2026-02-05
Blog Page 519

“Badugu aukera” kanpaina abian jarri dugu, berreraikuntza baino, langileen neurrirako eredu aldaketa aldarrikatzeko

admin
-
0
“Badugu aukera” kanpaina abian jarri dugu, berreraikuntza baino, langileen neurrirako eredu aldaketa aldarrikatzeko

Pandemiaren aurreko normaltasun heteropatriarkal eta kapitalistara bueltatzearen aldeko diskurtsoa zabaltzen ari den honetan, Garbiñe Aranburu idazkari nagusiak eta Ekintza Sozialeko kide Edurne Larrañagak bizitza erdigunean izango duen normaltasun berri bat eraikitzeko aukera eta beharra aldarrikatu dute. Hala, “Badugu aukera. Vamos hacia el cambio” leloarekin, kanpaina bat abian jarri dugula jakinarazi dute, trantsizio ekosozialista eta feminista ardatz, helburu hauek lortzeko: lan guztiak aitortzeko eta lan, pentsio eta bizi duinak bermatzeko; zerbitzu publikoak indartzeko; garapen eredu jasangarri bat ahalbidetzeko; zerga politika berri bat ezartzeko, aberastasunaren banaketa bidezkoago bat bermatzeko; eta burujabetza lortzeko.

“Ez dugu indarrean dagoen sistema berreraiki nahi. Sistema hau errotik aldatu nahi dugu, eredu berri bat eraiki nahi dugu”. Garbiñe Aranbururen hitzak dira hauek, “Badugu aukera” kanpaina aurkezteko agerraldian esandakoak.

Hain zuzen ere, LABek kanpaina bat abian jarri du, berreraikuntza baino, langileen neurrirako eredu aldaketa bat aldarrikatzeko. “Irekitzen den garai berri hau zaila izango da langileontzat. Gogorra, baina, kanpainaren leloari jarraituz, aukeraz beteriko garaiak datozela uste dugu. Izan ere, pandemia honek ageriago utzi du egungo sistema kapitalista, heteropatriarkal eta ekozida jasangaitza dela”, azaldu du Garbiñe Aranburuk.

LABeko idazkari nagusiaren hitzetan, “alternatiba sistema hau errotik aldatzea da. Sistema hau sostengatzen jarraitu nahi duten alderdi sistemikoek, EAJ buru, eta patronalak hitzetik hortzera darabilte berreraikuntza ekonomiko eta sozialaren beharra. Horretarako kolaboraziorako deia egiten digute, kolaborazio horretarako joko zelaia jartzen digute eta guk badakigu arbitroa erosia dutela; beraz, langileok baldintza horietan ezin dugula partidarik irabazi. Eta guk oso argi esaten dugu: ez diogu eztabaidari beldurrik, baditugu proposamenak langileon bizi baldintzak hobetzeko, baina gurekin ez kontatu sistema berreraikitzeko, gurekin ez kontatu egungo sistemari eustea helburu duten eztabaida markoetan aritzeko”.

Bost ardatz
Langileak babestu behar dira eta ez kapitala. Gakoa etorkizuna eraikitzeko bideari ematen diogun norabidean dago. Bizitza erdigunean jarriko duen eredu berri baterako trantsizioari ekin behar zaio, trantsizio ekosozialista eta feministari. Horretarako, 5 ardatz nagusi ditu LABen proposamenak:

1. Lan guztiak aitortu eta lan, pentsio eta bizi duinak bermatu:

-Urtarrileko Greba Orokorraren ondotik interpelazio bikoitza egin genuen, instituzioei eta patronalari prekarizazioari aurre egiteko neurri zehatzak eskatuz. LABentzat aldarrikapen horiek indarrean jarraitzen dute.

-Enplegu suntsiketarik ez. ABEEE-etako soldatak osagarritu %100era eta enplegu bermea. 

-Behin behinekotasuna oso altua da, kontratu gehienak iruzurrezkoak dira. Langile horiek, gazteak eta emakumeak nagusiki, erabili eta bota egiten diren langileak bilakatu dira. Lan munduan ematen den bereizketa honekin amaitu behar da.

-Oinarrizkoak diren zerbitzuetako langileen lan baldintzak duindu behar dira. Gehienak emakumeak dira, zerbitzu hauetako hainbat pribatizatuak eta merkantilizatuak izan dira. 1.200 eurotik beherako soldatak dituzte askok eta askok edota lanaldi partzial inposatuak dituzte.

2. Zerbitzu publikoak indartu: 

-Zerbitzu publikoak garatzeko publifikazio plan bat behar da, eraldaketa sakon bat behar da, oinarrian hiritarren arreta jarri eta ikuspegi merkantilista alboratuko duen eredua behar dugu.

-Zerbitzu publikoak indartzeko inbertsio handiagoa egin behar da, eta eredu berri baten bidean ezinbestekoa izango da langile publikoen lan baldintzak hobetzea, langileak egonkortzea, ratioak jaistea eta langile publikoen kontratazioak areagotzea. 

-Zaintza sistema publikoa eraikitzeko garaia da. 

3. Garapen eredu jasangarria: 

-Aberastasunaren kontzentrazio eta pilaketa helburu duen produkzio eta kontsumo eredua aldatu egin behar dira. Bizitza sostengatzeko beharrezkoa den horretara eta natura suntsituko ez duen eredura bideratu behar da ekonomia. Herri batean sortzen den aberastasuna neurtzeko ekoizten denaren balio soziala zein ingurugiroan duen eragina kontuan hartu behar dira, baita lan produktibo eta erreproduktiboa ere, sistema honek emakumeokiko duen zor patriarkala kitatuz.

4. Zerga politika berria, aberastasunaren banaketa bidezkoago bat bermatzeko:

-Ezin da lan eta bizitza duinik lortu aberastasuna banatzen ez bada. Zerga politikak sakoneko aldaketa bat eskatzen du. Zentzu honetan, proposamena bidali dieguforu erakundeei.

5. Burujabetza:

-Pandemia honek erakutsi digu zein garrantzitsua den Estatu bat izatea. Horregatik jarraitzen dugu erabateko burujabetza eta Estatu propio bat aldarrikatzen.

Kapitala beharrean, langileria babesteko neurriak eskatu dizkiogu Nafarroako Gobernuari

admin
-
0
Kapitala beharrean, langileria babesteko neurriak eskatu dizkiogu Nafarroako Gobernuari

Nafarroako Kontseilu Ekonomiko eta Sozialaren bilera egin da, eta LABeko Imanol Karrerak bileran parte hartu du. Langileen interesak defendatuko dituzten neurriak eskatu ditu bertan. Bileraren amaieran, Karrerak nabarmendu du gaur egungo sistema kapitalista gainditzeko aukera dugula, “gure bizitzak erdigunean jarriko dituen beste sistema baterantz urratsak emanez. Horretarako antolatzea eta lantokietan zein kalean mobilizatzea da gure indarra”.

Enplegua, lan-baldintza duinak, lan osasuna eta eskubide sozialak defendatzea aldarrikatu du Karrerak bileran, baita erdigunean pertsonak eta arlo publikoa izango dituen eredu berri bateranzko trantsizioa ere. Bidezko fiskalitatea ere eskatu du.

LABeko ordezkariaren hitzetan, “Nafarroako Gobernua da orain hitzetatik ekintzetara igaro behar duena. Ezin da esan inor atzean utziko ez denik beti aurrera doazenen aldeko neurriak hartzen badituzu, orain arte gobernuak egin duen bezala”.

Ez dugu babestu diru publikoarekin ordaindutako itunpeko ikastetxeetako langileak kaleratzeko akordiorik

admin
-
0

LABek ez du sinatu Eusko Jaurlaritzako Hezkuntza Sailak, itunpeko ikastetxeen sareetako langileen birkokatzea ezinezkoa denean, legezko kalte ordaina bere gain hartzerik. Hezkuntza Sailak, urtarrilean eta otsailean, itunpeko ikastetxeen sareekin eta sindikatuekin bi akordio ezberdin sinatu zituen.

Hezkuntza Sailak, jaitsiera demografikoaren aurrean, langileen birkokapena eta errelebu-kontratuaren finantziazioa laguntzeko akordio bana sinatu zituen patronal eta sindikatu ezberdinekin. LABek, hilabeteetako negoziazioen ondoren, ikastolen patronalekin eta Hezkuntza Sailarekin otsailean sinatu genuen akordioan, “birkokatzea ezinezkoa denean legezko kalte ordaina administrazioak bere gain ez hartzea” ezinbesteko baldintzatzat jarri zuen. Akordio horren baitan, hainbat langileri errelebo-kontratuen bidez erretiroa aurreratzeko bidea ireki zitzaien.

Gizarte ekimeneko patronalek, ELA, CCOO, STEILAS eta UGT sindikatuek eta Hezkuntza Sailak sinaturiko akordioak argi dio langileen birkokapena ezinezkoa den kasuetan (sinatzaileek kudeatuko duten jarraipen batzorde batek ikuskatuta) langileen kaleratzeen kalte-ordaina diru publikoz finantzatuko dela. LABentzat onartezina da hau, gure ikuskeran, langileak birkokatzea helburu duen akordio batek, ezin dituelako kaleratzeak aurreikusi, eta are gutxiago diru publikoarekin finantzatu.

Enplegua mantentzeko, itunpeko ikastetxeen sareetan langileen birkokapen prozesuak ezinbestekoak direla defendatu ditu LABek. Hala, ikastoletako patronalekin 2018-2019 ikasturtean sinaturiko lan hitzarmenean jasotzen zen ikastoletan kaleratzeak ekiditeko birkokapen prozedura, soberakin eta beharrak identifikatu eta zehaztuz gauzatzen dena.

Gizarte ekimenean bide beretik joan gara, eta LABek salatu egin zuen greba bukatzeko akordioak ez zuela jasotzen lanpostuak mantentzeko eta langileak birkokatzeko prozedura zehatza ezta konpromisoa ere, lan-poltsa bat osatzeko akordioa sinatu zuten soilik. Gaur gaurkoz, lan-poltsa oraingoz ez da sortu.

Kristau Eskolak eta AICE-IZEAk ez dute inolako borondaterik langileak birkokatzeko. Are gutxiago langile bat kaleratzea dohainik aterako zaienean Eusko Jaurlaritza eta sindikatu sinatzaileei esker. Gaur egunera arte bezalaxe, diru publikoarekin nahi dituzten langileak kontratatzen jarraitu nahi dute eta gustuko ez dituztenak diru publikoa baliatuta kaleratu; diru publikoarekin eduki behar den berdintasun printzipioa urratuz.

Orain dela 3 urte, gizarte ekimeneko sindikatu guztiek “Zentroak krisian” akordioa salatu genuen, kaleratzeak diru publikoarekin finantzatzen zituelako. Orain aldiz, kaleratzeak diru-publikoarekin finantzatzea sinatu dute beste sindikatuek.

Alestisen sinatutako ABEEEren aurka gaude

admin
-
0
LAB sindikatuak, Gasteizko enpresa-batzordeko gehiengoarekin batera (LAB, ELA eta CGTk osatua), Alestis hegazkingintzako enpresak ezarritako ABEEE salatu nahi du. Enpresa hau TIR 1 lehen mailako hornitzaile azpikontratatua da Airbus, Embraer eta Boeing enpresentzat. Bere akzioen %75,95 Aciturri enpresa-taldearen esku dago eta %24,05 SEPI industria arloko entitate publikoaren esku.

Arrazoi produktiboengatik egindako suspentsio ABEEE da eta lau hilabeteko iraupena izango du, 2020ko ekainaren 1etik 2020ko irailaren 9ra. 1.050 langileri eragingo die, Espainiako estatuan dauden 1.376en %60ari. Alestisek Getafe, Cadiz, Sevilla eta Gasteizen ditu lantegiak. ABEEEk 57 egunetako eragina izango du gehienez lan-esku zuzena osatzen duten langileen %80arentzat (872 pertsona), zeharkako lan-eskuaren %66arentzat eta egiturako lan-eskuarentzat, 180 langile inguruk osatua.

Hamabost egunean behinekoa izango den txandakako ABEEEak ez du planteatzen irauten duen bitartean langile gehienentzat langabezia prestazioak osagarritzea, zeharkako lan-eskuko 60 langilerentzat kenduta, 4 hilabete osoak egongo direnak eta hilean 500 euro linealetako osagarria izango dutenak. ABEEE honen osagarri eta konpentsazioak ez dira nahikoak izango, eragindako langileei aparteko pagen eta opor-egunen %25 soilik sortuko dituztelarik. Eta larriena dena, behin amaitu ondoren ez du inolako enplegu bermerik, ziurgabetasuna eta kezka eraginez enpresa-taldeak negozioa, lantegiak eta etorkizunaren geroaren inguruan egiten duen benetako apustuaren inguruan.

Era berean, gogoratu beharrekoa da ABEEE hau ia bere osotasunean ordainduko dutela langileek, diru publikoak ordainduko duen euren langabeziarekin, eta baita enpresa hau estatuaren jabetzakoa ere badela, SEPIren bidez. Gainera, nabarmentzekoa da administrazioak duen erantzukizuna sektore estrategiko honi eta estatu osoan sortzen dituen zuzeneko eta zeharkako enpleguari eusterako orduan. Hortaz, estatu mailako ente honen inplikazioa exijitzen dugu sektorearen etorkizunean eta honi lotutako enpleguetan. Aipatu exijentzia Eusko Jaurlaritzari ere egiten diogu, industria politikan dituen eskumenak kontutan izanda.

Beste alde batetik, ABEEE hau nola negoziatu den ere salatu nahi dugu. Estatu mailako negoziazioa inposatu dute enpresak berak eta CCOO eta UGT sindikatuek. Gainera, ez ditu kontutan izan lan-zentro ezberdinetako errealitatea eta berezitasunak, kasu honetan Gasteizkoak, ezta bere ordezkaritza sozialak (enpresa-batzordeak eta pertsonaleko delegatuak) ez sindikalak (LAB, USO, Independienteak), bere nahiak inposatu eta patronalaren interesen neurrira egindako ABEEE sinatuz.

LABen ABEEE honen aurka gaude aurretik adierazitako arrazoiengatik. Lantegi ezberdinetako enplegua eta etorkizuna bermatzea eskatzen dugu eta hemen negoziatu eta erabaki ditzagula gure lan-baldintzak, guztion artean. Hemen lan egin eta hemen bizi bagara, hemen erabaki behar dugu.
 

 

 

Presoen eskubideen alde mobilizatzeko deia egiten diegu langileei ostiralerako

admin
-
0
Presoen eskubideen alde mobilizatzeko deia egiten diegu langileei ostiralerako

Salbuespen legediarekin amaitu eta presoak etxeratzeko prozesua martxan jarri beharra dago, Gobernuak mugitzeko gakoa aktibazio sozialean dagoenaren jakitun, LABek langileei dei egiten die, Etxerat-ek datorren ostiralean berrabiatuko dituen hileko azken ostiraletako mobilizazioetan parte hartzera eta Sare-k egingo duen “Izan bidea” ekimenean parte hartzera.

Hurbilketa eta gradu aldaketa batzuk eman diren arren, euskal presoek jasan behar duten salbuespenezko espetxe politikak indarrean jarraitzen du.

Gainera, COVID-19aren pandemiak ondorio larriak izan ditu espetxeetan ere. Beste gobernu batzuk gaixotasunak dituzten presoak eta adinekoak askatu dituzten arren, euskal presoei dagokienez ez da horrelakorik izan. Gobernuek salbuespeneko neurriei eutsi diete, etxetik ehunka kilometrora dituen sakabanaketarekin jarraituz. Horrela, euskal presoei ukatu egin zaie bisitetarako eskubidea, euren gertukoek herrialde batetik bestera igaro behar baitute sakabanatuta dauden presoak bisitatzeko.

Egoera honen aurrean, LABetik babes osoa adierazi nahi diegu Sare eta Etxerat-ek aste honetan bertan egin dituzten aldarrikapenei:

– Preso guztiak Euskal Herriratzea.
– Larriki gaixorik daudenak eta 65 urtetik gorakoak berehala askatzea.
– Ohiko bisitak berreskuratzea.
– Gradu aldaketak ahalbidetzea eta baldintzak betetzen dituzten presoak etxean egotea.

 Honetaz gain, pandemiaren aurretik LABek hilero Donostian egiten duen presoen eskubideen aldeko hileroko mobilizazioari berrekingo dio maiatzaren 29an. Bulebarrean izango da, 13:00etan. Gainera, LABek manifestazioa egingo du Iruñean datorren ekainaren 5ean, “Euskal presoak etxean eta bizirik nahi ditugu” lemarekin. 12:30ean izango da, Udaletxe plazatik abiatuta.

Itzulera adostu eta segurua eskatu dugu EAEko haur eskoletan

admin
-
0
Haurreskolak Partzuergotik, haur eskoletara aurrez aurreko asistentzia eta hezkuntza zerbitzua ez dela iraila arte berriro hasiko adierazi dute eta bien bitartean, beharrezko protokoloak neurriak eta planak lantzen jarraitzen dutela, Eusko Jaurlaritzako Hezkuntza eta Osasun Sailek ezarritako irizpideei jarraituz, itzulera uneko egoerara egokituta, haur eta langile guztien osasuna bermatzeko.

LAB sindikatuak itzulera plan guztiak alde sozialarekin negoziatu behar direla gogorarazi nahi dio administrazioari, besteak beste, kudeaketako langileen prebentzio plana, hezitzaile guztiak haurrik gabe haur eskoletara itzultzeko prebentzio plana eta garrantzitsuena dena, ekainaren 8ra arte zabalik dagoen haurren izen-emate epeari erantzungo dion hurrengo ikasturterako itzulera plana. Itzulera hau kalitatezkoa eta osasun berme guztiekin eman dadin, ezinbestekoa izango da ratioen jaitsiera eta espazioen berrentolaketa egokiaz hitz egitea eta adostea, horretarako beharrezkoa izango den plantila hornikuntzarekin batera.

Erabaki honen berri izatearekin bat, LAB sindikatuak jakin du, haurtzaindegi pribatu batzuk, aurrez aurreko zerbitzua emateko zabalduko dituztela, horietako batzuk Eusko Jaurlaritzako diru laguntzak jasotzen dituztelarik, eta kasu batzuetan, prebentzio planik gabe.
 

 

 

Arcelor Mittalek mehatxuka eta xantaia egiten jarraitzen du lan-erreformari esker

admin
-
0
Arcelor Mittalek mehatxuka eta xantaia egiten jarraitzen du lan-erreformari esker

Salatu nahi dugu enpresak ez lituzkeela bere mehatxuak eta xantaiak egingo lan-erreforma indarrean egongo ez balitz. Enpresak badaki, sindikatuen akordiorik gabe ere, ABEEE aplika dezakeela horri esker. Beharrezkoa eta premiazkoa da lanerreforma osorik indargabetzea. Orain EAJ ez badago prest indargabetzeko, lanpostuak suntsitzen dituzten eta gehiengo sozialaren lan-baldintzak prekarizatzen dituzten botere ekonomiko handien konplize izango da.

Bete egin zen gidoia Arcelor Mittalen. Aurreikusi bezala, atzo egindako ABEEEren negoziazio mahaiaren bileran argi geratu zen enpresak ez zuela ezer negoziatzeko asmorik; izan ere, aurrez Asturiasen negoziatu ziren edukiak mahai gainean jartzera mugatu zen. Eduki hori guztiz bat dator sindikatu batzuk adierazitakoarekin eta hainbat komunikabidetan jasotakoarekin. Izapide hutsa izan zen atzokoa, negoziazio-mahaitik kanpo hartutako erabaki bati legezkotasun berniza ematen saiatzeko eta, horrela, errekurtso judizialek aurrera egitea zailtzeko.

Gainera, enpresak oso argi utzi zuen proposamena ABEEErekin lotutako edozein mobilizazio sindikali uko egitearen baldintzapean zegoela. Ez dezagun ahaztu proposamen honek okertu egiten duela gaur egun indarrean dagoen ABEEE; izan ere, enpresak soldataren %75 baino ez du osatuko, gaur egungo %94aren aldean.

Xantaia horren aurrean UGTk, CCOOk eta USOk amore eman dute berriro; izan ere, ABEEE sinatu ez duten arren, aurreikusitako lanuzteak bertan behera uztea onartu dute, eta uko egin diote mobilizazioari, ABEEE baten aurrean.

Enpresak elkarrizketa sozial bitxia egiten du, eta xantaiarekin, sindikatu batzuk egungo eta etorkizuneko mobilizazioei uko egitea lortzen du egungo ABEEE baino okerragoa den proposamen baten truke. Hain zuzen ere, sindikatu berdin horiek sinatu zuten egungo espedientea.

LABek, bileran jasota geratu zenez, ez dio ezeri uko egiten, eta iragarri genuen bezala, errekurtsoa jarriko dugu auzitegian.
 

 

 

EAEko Hezkuntza Sailaren arduragabekeriaren aurrean, ia ikastetxe denek sindikatuok ikasturte amaierarako egindako proposamenaren aldeko hautua egin dute

admin
-
0
EAEko Hezkuntza Sailaren arduragabekeriaren aurrean, ia ikastetxe denek sindikatuok ikasturte amaierarako egindako proposamenaren aldeko hautua egin dute

EAEko Hezkuntzako sindikatuok elkarretaratze bateratua egin dugu Lakuan. Gaur egin dugun bezala, datozen egunotan ere, ikastetxe bakoitzean aurrez aurreko itzulera osasun bermeekin gauzatzen dela ziurtatzeko adi egongo gara sindikatuok; aldi berean, Hezkuntza Sailari ikasturte hasierako plangintza osoa, zein osasun neurriak eragileokin adosteko galdegiten diogu.

Oso gutxi izan dira gaur, maiatzak 25, aurrez aurreko ikasketak abian jarri dituzten ikastetxeak, eta abian jarri dituztenek ikastalde oso mugatuentzat egin dute, nagusiki errefortzu bat eskatzen duten ikasleentzat edota 2. Mailako Batxilergoko ikasleentzat EBAU azterketaren prestaketari begira. Beraz, esan dezakegu ikastetxe gehienek, hezkuntza sailak ez bezela, sindikatuok pasa den astean Hezkuntza Sailari helarazitako proposamenaren ildotik doazen ikasturte amaierako planteamenduak gauzatzeko hautua egin dutela.

Datozen egun eta asteotan aurrez aurreko ikasketak abian jarriko dituzten ikastetxe gehiago ere izango dira. Eta badirudi, momentuz ditugun datuen arabera behintzat, hauek ere ildo berdina jarraitzeko asmoa dutela.

Edozein kasutan, pasa den Ostiralean adierazi genuen bezala, ikastetxez ikastetxe, aurrez aurreko ikasketetarako zein lanerako itzulera osasun bermeekin gauzatzen dela ziurtatzeko adi egoten jarraitzen dugu sindikatuok; eta hala ez bada, osasuna bermatua ez dagoen ikastetxe horietan osasuna bermatu arte, beharrezko mobilizazio, ekimen eta tresnak jarriko ditugu abian.
Sindikatuok, zein hezkuntza komunitate osoaren gaitzespen eta presioak hezkuntza saila bere hasierako erabakiak aldatzera eraman badu ere, oso larria eta arduragabea izaten ari da ez ohiko ikasturte amaiera honi begira Hezkuntza Saila egiten ari den kudeaketa. Hezkuntza eragileokin adostu gabeko aldebakarreko erabakiak hartzen ari baita etengabe.

Ikastetxe bakoitzaren autonomía aitzakiatzat hartuz, ikastetxe bakoitzaren esku utzi nahi izan du azkenik itzuleraren nondik norakoa erabakitzeko ardura eta pisua. Gaur, oraindik ere ugariak dira ordea beraien itzulera planaren aurrean hezkuntza ikuskaritzaren erantzunik jaso ez duten ikastetxeak, eta beraz, beraien itzulera planak Sailaren oniritzia duenik ere ez dakitenak.

Horrela, Sindikatuok ikasturte amaierara begira adi egoteaz gain, datorren ikasturteari begira, ikasturte hasierarako plangintza, baldintzak, zein segurtasun eta osasun neurri eta protokoloak, langileon ordezkariokin negoziatu eta adosteko galdegiten diogu.
 

 

 

EAE eta Nafarroako instituzioak interpelatu ditugu, kapitala baino langileak babesteko akordioak gauza ditzaten

admin
-
0
EAE eta Nafarroako instituzioak interpelatu ditugu, kapitala baino langileak babesteko akordioak gauza ditzaten

LABeko idazkari nagusi Garbiñe Aranburuk eta Ekintza Sindikaleko eta Negoziazio Kolektiboko idazkari Xabier Ugartemendiak agerraldia egin dute Eusko Jaurlaritzak sindikatu, patronal eta beste eragilerekin sortutako mahaiari buruz aritzeko. Asteazkenean izango da laugarren bilera, eta LAB bertara ez dela joango aurreratu dute, mahaiak ez baititu langileen interesak defendatzen, kapitalarenak baizik. Argazki huts bat ateratzeko mahaia dela salatu dute, Jaurlaritzak aldebakartasunez hartzen dituelako erabakiak. Nafarroan ere asteazkenean izango da Nafarroako Kontseilu Ekonomiko eta Sozialaren mahaia. Kasu honetan bertan izango gara, baina aipatutako terminoetan: langileak babesteko akordioak gauzatzeko. Halaxe adierazi du LABeko Nafarroako bozeramaile Imanol Karrerak, agerraldi baten bitartez hau ere.

Imanol Karrera, Iruñeko egoitzaren kanpoaldean egindako agerraldian.

Eusko Jaurlaritzak sortutako delako mahai sozio-ekonomikoaren laugarren bilera izango da asteazkenean, eta bertan ez garela izango iragartzeko agerraldia egin dugu. Iruñean ere egin dugu agerraldia, kasu honetan asteazkeneko Nafarroako Kontseilu Ekonomiko eta Sozialaren bileran izango dugun jarreraren berri emateko.

EAEko kasuan, orain arte izandako bilerek ez dute ezertarako balio izan langileen ikuspuntutik. Hiru bilera egin dira jada eta Eusko Jaurlaritzak eta EAJk eragile sozio-ekonomikoekin argazkiak ateratzeko soilik baliatu dituzte. "Hartzen dituzten erabakiak eragile sozio-ekonomikoekin batera hartzen dituztela irudikatu nahi dute, gezurra denean, LABekin behintzat. Eusko jaurlaritzak aldebakartasunez funtzionatzen du, LABek botatzen dituen ekarpenei jaramonik egin gabe. Estatuko Gobernua kritikatzen du Jaurlaritzak, baita guk ere, erabakiak aldebakartasunez hartzen dituelako, eta zentralizazioa inposatzen ari delako. Bada, Jaurlaritza berdin egiten ari da, langileen beharrak kontutan izan gabe", adierazi du Xabier Ugartemendiak.

Jaurlaritzak aldebakartasunez hartzen dituen erabakiak patronalari begirakoak dira, patronala asetzeko. "Azken bileraren aurretik esan genuen, bide horretatik jarraituz gero, gure partaidetzarekin jarraitzea aztertuko genuela. Hala, LABek erabaki du asteazkeneko mahaian ez parte hartzea, erabiliak izan garelako eta langileak pairatzen ari diren egoera bilera hauetan ez direlako kontutan hartzen", azaldu du Ekintza Sindikaleko eta Negoziazio Kolektiboko idazkariak.

Nafarroako Kontseilu Ekonomikoa eta Sozialaren bilerari dagokionez, Gobernuaren Nafarroa Suspertu plana aztertzeko deitutakoa, Imanol Karreraren iritziz, Nafarroako Gobernuak aurkeztu duen hasierako dokumentuaren norabidea “betikoaren jarraipena da”, krisi honetara ekarri gaituen sistemaren jarraipena”. Karreraren hitzetan, “Nafarroa suspertzeko edozein planek egungo eredua gainditu behar du nahitaez, eta kapitala babestu beharrean langileak babestu behar ditu”.

Langileak babestea helburu
Hain zuzen ere, LABetik defendatzen dugun berreraikuntza ekonomiko eta sozialerako planak langileak babesteko helburua izan behar du. Gakoa etorkizuna eraikitzeko bideari ematen diogun norabidean dago, horregatik EAE zein Nafarroako eztabaida markoen helburuak hauexek izan beharko lirateke:

-Enplegu suntsiketari, lan baldintzen kaskartzeari, lan osasunari eta krisiaren ondorio sozial larriei aurre egiteko lehentasunezko neurriak eztabaidatu eta adostu.

-Pertsonen eta naturaren zaintza aintzat hartu eta bizitza erdigunean jarriko duen eredu berri baterako trantsizioari ekitea; lan guztiak aitortu eta banatuko dituen eredua, zerbitzu publiko duinak bermatuko dituena edota ekoizpen eta kontsumo eredu jasangarriaren alde egingo duena. 

-Aberastasuna hobe birbanatzeko plan baten beharra. Zerga politikak sakoneko aldaketa bat eskatzen du. Diru gehiago bildu behar da eta biltzen den dirua modu progresiboagoan bildu behar da, errenta altuak, enpresa irabaziak eta kapitala gehiago zergapetuz. 

Garbiñe Aranbururen hitzetan, "baditugu proposamenak, ez diogu eztabaidari uko egiten, langileak babestuko dituen akordioak gauzatzeko helburua izango duten eztabaida markoak nahi ditugu. Gune parte hartzaileak, eztabaidarako eta adostasunak bilatzeko guneak izatea nahi dugu".

LABeko idazkari nagusiaren hitzetan, "eztabaida hauek egiteko markoa ere ez da delako Elkarrizketa Sozialeko mahaia, langileen emandako hitzaren gainetik, gutxiengo sindikalarekin eta Jaurlaritza zein patronalaren interesak zuritzeko erabiltzen den mahai antidemokratikoa da elkarrizketa sozialeko mahaia baita".

Urtarrilaren 30eko Greba Orokorrean bizitza erdigunean jarriko duen eredu berri baten alde mobilizatu ginen. Indar erakustaldi handia izan zen eta indar horrekin jarraituko dugula nabarmendu du Garbiñe Aranburuk, "lantokietan borroka sindikalak bultzatuz eta kalean mobilizatuz, eragile sindikal, sozial eta politiko desberdinen arteko elkarlana bultzatu eta adostasunak eraikiz, eredu sozio-ekonomiko berri baten bidean".
 

Garbiñe Aranburu idazkari nagusiak eta Xabier Ugartemendia Ekintza Sindikala eta Negoziazio Kolektiboko idazkariak egindako agerraldiaren

 

 
1...518519520...1,590Page 519 of 1,590

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus