LABLangile Abertzaleen Batzordeak

“Lan, pentsio eta bizi duinak. Burujabetza aldaketa sozialerako” leloarekin, Euskal Herriko Eskubide Sozialen Kartak Greba Orokorrera deitu du ostegunerako. Deitzaileok agerraldia egin dugu Bilbon, grebaren bezperetan.

Garbiñe Aranbururen hitzetan, “Greba Orokorrera deitu genuen egunetik, lan askoko asteak izan dira, eta jakin badakigu osteguna mobilizazio egun oso garrantzitsua izango dela, herri honetako historian jasota geratuko den eguna. Greba Orokorra arrakasta izateko garrantzitsuena langileek grebara jotzeko arrazoiak ondo ulertu dituztela da. Ulertu dute orain beharrezko indarra dugula arrazoi horiek guztiak balioan jartzeko”.

LABeko idazkari nagusiaren hitzetan, "ostegunekoa greba egun bat baino askoz gehiago izango da. Hain zuzen ere, azken urtean baldintzak sortu ditugu grebarako jauzia emateko, mobilizazio sozial maila handi batekin. Greba Orokorrean borroka hauek guztiek bat egingo dute. Langile klasearen batasunaren isla izango da osteguneko Greba Orokorra".

Garbiñe Aranburuk berretsi du ez dela neurri edo eraso konkretu bati erantzuteko greba, ofentsibara jotzeko greba baizik: “Urtarrilaren 30a gure indarra ikustarazteko eguna izango da, bultzada hartzeko eta borrokan jarraitzeko eguna”.

LABeko idazkari nagusiaren esanetan, “indarra dugu greba egiteko arrazoiak balioan jartzeko, eta proposamenak baditugu. Gasteiz eta Iruñeko Gobernuei zuzendu gatzaizkiei, baita Confebask eta CEN patronalei. Hauek guztiak Elkarrizketa Sozialaren defendatzaile sutsuak dira, baina, hori bai, edukirik gabeko Elkarrizketa Sozial bat defendatzen dute; denbora pasatzeko Elkarrizketa Sozial bat; patronalaren politikak legitimatzeko Elkarrizketa Soziala, non sindikatu batzuek uko egiten dioten borrokari”.

Madrilen hori bera gertatu da. Lanbide Arteko Gutxieneko Soldata igotzeko akordioa CEOEren garaipen bat izan da, “CCOO eta UGT sindikatuek argazkian egoteari eman baitiote lehentasuna, patrionalarekin sinatutako akordioari berari uko eginez. Lanbide Arteko Gutxieneko Soltada 2020. urtean 1.000 eurokoa izateari uko egin diote, guk proposatutako 1.200 eurotik urrun”.

Patronalei gure proposamenak helarazi dizkiegula azaldu du Garbiñe Aranburuk: gutxieneko soldata negoziatu ahal izateko, 35 orduko gehienezko lanaldia eta 20 orduko gutxienekoa gauzatzeko, azpikontratetan subrogazio eskubidea aldarrikatzeko eta soldata arrakalarekin bukatzeko. “Isiltasuna besterik ez dugu jaso haien aldetik”, deitoratu du.

Iñigo Urkullu lehendakariari dagokionez, Euskal Herriko gehiengo sindikal eta sozialarekin biltzeko asmorik ere ez duela izan salatu du: “Ez du gurekin bildu nahi patronalaren lehendakaria bihurtu delako. Lehendakari honek ez gaitu ordezkatzen, langileen aurka aritzen baita”.

Garbiñe Aranburuk adierazitakoaren arabera, “Greba Orokorraren aurka azaldu diren patronalari, erakundeei, alderdi politikoei eta sindikatuei esan nahi diegu, argi eta garbi, borrokak aurrera jarraitzen duela. Oso oker daude pentsatzen badute urtarrilaren 30ekoarekin dena amaitzen dela eta ekaitzaren ostean barealdia datorrela. Urtarrilaren 30ekoa indar erakustaldi oso garrantzitsu bat izango da, eta urtarrilaren 31tik aurrera borrokan jarraituko dugu lan, pentsio eta bizitza duinen alde, eraldaketa soziala eta aldaketa politikoa ekarriko dituen prozesu baten alde”.

LABeko idazkari nagusiaren hitzetan, “ilusio gehiagorekin, indar gehiagorekin, gogo gehiagorekin jarraituko dugu borroka sektorial hauei guztiei bultzada berri bat emateko eta indarrak batzen jarraituko dugu, langile klasearen batasunaren aldekoa baita gure apustua, instituzioek eta patronalak gure aldarriak aitor dezaten behartu arte”.

Ehundik gora mobilizazio
Agerraldian ostegunean izango diren mobilizazioen berri ere eman dugu. Eguerdian mobilizazio nagusiak izango dira hiriburu eta zenbait eskualdetan. Arratsaldean, berriz, herrietan egingo ditugu protestak. Hemen, zerrenda.

Hau da Bilbon egindako agerraldian Euskal Herriko Eskubide Sozialen Kartako ordezkariok irakurritako oharra

Azken asteetako gertaerek berretsi besterik ez dute egin urtarrilaren 30eko greba orokorra erabat beharrezkoa dela. Batetik, Urkullu lehendakariaren ezezkoa jaso dugu (Chivite lehendakaria ez bezala), Euskal Herriko Eskubide Sozialen Gutuna osatzen dugun erakunde sindikal eta sozialekin biltzeari uko egin baitio, grebak dituen aldarrikapenen inguruan eskumenik ez zuela argudiatuta.

Gezurra da hori, ordea. Izan ere, greba deialdia enpleguaren, pentsioen eta eskubide sozialen arloetan neurri zehatzak hartzera bideratuta dago, eta Eusko Jaurlaritzak eta Nafarroako Gobernuak, biek ala biek, horretarako eskumenak dituzte, hala nola:

• Behin-behinekotasuna ezabatzeko administrazio horietan, behin-behinekotasun tasa Europako buruan baitago, %40era iristeraino.

• Azpikontratatutako enpleguan subrogazio-eskubidea, gutxienez 1.200 euroko soldata eta gehienez 35 orduko lanaldia bermatzeko.

• Gutxieneko pentsioak 1.080 eurora arte osatzeko. Gasteizko eta Iruñeko Legebiltzarren txosten juridikoek aitortzen dituzte eskumen horiek.

• Soldata-arrakalaren aurkako neurriak hartzeko.

• Pobreziaren eta gizarte-bazterketaren aurkako Herri Ekimen Legegilearen edukiak onartzeko, gizarte-prestazioei eta etxebizitza bat eskuratzeko eskubideari buruzko neurriak jorratzen zituena.

• Zerga-politika iraultzeko, zerga-iruzurra desagerrarazteko eta errenta handiei, enpresei eta kapitalari zergak nabarmen handitzeko.

• Lan-harremanen esparru propio baten alde lan egiteko, lan- eta gizarte-legediari buruzko erabakiak Euskal Herrian hartzeko.

Era berean, espainiar Estatuko Gobernuak, PSOE eta Unidos Podemosen arteko akordio programatikoaren edukiari jarraituz, pentsioei eragiten dieten neurri batzuk hartu ditu: 2020an %0,9ko igoera gauzatu du, bai, baina indarrean sartu du erretiro-adinaren atzerapena eta 2011ko erreforman adostutako pentsioen kalkulu-aldia ere. Lanbidearteko gutxieneko soldatari dagokionez, patronalari beto-eskubidea eman dio, eta ondorioz, 950 euroan finkatu dute gutxieneko soldata, 1.000 euroan finkatuko zutela iragarri bazuten ere.

Neurri horiek ez diete erantzuten greba orokorraren eskaerei, eta gobernatzeko modu bat adierazten dute, non elkarrizketa soziala edo Toledoko Ituna bezalako tresnek murrizketak justifikatzeko edo eskubideen berreskurapena geldiarazteko zeregina berreskuratzen duten.

Edozein gobernuren aurrean eta edozein alderdi politiko agintean dela, lan eta gizarte eskubideen aitortzan aurrera egiteko ezinbestekoa da presio eta mobilizazio soziala. Ildo horretan, gutun bat bidali diegu CCOO eta UGT sindikatuei, eta dei egin diegu urtarrilaren 30eko deialdiekin bat egin dezaten, bakoitzak bere espazio eta planteamenduarekin.

Urtarrilaren 30eko greba orokorra oso arrakastatsua izango da. Dagoeneko batzarretan parte hartzea erabaki duten milaka eta milaka langileen berariazko babesa jaso du. Era berean, greba-batzordeak lurralde osoan zabaltzeak eta horietan dozenaka gizarte-erakundek (sindikatuez gain) parte hartzeak mobilizazio-maila handia aurreikusten du.