2026-01-30
Blog Page 543

Berriro ere kaleratzeak Laminaciones Arreguin

admin
-
0
Berriro ere kaleratzeak Laminaciones Arreguin

Celsa Atlantic-Laminaciones Arreguiko zuzendaritzak bere mehatxua bete du eta 8 langile kaleratu ditu. Negoziazioa bertan behera utzi ondoren, Enpresa-Batzordearen azken proposamena baztertu ondoren, zuzendaritzak berriro hartu du kaleratzeak, inposizioak, jazarpena eta zigorraren bidea, 2016an utzi zuena, eta 8 lankide kalean utzi ditu. Honen aurrean, Enpresa-Batzordeak kaleratzeok baztertzen ditu, kaleratuak berriro lanera exijitzen du eta mobilizazio eta ekimen berriak iragartzen ditu enplegua eta Gasteiz eta Urbinako lantegien etorkizunaren alde.

Hauxe da langileen oharra, gaurko lanuzteen harira osatutakoa:

Urtarrilaren amaieran enpresak negoziazioak amaitutzat emon ondoren eta ziurgabetasunezko aste batzuen ondoren, zeintzuetan langile gehienak mobilizazioak egin dituzten eta Enpresa-Batzordeak berak azken proposamen bat aurkeztu zuen neurri alternatiboak adosteko, Zuzendaritzak bere mehatxua bete du, 8 langile kaleratuz.

Negoziazioa bertan behera utzi zuen boluntario aurkeztu ziren bi lankideren lekualdatzea zergatik baztertu zuen justifikatu gabe, 58 urtetik gorakoentzako inolako proposamenik zergatik egin ez zuten argitu gabe, euren arabera zegoen gehiegizko eskulanari aurre egiteko kontratuak eteteko ze eragozpen legal zegoen aztertu gabe, baina 40 pertsonetan murriztu zena neurri traumatikorik hartu gabe. Danbatekoa eman zuten nahikoa doitua zegoen langile-taldearentzat “doikuntza” areagotuta, edozein ez egoteren aurrean gelditu edo produkzioa geldotzera ohituta zegoen.

Amore eman nahi izan ez zuten lantegientzako aldebakartasuna, inposizioa, kaleratzeak eta zigorrekin datoz berriro. 8 lankide kalean utziko dituzte, EEE bidez kaleratze kolektibo bat egin nahi ez dutelako, epaitegietatik beste jipoi bat ez jasotzeko konfidantzan. Ez delako lehen aldia. Izan ere, langile hauek birritan izan dira kaleratuak honezkero, 2012 eta 2015ean. Are gehiago, kaleratu guztiak dira LAB eta ELA sindikatuetako afiliatuak, 2012ko greba mugagabean parte hartu zuten eta egun egiten aritu garen lanuzte eta mobilizazioetan parte hartu dute. Hau gutxi balitz, 50 eta 55 urte artean dituzte eta batzuk epe luzeko baja medikuan daude, eta honek, zailago egiten du lan-merkatuan berriro sartzea. Horregatik, ezin dugu beste ondoriorik atera: enpresa berriro itzuli da jazarpena, diskriminazioa eta zigorraren bidera.

Gogoratu nahi dugu 2012an gatazka hasi zenean 356 langile ginela eta gaur egun 95 soilik geratzen garelako. Horregatik, gaur eta orain adierazi nahi dugu alarma egoeran gaudela. Lan-talde txikiegiarekin, politika erasokorra duen Zuzendaritzarekin, lantegi hauentzako edozein alternatiba produktibo ukatzen duen Taldearekin, Laminaciones Arregui ixteko arriskuan dago epe ertainean. Ez da soilik 8 langile kaleratu dituztela. Kontua da ez dutela etorkizuneko proiekturik lantegi hauentzat, ez bideragarritasun planik, ez inbertsiorik, ez produkzioaren dibertsifikaziorik…

Baina ez langileok ez Enpresa-Batzordea ez gaude amore emateko prest. Kaleratze hauen guztiz kontra gaude, eta bitarteko guztiekin, juridikoak barne, borrokan egiteko prest gure lankideak berronar ditzaten. Honela, Enpresa-Batzordeak lanuzte eta mobilizazio berriak planteatzen ditu datorren astetik aurrera. Gainera, martxoaren 3ko mobilizazioetan parte hartuko dugu, gure hiriko borroken data garrantzitsuan, gure aldarrikapenen berri emateko.

Gainera, datorren asteazkenean Eusko Jaurlaritzako Industria Sailarekin bilera egingo dugu, enpresak eraman nahi gaituen enplegu suntsiketa eta industria-eraispena eragozteko bere inplikazioa eskatzeko. Helburu berdinarekin beste instituzio eta alderdi politikoetara ere joko dugu.

Azkenik, gure konpromisoa adierazi nahi dugu. Enpresa-Batzordeak eta langileok gure prestasuna adierazi nahi dugu enpresarekin eta instituzioekin bide bateratua egiteko Laminaciones Arregui salbatzea helburu. Bide hau negoziazioaren bidez egin beharko genuke, eta enpleguan, borondatezko izaeran eta etorkizuneko bermeetan egon behar du oinarrituta. Finean, enplegua eta etorkizuna, horren egin dugu borrokan, jarraitzen dugu borrokan eta jarraituko dugu borrokan, eta dei egiten diegu gasteiztarrei gurekin mobilizatu daitezen.
 

 

 

Bizkaiko Etxez Etxeko Laguntza Zerbitzuko langileek kaleak hartu dituzte hitzarmenaren defentsan

admin
-
0
Bizkaiko Etxez Etxeko Laguntza Zerbitzuko langileek kaleak hartu dituzte hitzarmenaren defentsan

LAB, ELA eta UGT sindikatuok greba egunak deitu ditugu otsailaren 27rako eta martxoaren 4 eta 5erako, Bizkaiko Etxez Etxeko Laguntza zerbitzuan. Mobilizazio hauen helburuan hitzarmen berri bat lortzea da. Ia hiru urte igaro dira sektoreko langileak mobilizatzen hasi zirenetik. Denbora honetan 40 greba egun baino gehiago egin dituzte, baina patronalek eta udalek immobilismoan jarraitzen dute. Egoera horren aurrean, langileek mobilizazio gehiago antolatu beste aukerarik ez dutela izan azpimarratu dute. Hala, langileek Bilboko kaleak hartu dituzte gaur, greben lehen egunean, eta Bilboko Udala interpelatu dute osoko bilkura egin bitartean.

Langileek urteak daramatzate Etxez Etxeko Laguntza Zerbitzuaren kalitatean ematen ari den galera salatzen, bai asistentzia arloan baita lan baldintzen arloan ere. Kontuan hartu behar da, gainera, dependentzia egoeran dauden pertsonen kopurua etengabeko hazkundean dagoela jendartean eta gurea ezinbesteko zerbitzua dela.

Asistentzia arloari dagokionez, handitzen doan kolektibo baten babes maila gutxitzen ari da. Prestazio orduak jaisten dira, egin beharreko lanak handitzen diren heinean, zerbitzuaren kalitatean galera emanez. Lan arloari dagokionez, 8 urte baino gehiago daramatzate soldata izozketa eta lan eskubideen galerarekin. Enpleguaren behin-behineko tasa handia da, eta lanaldi partzialak ugariak. Malgutasuna gero eta handiagoa denez, lanaren eta norberaren bizitzen arteko kontziliazioa oso zaila bihurtu da. Labur esateko, lan-baldintzak prekarioak dira.

Arduradunak seinalatzeko unean, argi utzi dute ez dutela beste alde batera begiratuko. Bizkaiko udaletako gobernu taldeak, mozioen erabilera partidista eta gerora hauen ez betetzearekin, eta patronalak, negoziaziorako gogo ezarekin, dira gatazka honen arduradun zuzenak. Lehenengoek, zerbitzuaren titular moduan eta bigarrenek, zerbitzuaren prestatzaile moduan, ezin dute euren ardura albo batean uzten jarraitu.

Martxoaren 8a gertu dago, eta instituzioek berdintasuna aldarrikatzen duten urteroko edukirik gabeko intentzio deklarazioak egiten hasi dira. Etxez Etxeko Laguntza Zerbitzua bezalako sektoreekin berdintasun erreal batera jotzeko benetako neurriak hartzeko aukerak zabaltzen dira. Emakumeen lan baldintzetan eta ondorioz, bizi baldintzetan, hobekuntzak sustatuz.

Gatazka honen atzean, emakumeok zapaltzen dituen sistema oso bat dago. Sistemak emakumeok zaintza lanak ezeren truke egitera behartzen ditu, bere biziraupenerako. Horregatik, lan merkatuan eta kasu honetan etxez etxeko laguntzan, uzten diete lekua bigarren mailakoa da. Zaintza lanak inolako aitortzarik gabe eta oso modu prekarioan ematen dira.

Greba egunez gain, hainbat mobilizazio ere egingo dira. Gaur, Bilboko Udala interpelatu dute osoko bilkura egin bitartean, kanpoaldean kontzentratuz. Martxoaren 4 eta 5ean, Arriagaren aurrean egun osoko elkarretaratzea egingo dute, sektorearen egoeraz informatzeko eta programazio anitza aurrera eramateko. Honetaz gain, langile guztiak animatzen dituzte mugimendu feministak Martxoaren 8aren testuinguruan antolatutako mobilizazioekin bat egin dezaten.
 

 

 

Nafarroako Parlamentuaren aurrean mobilizatu gara, aurrekontu duin eta sozialen defentsan

admin
-
0
Nafarroako Parlamentuaren aurrean mobilizatu gara, aurrekontu duin eta sozialen defentsan

Euskal Herriko Eskubide Sozialen Kartak deituta, Nafarroako Parlamentuaren aurrean mobilizatu gara, aurrekontu duinen eta sozialen alde. 2020. urteko aurrekontuek ez dituzte bermatzen gizartearen gehiengoak aldarrikatzen dituen lan, pentsio eta bizitza duinak, eta horregatik eraman dugu gure salaketa Parlamentuaren atarira.

Eskubide Sozialen Kartak aurkeztu zuen Herri Ekimen Legegilean jasotzen denez, lege bidez osatu behar da gutxiengo pentsioa 1.080 euro arte, kalitateko enplegua lortu behar da, eta Errenta Bermatua eta etxebizitzarako eskubidea babestu behar dira. Lan-arloan, soldata-arrakala, diskriminazioa eta indarkeria matxista amaituko dituen lege bat onartu behar da. Gobernuak babestu behar du hezkuntzan eta osasunean egindako inbertsioak Europako parametroetan koka daitezen, eta babestu behar ditu Nafarroan 1.200 eurotako gutxieneko soldataren eta 35 orduko lanaldiaren aldarrikapena. Hauek dira LABek aipatu Ekonomia eta Gizarte Kontseiluaren esparruan egindako proposamenetako batzuk, Euskal Herriko Eskubide Sozialen Kartan mugimendu sozial, sindikal eta pentsionisten artean adostutakoak Greba Orokorrari begira.

Horietako bakar bat ere ez da aintzat hartu. Horrela, agerian geratu da Nafarroako Gobernuak borondate politikorik ez daukala gizartearen gehiengoaren alde gobernatzeko, Nafarroako langileriaren premiak gaindi daitezen, zeinak lan, pentsio eta bizitza duinak eskatzen dituen.

Egiaztatu da eta agerian geratu da aldarrikapen hauekhartu duten indarra, milaka pertsonak, urtarrilak 30 zituenean, kalera atera zirelako haiekin bat eginez, eta gainera oso sostengu handia izan zutelako. Hala, LABen iritziz, ezinbestekoa da borrokari eustea grebaren aldarrikapen horiek eta gainerakoek Dekretu eta Lege bidez gauza daitezen.
 

 

 

Bat egiten dugu Donostian erraustegiaren aurka larunbatean izango den manifestazioarekin

admin
-
0
Bat egiten dugu Donostian erraustegiaren aurka larunbatean izango den manifestazioarekin

LABeko langileok arrazoiak soberan ditugu deialdiari atxikimendua emateko: langileon osasunagatik, lan eta bizi duinaren alde, gure ekonomia eta klimarengatik, bat egiten dugu erraustegia gelditzeko otsailaren 29an egingo den manifestazioarekin. 17:00etan abiatuko da protesta, Easo plazatik.

Ia bi hamarkada igaro dira hondakinen kudeaketa ereduen inguruko eztabaidak Gipuzkoan bizia hartu zuenetik. Zabortegiek gainezka egin eta sistema honen arazo larria agerian geratu zenean botere ekonomiko eta politikoek ez zuten zalantza egin errausketaren hautua egiteko. Zaldibar eta Zubietan gertatzen ari denarekin, auziak gaurkotasun handiz bizirik jarraitzen du: hondakinen kudeaketak aterabide egokirik gabe jarraitzen baitu, 2 langile desagerturik jarraitzen dute, lan eta bizi baldintzak kutsatu eta prekarizatuz jarraitzen dute. Gure elkartasun osoa Joaquin Beltran eta Alberto Sololuzeren senide eta bertako bizilagun guztiei. Erantzukizuna eta neurriak orain!

Zaldibarreko zabortegiaren antzera, Zubietan eraikitzen ari diren erraustegia hasieratik irregulartasunez beteta egon da: hondakinen kudeaketa, instituzio publikoen eskumena, geure osasuna, lan eta bizi baldintzak, pribatizatu eta zaborra negozio aukera paregabe bilakatu baitute. Politika zuritzaileenek ekonomia zirkulartzat saldu nahi diguten erraustegia, trantsizio ekologiko baten testuinguruan energia sorrerarako aukerarik garestiena dela argi dugu, eta enplegu sorrerarako aldiz, eta beste bilketa sistemekin alderatuta, aukerarik ahulena. Hondakinen arazoari soluzio faltsua dela esaten jarraituko dugu, ekoizpen eta kontsumo sistema kapitalista auzitan jarri gabe berau elikatzen duen aukera delako, larrialdi ekologikoa areagotuz, Kapitala eta Bizitzaren arteko talka honetan, langileon lan eta bizi baldintzak mehatxatuz eta gure etorkizuna errez.

Gaur, hondakinen kudeaketa penagarria ezkutatu ezin den errealitatea da, eta larrialdi ekologikoa horren ondorio zuzena. Langileok ordea, badugu zeresana: lan eta bizi baldintza duinak exijitzen ditugu, geure osasuna eta ingurunearena erdigunean jartzeko; erabakietan parte hartzeko eskubidea aldarrikatzen dugu, zuhurtzia printzipioaz, kontsumoaren murrizketan, berrerabilpen eta berziklapenean oinarritzen den hondakinen kudeaketa publiko, garden eta iraunkorra den alternatiba justu baten alde egiteko.

 

 

 

Madrilera eraman ditugu agenda sozialaren eta erabakitzeko eskubidearen aldeko aldarrikapenak

admin
-
0
Madrilera eraman ditugu agenda sozialaren eta erabakitzeko eskubidearen aldeko aldarrikapenak


Euskal Herria, Galiza eta Kataluniako LAB, ELA, CIG eta CSC sindikatuetako idazkari nagusiak BNG, EH Bildu, CUP, ERC, JxC eta EAJ talde parlamentarioetako ordezkariekin bildu dira Madrilgo Diputatuen Kongresuan, sindikatuok Bilbon otsailaren 5ean aurkeztutako adierazpenaren izaerari segida emateko. Hain zuzen ere, hiru nazioetan eta Espainiako Estatuan bizi den egoera laboral, sozial eta politikoaren harira, Madrilen osatu den gobernu berriaren aurrean gure aldarrikapenen berri eman diegu, agenda soziala indartu eta erabakitzeko eskubidea aitortzearen ildotik. LABeko idazkari nagusi Garbiñe Aranbururen hitzetan, "garrantzitsua da jarrera komun bat ezartzea Gobernuaren aurrean, baina gure indar nagusia artikulatu ditzakegun borroketan datza. Mobilizazio sozialarekin jarraitu behar dugu, bakoitza gure herrialdean; eraldaketa soziala ekarriko duen eta demokrazian eta burujabetzan aurrera egitea ahalbidetuko duen prozesu baten alde".  


EPE honetako emaitzak ikertzeko Osakidetzak Oviedoko Unibertsitateari eskatu zion txostenak ez ditu zalantzan jartzen LABek egindako ikerketa estatistikoak, ezta salaturiko irregulartasunak ere. Ikerketa honi buruz LABek egin duen azterketaren harira, filtrazioez zuzenean ez hitz egin arren ikerketan, egilearen hitzetan hori ez zelako helburua, argi gelditzen da behin eta berriro salatuak izan diren hainbat kategoriatan normalak ez diren emaitzak bai agertzen direla.

Adibide moduan, esan dezakegu 36 azterketetan (30 kategoriari dagozkionak), puntuazioen banaketaren indizea ez dela zifra normaletara heltzen. Bestaldetik, 17 kategoriatan izangaien zentroen araberako banaketa ez da normala. Azkenik, 20 kategoriatan ez dago korrelazio egokirik lehenengo eta bigarren azterketen emaitzen artean.

Datu hauek guztiek gure salaketak indartu baino ez dituzte egiten. Horregatik, Osakidetzak ez duela ikerketa bururaino eraman nahi salatzen jarraitu behar dugu; gure aburuz, eskandalua ahalik eta lasterren eta ahalik eta ondorio txikienekin estali nahi dutelako.

Hau dela eta, Osakidetza eta Osasun Sailaren gardentasun eza salatu nahi dugu eta baita exijitu ere ikerketa bururaino eraman dezatela, argitu ahal izateko non egin ziren filtrazioak, nork egin zituen eta nor atera zen onuradun. Bestaldetik, martxan ipini behar den EPE sistema berria adosteko negoziazioa irekitzea funtsezkoa jotzen dugu.
 

 

 

Zorroza Gestión de Residuos enpresako langileek pairatzen duten prekarietatea salatu dugu

admin
-
0
Zorroza Gestión de Residuos enpresako langileek pairatzen duten prekarietatea salatu dugu

Atzo, otsailaren 25ean, bere lanpostuan langile bat hil zela deitoratu behar izan genuen berriro. Prekarietatea eta horri lotutako lan-istripu hilgarriak oso gogor ari dira kolpatzen Aiaraldea zehazki, eta Euskal Herria oro har. Dagoeneko 14 heriotza izan dira 2020an Euskal Herrian, eta 2 pertsona desagertuta daude Zaldibarren.

Duela egun gutxi Laudioko langile baten heriotza salatu genuen, eta orain Aiaraldean gertatutako beste lan istripu hilgarri baten albistea iristen zaigu; zehazki, Murgan (Aiara) kokatuta dagoen Zorroza Gestión de Residuos enpresan.

Heriotza honek agerian utzi ditu enpresa honetako langileen lan-baldintzak:

– Eguneko 10 orduko nahitaezko lanaldiak.
– Enpresak ez dizkie langileei beharrezkoak diren norbera babesteko ekipamendu guztiak ematen.
– Soldatak baxuak dira.
– Lan-erritmoak oso altuak dira.
– Ez dago fitxatzeko sistemarik.
– Instalazioen garbitasuna desegokia da.
– Langileek ez dute inolako prestakuntzarik jasotzen laneko arriskuen prebentzioaren arloan.
– Enpresako gerentziaren partetik hitzezko tratu txar jarraituak.
– Eraso fisikoko gertakari bat.

LAB sindikatutik, bertako langileek pairatzen duen babesgabetasun egoera hau publikoki salatzera behartuta ikusten dugu gure burua, eta ezinbestekoa iruditzen zaigu erakunde publikoak interpelatzea, neurri faltagatik halakorik berriro gerta ez dadin. Beharrezkoa da erakundeek zaintza, kontrol eta jarraipen neurri eraginkorrak ezartzea.

Zoritxarrez, prekarietatea Aiaraldea eskualdeari indar handiagoz kolpatzen dion epidemia bat da. Horren adibide dira Zorroza gestion de residuos inguratzen duten enpresak; Tubos Mecánicos Norte enpresa otsailaren 10etik greba mugagabean dago, Garobel enpresako langileak etorkizuna arriskuan dute, etab.

Euskal Herrian aurten gertatutako istripu hilgarrien kopurua neurrigabea da, inoiz baino indar handiagoz borrokatu behar dugun sarraski bat, fabriketan bertan eta era irmo batean. Horregatik guztiagatik, erakundeei exijitzen diegu lan-prekarietatearen aurrean benetako eta premiazko neurriak har ditzatela, eta Aiaraldeko eskualdeari eskatzen diogu ez dezala zalantzarik izan sarraski honi aurre egiterako orduan, gaurko deitutako mobilizazioetan parte hartuz:

-12:00etan euskal gehiengo sindikalaren kontzentrazioa egin dugu Murgan, Zorroza gestion de residuos enpresaren aurrean.

-19:00etan manifestazioa izango da Amurrioko Herriko plazatik, Aiaraldeko greba batzordeak deituta.
 

 

 

Nafarroako Gobernuak ez du asmo politikorik Nafarroa lan, pentsio eta bizitza duinen aldeko aurrekontuez hornitu dadin

admin
-
0
Nafarroako Gobernuak ez du asmo politikorik Nafarroa lan, pentsio eta bizitza duinen aldeko aurrekontuez hornitu dadin

LAB sindikatuaren iritziz, agerian geratu da Nafarroako Gobernuak borondate politikorik ez daukala gizartearen gehiengoaren alde gobernatzeko, Nafarroako langileriaren premiak gaindi daitezen, zeinak lan, pentsio eta bizitza duinak eskatzen dituen. Euskal Herriko Eskubide Sozialen Kartak deituta, bihar Nafarroako Parlamentuaren aurrean elkarretaratzea egingo dugu, 10:00etan, aurrekontu duinen eta sozialen alde.

2019ko abenduan, Nafarroako Gobernuak aurkeztu zigun Nafarroako Ekonomia eta Gizarte Kontseiluan Nafarroako 2020ko aurrekontuen aurreproiektua. Gure iritzian, aipatu aurreproiektuak ez zien erantzuten nafar gehienen beharrei eta interesei.

Gure mintzaldia argia eta irmoa izan zen: Nafarroako Gobernuari eskatu genion egin zitzan lanaren, pentsioen eta bizitza duinen aldeko aurrekontuak.

Hala ere, berriro, Nafarroako Gobernuak, PSNz, Geroa Baiz eta Podemosez osatua, gizartearen gehiengoak dituen aldarrikapenak ez ditu aintzat hartzen. Zer dauka CEN patronalak haren aldarrikapenak aintzat hartuak izan daitezen, eta ez, ordea, sindikatuenak? Horrela jokatuz, Gobernuak ergeltzat hartzen gaitu, Nafarroako gehiengoaren alde gobernatu baino, enpresaburuentzat gobernatzen baitu.

Nafarroako zerga-zama Europar Batasunaren apalenetakoa da (BPGren %30,4a, aldiz, EBrena %39koa da) eta neurriz gaineko ahalegina langileriak jasan ohi du (lanaren gaineko errentak diru-bilketa osoaren %35ekoak dira, aldiz, sozietateen gaineko zerga %5,5ekoa).

Enpresa-ondarearen gaineko zerga ezabatu izana egungo Nafarroako Gobernuak darabilen zerga- politika mota horren adibide garbia da. Enpresarien neurrira egindako zerga-sistema batez ari gara; ihesbide arriskutsua dugu, hari esker aberastasun handiek ekidin dezaketelako zergen ordainketa. Zerga-sistema erakargarri eta lehiakor baten gezurrezko amuzkiak ez du beste helbururik: publikoa dena ahalik eta adierazpen gutxienera murriztea, eta ekonomiaren funtzionamendua oso-osorik merkatuaren esku eta kapital pribatuaren logikaren esku uztea.

Aurrekontuek ez diote alternatibarik ekartzen hesitze kapitalista hirukoitzari.

Kapitalismoak aurrekontuetan ematen den laztasuna gotortzeko ezarri den hesitze hirukoitzaren adierazgarriak dira defizit-muga, zorraren helburua eta gastu araua. LAB sindikatuaren iritziz, zorroztasun honi aurre egiteko, oinarrizkoa deritzagu alternatibak sortzeari; uste dugu badela bidea hura erdiesteko, adibidez, bestelako zerga sistema baten alde egitea, non lanaren, kapitalaren eta enpresa-irabazien errentek egiten dituzten zerga-ahaleginek oreka zuzena ekarriko duten. Bestalde, Nafarroako burujabetza aldarrikatzen dugu eskuduntzak izan ditzagun eta erabaki ahal izan ditzagun gure bizitzeko eta lan egiteko baldintzak hobetuko dituzten neurriak.

2020. urteko aurrekontuek ez dituzte bermatzen gizartearen gehiengoak aldarrikatzen dituen lana, pentsioa eta bizitza duinak.

Eskubide Sozialen Kartak aurkeztu zuen Herri Ekimen Legegilean jasotzen denez, lege bidez osatu behar da gutxiengo pentsioa 1.080 euro arte, kalitateko enplegua lortu behar da, eta Errenta Bermatua eta etxebizitzarako eskubidea babestu behar dira. Lan-arloan, soldata-arrakala, diskriminazioa eta indarkeria matxista amaituko dituen lege bat onartu behar da. Gobernuak babestu behar du hezkuntzan eta osasunean egindako inbertsioak Europako parametroetan koka daitezen, eta babestu behar ditu Nafarroan 1.200 eurotako gutxieneko soldataren eta 35 orduko lanaldiaren aldarrikapena. Hauek dira LABek aipatu Ekonomia eta Gizarte Kontseiluaren esparruan egindako proposamenetako batzuk, Euskal Herriko Eskubide Sozialen Kartan mugimendu sozial, sindikal eta pentsionisten artean adostutakoak Greba Orokorrari begira.

Horietako bakar bat ere ez da aintzat hartu. Horrela, agerian geratu da Nafarroako Gobernuak borondate politikorik ez daukala gizartearen gehiengoaren alde gobernatzeko, Nafarroako langileriaren premiak gaindi daitezen, zeinak lan, pentsio eta bizitza duinak eskatzen dituen.

LABek ez die inoiz garrantzirik kenduko gure borroken eta aldarrikapenen indarrari eta gaitasunari. Duela urte gutxi batzuk 1.200 eurotako gutxiengo soldataren eta 1.080 eurotako gutxiengo pentsioaren aldarrikapenak zokoratutako gaiak ziren, Erregimenaren eta elite ekonomikoaren agendan agertzen ez zirelako. “Aurrekontuetako Akordio” batean txertatu izana 1.200 eurotako gutxiengo soldataren aipamena edota 1.080 eurotako gutxiengo pentsioa aztertzea, sinbolikoa da soilki, ez du irudikatze praktikorik, eta hortaz, eznahikoa da. Ez da guk diogulako; Chivite lehendakariarekin egin bileran egiaztatu genuen egiazko gogorik ez zuela haiei ekiteko, gu guztiok Madrilen mileurismora zigortuz. Baina, era berean, egiaztatu da eta agerian geratu da gure aldarrikapenek hartu duten indarra, milaka pertsonak, urtarrilak 30 zituenean, kalera atera zirelako haiekin bat eginez, eta gainera oso sostengu handia izan zutelako.

Hamaika bider esan dugu hau ez dela LABen kontua bakarrik. Ezinbestekoa da borrokari eustea Grebaren aldarrikapen horiek eta gainerakoek Dekretu eta Lege bidez gauza daitezen.
 

 

 

Fekoor-eko langileen bigarren lanuzte eta mobilizazio eguna etorkizun duinaren alde

admin
-
0
Fekoor-eko langileen bigarren lanuzte eta mobilizazio eguna etorkizun duinaren alde

Gaur ere lanuztea egin dute. Honetaz gain, mobilizazioa egin dute Fekoor-en egoitzatik Bizkaiko Foru Aldundiak Ugaskon duen egoitzaraino egin dute, instituzio hau delako Fekoor-ek ematen dituen zerbitzuen titularra.

Gutxitasun fisikoa edo/eta organikoa duten bizkaitarrei arreta ematen dieten elkarteak biltzen dituen entitatea da Fekoor. Bertako langileek lanuztea egin zuten otsailaren 20an bizi duten egoeraren aurrean eta euren etorkizunaren defentsan, antzeko leku batzutan baino lan-baldintza okerragoak dituztelako.
 

 

 

Gipuzkoako helduen egoitzetako egoiliarren senideekin batera mobilizatu gara Adegiren aurrean

admin
-
0
Gipuzkoako helduen egoitzetako egoiliarren senideekin batera mobilizatu gara Adegiren aurrean

Gipuzkoako helduen egoitzetako egoiliarren senideek mobilizazioa egin dute Donostiako Adegiren egoitzaren aurrean. LABek bat egin du mobilizazioarekin, Gipuzkoako Foru Aldundiak eta patronalek helduen egoitzetako hitzarmena bahitu dutelako.

 

 

 
1...542543544...1,588Page 543 of 1,588

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus