztea (hala nola, adina 18 urtetan jarriz).

51.000 pertsona baino gehiagoren babesa jaso zuen HELak, hala ere, tramitera ere ez zuten onartu, hain zuzen ere EAJ, PSE eta Ppren kontrako botoarekin. Hiru alderdi hauek ados jarri dira lege proposamen baten tramitea onartzeko. Honek DSBEren zenbatekoa ez du Lanbidearteko Gutxieneko Soldatarekin lotzen, prestazio sozialak eskuratzeko eskubidea murrizten du eta babestu egiten du egungo zein etorkizuneko praktikak, prestazioak jasotzen dituztenak ustezko gaizkiletzat jotzen dituztenak, gutxienez bermatutako diru-sarrerak izateko eskubidea duten pertsonen ordez.

Guzti honen aurrean, Eskubide Sozialen Kartak:

1. Dei egiten du DSBEren erreforma murriztailearen tramitazioa baztertzeko.

2. Berretsi egiten da pobrezia eta bazterketa sozialaren kontrako HELen jasotako edukiak onartzeko beharrean.

3. Baieztatu egiten du bere osotasunean babes sozial ereduaren inguruko eztabaidari ekitearen beharra. Horretarako, tresna egokien faltan, beharrezkoa da lan harremanak eta babes sozialerako euskal esparru bat,

4. Bere konpromisoa erakusten du prestazio sozialen murrizketen kontra eta bidezko sistema sozial baten alde mobilizatzen jarraitzeko.

 

 

 

Ez dugu Nafarroako Ostalaritza hitzarmena sinatu ez dituelako kontuan hartzen sektoreko prekaritatea bukatzeko beharrezko ezaugarriak

admin
-
0
Patronalak eta UGT eta CCOO sindikatuek aurreakordioa lortu dute Nafarroako Ostalaritza hitzarmena sinatzeko. Hitzarmen horrek soldata igoerak jasotzen ditu, baina horietaz landa, apenas jasotzen duen sektoreko errealitatea.

Negoziazio mahaia urtebetez geldirik egon eta gero, lau bilerako denbora errekorrean lortu dute akordioa. Baina errekor horrek kostua izanen du Ostalaritzako langileendako, hitzarmen horrek ez baititu jasotzen langile horien lan baldintzak egunero-egunero prekarizatzen dituzten inguruabarrak.

LAB sindikatua negoziazio mahai horretan izan da eta bertan aldarrikatu ditu lanaldi partzialak arautzeko neurriak, halako lanaldiekin gertatzen diren abusuak bukatze aldera, sektorean egun dauden gaitzen artean handienetarikoa baita, Iruñerriko Piztu Alarma lanabes aktibistak azkenaldian borrokatu dituen kasuetan ikusi den gisara: astean bi orduko lanaldia izateko kontratatzen zituzten langileak, baina benetan 30 ordu egiten zituzten.

Gainera, Ostalaritzaren errealitateari erreparatuta, hagitz garrantzitsua iduritzen zitzaigun hitzarmenean sartzea langile migratuek dituzten arazoei aurre egiteko baimenak, ia ezinezkoa egiten baitzaie milaka kilometrora dituzten senideekin egotea.

LAB sindikatuaren bertze negoziazio ildo bat izan da Estatalizazioari aurre egitea, hau da, Nafarroako hitzarmenak ezartzeko lehentasuna izatea, Espainiakoaren aurretik, eragotzi ahal izateko Nafarroari eta bere langileei dagozkien kontuak Madrilen arautzea. Era berean, gure asmoa zen Ostalaritzaren hitzarmermenean kolektibitateetako langileak sartzea, uste baitugu gai hori nahitaezkoa dela Nafarroako negoziazio kolektiboak edukia izaten jarrai dezan.

Eta bagenuen bertze aldarrikapen anitz ere langileen egunerokoak hobetze aldera: lanaldiak, baimen ordainduak, errelebo kontratua, kategoriak, malgutasuna… Baina Patronalak muzin egin die LABen aldarrikapen guztiei. Areago, ez die erantzunik ere eman. Horregatik guztiagatik, LABek ez du hitzarmen hori sinatu praktikan bakar-bakarrik jasotzen baititu soldata igoerak eta legeek edo epaiek dagoeneko finkatuak dituzten eskubideak.

Begibistakoa da Ostalaritzan gora doazela Patronalaren esplotazio eta abusuak. Eta horregatik deitoratu beharrekoa da hitzarmen honetan sektoreko arazoei seriotasunez eta zorroztasunez ekin ez izana. Argi dago soilik gehiengo sindikal borrokalari batekin posible izanen dela Ostalaritzako langileen arazoei benetan aurre egitea eta sektoreko prekaritatea murriztuko duen hitzarmen baten alde borrokatzea.

 

 

 

[IRITZIA] “Injustiziak 47 aurpegi gehiago ditu”

admin
-
0
[IRITZIA] “Injustiziak 47 aurpegi gehiago ditu”

LAB sindikatuko arlo juridikoko kideek 11/13 auzian auzipetutako 47 lagunei elkartasuna eta babesa adierazi diete, eta irailaren 14ko Bilboko manifestazioarekin bat egin dute.

Hauek dira iritzi artikuluaren sinatzaileak: 
Ainhize Muniozguren, Diego Gonzalez, Jone Iturrate, Alfonso Lopez de Alda, Lorea Porres, Lara Salceda, Maider Mendizabal, Amaia Ramon, Eñaut Bilbao, Garazi Mendoza, Nerea Lekue, Iraide Juaristi, Urtzi Gorostiaga, Maialen Bergara, Jesus Gutierrez, Aritz Tellitu, Oier Bilbao, Agapito Valle, Alex Azpiri, Alatz Barcenas, Amaia Gomez, Maider Portoles, Bittor Canales, Arantza Uriondo, Mikel Von Wichmann, Haizea Nuñez, Arritxu Larrañaga, Irati Suarez, Alaia Baseta, Onintza Irigoien, Olatz Arostegi, Aritz Ezeiza, Anitz Eskisabel, Eztizen Agirresarobe, Juantxo Barkos, Ainhoa De Miguel, Arantza Bidondo, Jon Arrazola, Edurne Visiers, Andoni San Miguel, Peio Garcia, Argi Zandueta, Nuria Esparza, Nerea Makuso.

Hauxe da idatzia:
Idatzi hau hasi nahi dugu gure babes eta elkartasun osoa adieraziz 11/13 auzian auzipetuak izanik epaituak izango zareten lagunei, ondoan gaituzue eta izango. Eta horrekin batera, gure elkartasuna eta babesa azaldu nahi dizuegu auzi hau gertuenetik pairatuko duzuenoi ere, auzipetuen senide eta gertuenekoei.

Auzi injustu honetan giza eskubideen alde egin duzuen lana izango da epaitua. Ongi dakigu espainiar auzitegiek justizia paralelo bat dutela, baina euskal herritarrok, herriak, egina dugu gure epaia, eta zuek egin duzuen lana balioan jarri eta eskertzea da. Mila esker herri honetako gatazka politikoen ondorioz preso eta erbesteratuak izan diren herritarren eskubideak bermatuak izan daitezen lanean jarduteagatik.

Prozesu honekin, ordea, ez dute soilik 47 auzipetuek eginiko lana eta jarduna epaitu nahi. Euskal herritarrok ozen eta determinazioz adierazi eta babestu dugu preso eta errefuxiatuen eskubideen aldeko aldarria, horren adibide izanik urtez urte urtarrilean egiten den herri ekimen jendetsua. Horregatik, auzi honek epaitu nahi duena jardunbide zehatz batetik haratago doa: herri aldarri zein elkartasun eta babes sareak dira epaituak izango direnak.

Ukaezina da auzibide honek iraganera garamatzan sentipen herritarra. Gaindituak uste eta nahi genituen egoerekin topatzera ekarri gaitu berriz ere, baina horrek ez du aldatuko gure iparra, langintza eta jarduna, IrtenBidera elkarrekin egiteko dugun bidean sakontzea hain zuzen.

Idatzi honetan aipatu nahi zaituztegu espresuki LAB sindikatuaren parte, bereziki arlo juridikoaren parte zareten edo izan zareten kideok ere, Imanol, Eukene eta Ane. Jakin gure babes osoa duzuela, togarekin eta togarik gabe, auzitegietan zein kalean.

Bestalde, LABeko arlo juridikoko kideok bereziki salatu nahi dugu abokatu gisara lan egiteagatik auzipetuak izan diren kideen egoera. Beren lan profesionala egiteagatik izango dira epaituak, defentsa juridikoan jarduteagatik. Onartezina da! Irmoki salatu nahi dugu kide profesional ditugun lankide hauen egoera, eta gonbit egin nahi diegu arlo juridikoan diharduten bestelako kideei, abokatu, aholkulari, prokuradore zein maila akademikoan dihardutenei, eta bereziki Elkargo ezberdinei, salaketa honekin bat egitera eta abokatutzaren arlotik ere dagozkion adierazpen eta ekimenak egitera.

Amaitzeko, bat egin nahi dugu auzipetuek eginiko deialdi zabalarekin, irailaren 14an Bilbon izango den manifestazio erraldoiarekin. Batzuek horrela nahi ez izan arren, IrtenBidera begira gaude eta honen bidean lan egiteko prestu.
 

 

 

Gaur egungo eskola publikoetako jangela eredua guztiz agortuta dago

admin
-
0
LAB sindikatuak Eusko Jaurlaritzari ardura politiko, ekonomiko eta teknikoak exijitzen dizkio, ondorioak azken muturreraino helduaz, horrela dagokiolako sistema politiko, tekniko eta ekonomikoari.

Erakutsi den bezala, 17 urtez horrelako iruzurra ahalbideratu duen sistema ezin daiteke inola ere denboran luzatu. Egungo eskola jangelen araudiari suposatzen zaizkion gardentasuna eta ardura, ez dira inondik inora bete, Hezkuntza sailari egokitzen zaizkion kontrol jarraipenak ez dira existitu izan. Jangelen ordenean 34. artikuloan agertzen diren ardura politiko eta teknikoak ez dira bete.

Jangelen enpresen ardura ekonomikoa murriztua ikusi da Hezkuntza sailetik inolako jarraipenik egin ez delako. Zehazki, ez da jarraipenik egin administrazio eta zerbitzuen sailburuordetzatik berau izanik zigortu dituzten kontratatzaile zuzena. Kontratazio pliegoetan izandako azken aldaketa ez nahikoa iruditzen zaigu.

LABek zerbitzu publikoen externalizazioarekin bukatu beharra dagoela diogu oraingoan ere. Baliabide publikoek, enpresa pribatuei jaten emateari utzi behar diote, hauen helburu bakarra irabaziak gehitzea baita, kalitatezko zerbitzua eman beharrean.

Eskola jangelen kasuan, lehentasunak hauek izan behar dira:

– Elikadura osasuntsua, bertokoa, agroekologikoa eta sasoikoa
– Eskoletako Jangelak, eremu hezitzaile bezala aitortu daitezela
– Jangeletako langileak, ez daitezela merkartzia bezala tratatu, eta administrazioak kontrataturiko langile izatera pasa daitezela.

 

 

 

Gure kezka eta desadostasuna adierazten dugu DSBEren erreforma egiteko EAJ eta PSE-k PP-rekin egin duten aliantza neoliberalarekin

admin
-
0
LABek irizten dio beharrezkoa dela agenda politikoan prekarietatea eta borrokaren kontrako borroka jartzea. Honek suposatzen du eskubide sozialen murrizketan oinarritutako politika neoliberalekin amaitzea, xenofobia eta pobrezia kriminalizatzea borrokatzea, EAJk Pprekiko duen aliantzan ontzat ematen dituenak.

Ez da oinarrizko prestazio sozialak murristeko sasoia, euskal herritarren bizitzak erdigunean kokatzeko garaia da, onargarria izango den ongizate maila eta beharrezko gizarte kohesioa gaindituko dituena. Baina EAJk berriro egin du euskal gizarteko sektore zaurgarrienen kontrako politika neoliberalen garapenaren alde.

Euskal Herriko Eskubide Sozialen Kartak bultzatu zuen HELa baztertu ondoren, DSBEren jasotzaileen egungo egoera modu esanguratsuan hobetzea ekarriko lukeena, EAJk berriro dator erasora, bere egunean PSErekin adostutako murrizketen proposamenarekin, eta oraingoan Ppren aliantzarekin. Izan ere, oso ezaguna da honen jarrera xenofoboa eta pobreziaren eta DSBEren jasotzaileen kriminalizatzen duena.

2008ko legea aldatzea da proposamenaren helburua, jasotzaileen kolektiboa murriztu eta mugatzea beste helbururik ez duena, guztia Hego Euskal Herriko bazterketa sozial eta pobrezia mailak oso kezkagarriak direnean. 2008 eta 2016 artean %62 egin du gora arreta eman behar izan zaien pertsona kopuruak.

Egindako proposamenak aipatu prestazioari sarbidea mugatzea bilatzen du, sistema hau eznahikoa dela konstatatzen den momentuan: 2008tik %25ean egin du gora benetako pobrezia arriskuan dagoen eta arretarik jasotzen ez duen pertsona kopuruak.

Askieza da DSBEren egungo zenbatekoa, eta behin baino gehiagotan murriztu dute, eta honek ekarri du 2008ko legearen hasierako aurreikuspenekiko %13,5eko murrizketa, 2009tik 2017ra eros- gaitasunaren %11,9ko galera pilatuz.

Hori dela eta LABek eskatzen du, idatziz eta Gasteizko Parlamentuko hainbat hitzartzetan egin izan duen moduan:

– DSBEren erreformari buruzko eztabaidak EAEk behar duen babes sozialerako ereduaren eztabaida zabal dezala. Eztabaida horretan agerian utzi behar da lan harremanak eta gizarte segurantzan konpetentziarik ez edukitzeak ekartzen du DSBEren bidez egin behar zaiela aurre Madrilen erabakitako lan erreforma eta pentsioen murrizketari.

– Ematen ari diren prekarizazio sozial eta laboral prozesuei aurre egitea, aurrera eramaten ari diren enplegu politika aktiboak interes patronalen neurrira egiten baitira, prekarizazioa sustatu eta sarituz.

– EAEn babes sozialean BPGrekiko egiten den gastua igotzea Europako batazbestekoa beste.

– DSBEren jasotzaile izan zitezkeen baina ez diren pertsonen %30ak hau eskuratzeko aukera izan dezala.

– Proposamenak duen genero eragina txertatzea, jasotzaileen %56,7 emakumeak direla kontuan izanda.

– Sistemaren iraunkortasuna ezin da oinarritu baldintzarik okerrenetan dauden pertsonentzakoa baliabideen murrizketan, bidezko erreforma fiskal batean baizik, iruzurra jarraitzearekin batera.
 

 

 

Arbizuko lan istripu hilgarria salatu eta haren inguruabarrak berehala argitzeko exijitzen dugu

admin
-
0
Arbizuko lan istripu hilgarria salatu eta haren inguruabarrak berehala argitzeko exijitzen dugu

LAB sindikatuak bere elkartasuna eta dolumin sentituenak helarazi nahi dizkie gaur Sakana S.Coop enpresaren Arbizuko Lakber Mecanizados lantegian hil den R.A.C. 35 urteko langile altsasuarraren familiari eta lagunei. Era berean, sindikatu honek irmo baino irmoago exijitzen die erakundeei eta enpresa horretako arduradunei gaurko ezbehar traumatikoaren inguruko zirkunstantzia guztiak argitzea, batez ere kontuan hartuta hiru langile hil direla azken lau urteetan enpresa horretako bi lantegitan.

LAB sindikatuak dituen datuen arabera, Euskal Herrian lanean hildako 27. langilea da gaurkoa (9.a Nafarroan). Datu horiek eta prekarietatearen ondorioak gizarteratzea nahitaezkoa dela kontuan harturik, LABek dei egiten du Arbizuko lan istripua salatzeko antolatuko diren ekitaldietan partze hartzera.

Lan istripu guztiak tamalgarriak eta kezkagarriak diren arren, LAB sindikatuari bereziki kezkatzeko modukoa iruditzen zaio konstatatzea gaurkoa dela Sakana S.Coop enpresak dituen lantegietan azken lau urteetan hil den hirugarren langilea.

2015eko ekainaren 26an, Sakana Sociedad Cooperativa enpresak Lakuntzan duen lantegian, azpikontrataturiko enpresa bateko langile J.M.R.G. 43 urteko corellarra hil egin zen, 14 metroko altuera batetik erorita. Istripu hura dela eta, 2017an urte eta erdiko kartzela zigorra ezarri zieten bigarren enpresako bi arduraduni, langileen eskubideen aurkako delitu batengatik eta zuhurtziagabekeriazko giza hilketaren delitu batengatik.

2018ko martxoaren 15ean Y.L.A. 30 urteko langile lakuntzarrak istripua izan zuen Sakana Sociedad Cooperativa enpresak Lakuntzan duen lantegian. Plataforma metaliko bat erori zitzaion lanera eta egun bat geroago hil zen.

Prekarietatea, enpleguaren kalitate eskasa eta prebentzio neurri egokiak ez hartzea izan ohi dira lan istripu eta gaixotasunen oinarrian dauden egiturazko arrazoiak: azpikontratazioa, aldi baterakotasunak, kontratu partzialak, lan erritmo biziak, formakuntzarik eza… Larriena dena da horren guztiaren atzean dagoen zio bakarra enpresen diru gosea dela. Lan kosteak murriztuta irabazi tasak mantenduz sakontzen da prekarietatean, eta ez da beharrezko prebentzio neurriak hartzen. Batzuek gehiago irabazten jarraitzeko, gero eta gehiago dira egunero-egunero beraien bizitza arriskuan jartzera behartuak diren langileak, baita hiltzen direnak ere. Hala, istripu ia guztiak oinarrizko segurtasun neurri batzuekin ekidin zitezkeela azpimarratu nahi dugu. Normalean, prekarietate egoera gordinetan gertatutakoak izaten dira istripuak, eta halakoek agerian uzten dute prebentzio arloan atzera goazela prekarietatearen ondorioz.

 

 

 

Ikastoletan errelebo kontratuak eta borondatezko aurrejubilazioak baldintzarik gabe bideratzea eskatzen diogu EAEko Hezkuntza Sailari

admin
-
0
Ikastoletako langileon aldarrikapen hauek mahai gainean jartzeko eta sortu duten egoera larri honen aurrean irtenbide bat exijitzeko, LAB sindikatutik Hezkuntza Sailari premiaz biltzeko eskaera egin diogu.

Duela hilabete batzuk, Hezkuntza Sailak “Jaitsiera demografikoaren aurrean, enplegua mantendu eta irakasle plantillak berritu” izenpean akordio proposamen bat luzatu zigun itunpeko irakaskuntzan ordezkaritza daukagun sindikatu guztioi.

Proposamenaren funtsa, aurreikusten den jaitsiera demografikoaren aurrean langileak birkokatzea da, horretarako ordainketa eskuordetuan dauden irakasleen errelebo kontratuak finantzatuz. Baina horretarako zenbait baldintza ezartzen dira, langileon eskubidea izan behar duen erreleboa hartzeko aukerari mugak ezarriz.

Proposamenak aldiz, ez ditu itunpeko sare ezberdinen egoera eta errealitate propioak kontuan hartzen, Hezkuntza Sailak bere proposamena “edo hau hartzen duzue, edo ezer ere ez” mehatxu- terminoetan planteatzen baitu.

Baina bi sareen arteko egoerak ezin dira parekatu. Gizarte ekimenean gatazka eta blokeo egoera gogorra bizi den bitartean, ikastoletan, abenduan akordio bat sinatu berri du LAB-ek, Ikastolen Elkartearekin eta EIB-rekin. Honi esker, irailerako Lan Hitzarmen berria edukiko dugu, besteak beste, ikastoletako langile guztien errelebo kontraturako aukera babesten duena. Baina noski, horretarako ezinbestekoa da Hezkuntza Sailak bere ordainketa eskuordetuan dituen langileen errelebo kontratuak finantzatzea.

Honetaz gain, ikastoletako Lan Hitzarmenean jasota daukagun bezala, LAB sindikatutik, urteak daramatzagu Ikastolen Elkartearekin batera, langileak birkokatzen ikastolaren batean gela galera dagoenean edo eszedenteak sortzen direnean. Prozedura emankor honi esker, kaleratzeak ekidin ditugu, lanpostu suntsiketen aurrean langile guztiak birkokatuz. Baina hau eman dadin, ezinbestekoa da bizitza osoa lanean eman dutenek, bai errelebo kontratuaren bidez, edota borondatezko aurrejubilazioen bidez, ahalik eta azkarren eta egoerarik hoberenean erretiroa hartu ahal izatea, beste lankideei lekua uzteko.

Errealitate honetatik abiaturik, ezin dugu onartu Hezkuntza Sailak, itunpeko sare guztiak zaku berean sartzeko egiten duen jokaldi maltzurra. Hezkuntza Sailak, bere interesen araberako ultimatuma emanez, Gizarte Ekimeneko gatazka baldintzatu nahi du mahai gainean zerbait jartzen duenaren itxurakeria eginez.

Gizarte ekimenean patronalak gatazka iraunkortzen duen bitartean, ikastoletan egoera oso bestelakoa da. Blokeoa bizi duen irakaskuntzako sare bat, akordioa lortu duen beste batekin

nahastean, badirudi Hezkuntza Sailak gatazka azken honetara hedatzeko gogoa duela. Beraz LABen ezin dugu administrazioaren xantaia hau onartu.

Hezkuntza Sailari ikastoletan lortu dugun akordioa babestu, eta bere esku dauden ataletan erantzukizunez jokatzea exijitzen diogu eta gure akordioan jasota dagoen bezala, ordainketa eskuordetuan dauden ikastoletako langileen errelebo kontratuak baldintzarik gabe bidera ditzala! Era berean, langileak birkokatu ahal izateko borondatezko aurrejubilazioak erraztu eta saritu ditzala exigitzen diogu!
 

 

1...642643644...1,613Page 643 of 1,613

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus