2025-12-19
Blog Page 21

LABek gogor salatu du Tuterako Udalak sindikatuaren historiari buruzko erakusketa itxi izana

Zubiate(e)ko Aritz
-
0
LABek gogor salatu du Tuterako Udalak sindikatuaren historiari buruzko erakusketa itxi izana

LAB sindikatuaren historia laburbiltzen duen 1974tik etorkizunera LAB zabaltzen izeneko erakusketak Tuterako La Rua gizarte etxean egon behar zuen ikusgai urriaren 1etik 9ra, biak barne, baina Alejandro Toquero UPNko alkateak erakusketa ixtea agindu zuen iragan larunbatean. LABek gogor salatu nahi du adierazpen askatasunaren aurkako eraso obsesibo hori eta Toquerori ohartarazi dio sindikatuak beharrezko bideak bilatuko dituela tuterarrek erakusketa hau ikusi ahal izan dezaten.

1974tik etorkizunera LAB zabaltzen izeneko erakusketa Nafarroako Parlamentuan egon zen ikusgai, aurtengo otsailean. Sindikatuaren 50. urteurrena ospatzeko hondarreko ekitaldia izan zen eta bere inaugurazioan Unai Hualde Parlamentuko lehendakariaz gain zenbait talde parlamentariotako kideak ere egon ziren. Erakusketa hark sindikatuaren historia orokorrari buruzko zertzelada batzuk ematen dituzten hamar panel handi jasotzen zituen, baita Maiatzaren Leheneko LABen kartel gehienak ere. Gainera, lau aldeko zutabe batzuetan, sindikatuaren Nafarroako istorio, datu eta irudi andana biltzen zituen.

Parlamentuko erakusketaren harira, UPNk eta CEN Nafarroako Enpresaburuen Elkarteak zarata handia sortu zuten; lehenbizikoari ez baitzitzaion gustatu presoen sakabanaketaren aurkako LABen 2018ko mobilizazio bat iragartzeko kartela; eta bigarrena mindu omen baitzen LABen kartel zahar batean garai bateko CENeko lehendakaria sudurra luzatuta ageri zelako. Dena dela, eskuindarren kasketa gorabehera, erakusketak bukaera arte jarraitu zuen Parlamentuan, batere arazorik gabe, eta ehunka herritarrek ikusi zuten.

Tuterako erakusketa

1985. urte aldera hasi zen LAB Nafarroako Erriberan bere lan sindikala hedatzen. Duela 40 urte. Eta, hori gogoratzeko eta nabarmentzeko, Parlamentuko erakusketa Tuterara eramatea erabaki zuen, La Rua gizarte etxera hain zuzen ere. Horretarako, Tuterako Udalari beharrezko baimen eskaera egin zion uda aurretik, eta baimena sinatuta jasota, erakusketa irailaren 30ean muntatu zuen eta urriaren 1ean inauguratu zuen. Tuteran, Parlamentuan erakutsitako panel guztiak zeuden, baita LABek Erriberan eginiko lana erakusten zuten dozenaka argazki biltzen zituen zutabe bat ere.

Lerrook idazteko unean, Tuterako Udalak oraindik ez dio LABi erakusketaren itxiera komunikatu. Beraz, Udalak argitaratu duen oharraren bidez jakin du sindikatuak zer dela-eta itxi duten. LABen ustez, fantasia hutsa da ohar hori. Horren erakusgarri nabarmenena da Udalak asmatzen duela LABen erakusketak Jon askatu! izena duela. Ez da hala, noski. Erakusketa osoan ikus daitezkeen hamarka kartelen erreprodukzio txikien artean bada bat Jon Idigoras LABeko idazkari nagusia izandakoaren askatzea eskatzen duena ‒azkenean absolbitu zuten kausa baten ingurukoa, portzierto‒; baina kartel txiki horrek ez dio erakusketari izena ematen.

Tuterako Udalak Toqueroren aginduz idatzitako oharrak bere izenburuan baieztatzen du LABen erakusketak “ETAko presoak goratzen dituela”. Testu barnean, baina, baldintza erabili eta adierazi dute “ETAko presoei buruzko panelek terrorismoa goratzea iradoki lezaketela”. Aitzitik, zentsura eta debekua baldintzarik gabe aplikatu ditu Toquerok, eta tartean inolako salaketarik egon gabe, zigorra ezarri dio LAB sindikatuari.

LABek ulertzen du Alejandro Toquerok sindikatu hau atsegin ez izatea. LABek ere Toqueroren politika ekonomikoak eta enplegu politikoak gustuko ez dituen eta salatzen dituen moduan. Era berean, LABek ulertzen du Toqueroren alderdiak begi txarrez ikustea sindikatu honek Erriberan gero eta handiagoa duen presentzia. Baina areriotasun horrek ez du justifikatzen adierazpen askatasunaren aurkako eraso hau, balio demokratikoen guztiz kontrakoa baita.

Alejandro Toquero bezalakoen jauntxokeriek argi eta garbi erakusten duten zein garrantzitsua den UPNren eskuak Nafarroako erakundeetako lemetatik urruti egotea, batere aukerarik izan ez dezaten Nafarroako langileen bizitzen gaineko ezein erabaki hartzeko. LABek 50 urte baino gehiago daramatza halakoei aurre egiten, eta halaxe egiten jarraituko du, eta Toquerori ohartarazten dio beharrezkoak diren bideak bilatuko dituela tuterarrek beren hirian ikusi ahal izan dezaten hau guztia kontatzen duen erakusketa.

Hezkuntza Saila eskola segregazioa areagotzen duten neurriak bultzatzen ari da, segregazioaren kontrako mahaian bestelakoak esaten dituen arren

Zubiate(e)ko Aritz
-
0
Hezkuntza Saila eskola segregazioa areagotzen duten neurriak bultzatzen ari da, segregazioaren kontrako mahaian bestelakoak esaten dituen arren

Jaurlaritzak gauza bat esan eta kontrakoa egiten du hezkuntza politikei dagokienean. Izan ere, irailaren 8an, lehendakariak berak segregazioaren kontrako mahaia aurkeztu zuen eta hezkuntza sistemak ekitatea eta inklusioa oinarri izan behar direla adierazi zuen, baina kontrako norabidean doazen politikak bultzatu ditu aste honetan matrikulazio biziaren banaketari lotuta, Gasteizen.

Aurreko urtean matrikulazio biziaren bitartez 8.000 ikasle eskolaratu ziren Araba, Bizkaia eta Gipuzkoako ikastetxeetan, eta aurten, ikasturtea hasi berri dagoenean, epez kanpoko ikasleak iristen eta eskolaratzen hasi dira. Alta, Hezkuntza Sailak orain arteko praktika segregatzaileekin jarraitzeko hautua egin du, eta eskola planifikazioan inolako erabakirik hartu gabe zein matrikulan doiketarik egin gabe, ikasturte hasieratik 40 ikasletik gora matrikulatu ditu Gasteizko bi eskola publikotan. Ikasle horietako 13, gutxienez, Kristau Eskoletako ikastetxeetara bideratu dituzten arren, ezin izan dira bertan matrikulatu itunpeko ikastetxe horietan kuotak ordaintzea eskatu dietelako. Ondorioz, eskola publikoak hartu behar izan ditu, beste behin ere, era masiboan ikasle horiek, eta irakasleek zein hezitzaileek haien onena eman zein baliabide gehiago lortu arren, ikasleen hezkuntza prozesua kaltetu du. Bat-batean berariazko hezkuntza laguntza premiak dituzten ikasle kopuruen pilaketa gertatu da.

Badirudi, beraz, Hezkuntza Sailak ez daukala hezkuntza politikak aldatzeko inolako borondaterik; egoeraren jakitun izateaz gain, egoeraren diagnostikoa egina baitu tokian toki. Alta, oraindik orain ez du neurri zuzentzailerik ezarri eta ez du inolako jarraipenik egin Kristau Eskola horiek legez debekaturik dituzten derrigorrezko kuota horiek ez inposatzeko eta kobratzeko.

Hortaz, LABek Hezkuntza Sailari exijitzen dio Gasteizko egoeraren aurrean urgentziazko esku-hartzea egin dezan, ikuskaritzaren bitartez Kristau Eskolako itunpeko ikastetxe horiei kuoten kobrantza kontrolatzeko eta debekatzeko, eskola planifikazioari lotuta gain-eskaintza mugatzeko eta Hezkuntza Konplexutasun Indize altukoak edo oso altukoak diren ikastetxeetan hezkuntza-laguntza premiak dituzten ikasleen kontzentraziorik ez egiteko, ezta bultzatzeko ere.

Bide batez, D eredukoa den eskola publikoaren aldeko apustu garbia egin dezan eskatzen diogu, hezkuntza-politiken erdigunean berau jarriz eta babestuz. Eta LABek gizarte kohesioa hezkuntza-politiken printzipio gidari izan dadila aldarrikatzen du, Araba, Bizkaia eta Gipuzkoako herrietan egon daitezkeen askotariko errealitateen aurrean, sare ezberdinei eragiten dien errealitatea pixkanaka eraldatzeko. 

MFSren 80. urteurreneko ekitaldietan parte hartuko du LAB sindikatuak Parisen

Zubiate(e)ko Aritz
-
0
MFSren 80. urteurreneko ekitaldietan parte hartuko du LAB sindikatuak Parisen

1945ean sortu zen Munduko Federazio Sindikala (MFS) eta hiri horretan egingo dira, hain zuzen ere, 80. urteurreneko ekitaldiak. LABeko ordezkaritzaren buru, Igor Arroyo koordinatzaile orokorra gerturatuko da Parisera. 

Orain 80 urte, Mundu Gerra basati baten eta faxismoa garaitu ondotik, aspaldiko egitasmoari heldu zioten, berriz ere, mundu osoko sindikatuek: herrialde guztietako langileak bilduko zituen nazioarteko erakundea sortzea. 

Zoritxarrez, Estatu Batuek gidatutako blokearen presioen ondorioz, MFS sortu eta gutxira “Mendebaldeko” sindikatu askok alde egin eta CIOSL sortu zuten (egun CSI); bertako kide dira UGT, CCOO eta ELA sindikatuak. Sobiet Batasunaren erorketarekin, berriz, beste hainbat sindikatuk utzi zuten, hala nola, Frantziako CGT. 

Alabaina, krisia gainditu eta suspertze fase bati ekin zion MFSk 2005etik aurrera. Europan bere presentzia mugatuagoa bada ere, mundu osoko 100 milioi langile baino gehiago ordezkatzen ditu egun. 

MFSren suspertze fasean bidaide izan da LAB sindikatua. 1990ean lehen aldiz Moskuko Kongresuan behatzaile gisa parte hartu eta 2000. urtean MFSrekin bat egitea erabaki zuen. 2005eko La Habanako Kongresuan bilakatu zen ofizialki MFSko kide, Euskal Herriko ordezkari gisa aitortuta. 

Ordutik LABek parte hartze aktiboa izan du MFSn, besteak beste, zuzendaritza gune nagusia den Kontseilu Presidentzialean, Metaleko Federazioaren sorreran edota Emakume Langileen Batzordean. Gainera, Espainiako Estatuan MFS egituratzeko ekarpena egin du, Herrien Koordinadora deritzona sortuz. Bertan biltzen dira CUT Galiza, Intersindical Catalana, IAC, Intersindical Canaria, Intersindical Valenciana, CSI Asturies, CUT Aragoi eta SAT Andaluzia. Osotara 120.000 afiliatu baino gehiagorekin, kontraboterezko erreferentzia nagusietakoa da estatu mailan. 

Bere sorreratik lau izan dira FSMren ikur nagusienak: esplotazioaren aurkako klase borroka; antifaxismoa; antiinperialismoa eta autodeterminazio eskubidearen defentsa. Lau balore horiek indar handia dute, hain zuzen ere, Euskal Herriko langileen artean. Eta ezinbestekoak dira mundu mailan hedatzen ari den olatu erreakzionarioari aurre egiteko. 

Langabeziak behera egin arren, prekarietatearen joera goranzkoa da

Zubiate(e)ko Aritz
-
0
Langabeziak behera egin arren, prekarietatearen joera goranzkoa da

Hego Euskal Herrian 135.349 herritar daude langabezian, aurreko urte zein hilabetearekiko behera egin duen kopurua. Hauetatik erdia baino gehiago emakumea da, %59,19 hain zuzen ere.

Azken urtean, langabeziak behera egin du sektore guztietan, industrian izan ezik; izan ere, sektore honetan 173 langile gehiago daude lan bila. Aurreko enplegurik gabekoen artean ere langabezia jaitsi arren, langabetuen %12,68 dira. Aurreko hilabetearekiko alderaketa eginez, sektore guztietan jaitsi da langabetuen kopurua. Nabarmentzekoa da zerbitzuen sektorean 2.278 langabe gutxiago zenbatu direla. Irailean aldizkako kontratu finkoak %3 izatera pasa dira, uztailean %2 ziren bitartean. Datu hauen atzean kontratu mota honen erabilera maltzurra ezkutatzen da. Izan ere, udan baja hartu ondoren, kontratu mota hau duten langileek alta hartu dute irailean (ostalaritza, ikastetxeetako garbitzaileak edota jantokietako hezitzaileak, kasu). Beraz, sektore feminizatuetako lan baldintza prekario zein ezegonkorrak iraunarazteko baliatzen ari dira aldizkako kontratu finkoak, prekarietate egoera lan merkatuan sendotuz.

Era berean, uda bukatuta, behin-behineko kontratu prekarioak behera egin dute eta migratzaileen artean langabeziak gora egin du, bereziki zerbitzuen sektorean. Bestalde, gazteen artean afiliazioak behera egin du oso nabarmen (25 urtetik beherakoen artean 5.237 afiliatu gutxiago daude), uda bukatuta ikasketetara bueltatzeagatik.

Industria sektoreak bizi duen egoera ezegonkorra datuetan atzematen hasi gara. Izan ere, alde batetik, iazko urtean baino langabetu gehiago daude, eta bestalde, afiliazio kopuruak gora egiten duen arren, joera lausotu egin da. Azkenaldian salatzen ari garen bezala, ERTE kopuruak gora egiten ari dira industrian. Egoera honek langabezian eraginik ez duen arren (langileak kontratupean jarraitzen dutelako), gero eta enpresa gehiagok ERTE egoeratik ERE-ra salto egiten ari dira. LAB sindikatuak alarma gorriak piztu nahi ditu, egoera kezkagarria baita eta hainbat eskualderen etorkizuna baldintzatu baitezake, gure herrian inpaktu zuzena izateaz gain. Hori dela eta, politika industrial eraginkorra martxan jartzea lehentasunezkoa dela aldarrikatzen dugu.

Langabeziaren joera beheranzkoa izan arren, prekarietatearena goranzkoa izaten jarraitzen du. Enplegua eduki arren, Hego Euskal Herriko ia bi langiletik bat prekarietate egoeran bizi da, bizi baldintza duina bermatzeko diru-sarrera nahikorik gabe. Datuen azterketa honetatik baieztapen hau konfirmatzen duten ondorioak ere ateratzen ditugu:

  • Zerbitzuen sektoreak gero eta pisu handiagoa du lan merkatuan: afiliazioaren %73,69 zerbitzuen sektorekoa baita, industria sektoreko afiliazioa %21,39 den bitartean. Azken urtean sorturiko afiliazioaren %86,39 zerbitzuen sektorekoa izan da.
  • Emakumeen lan baldintzak prekarioenak egiturazkoak dira. Lau emakumetik batek lanaldi partziala izaten jarraitzen du (%24,9), gizonen artean hamarretik batek duen bitartean (%11,3). Lanaldi osoaren kasuan, proportzioak alderantziz dira: gizonen %78,7k jardunaldi osoko kontratua dute, emakumeen artean %57,5 besterik ez, nabarmen baxuagoa. 
  • Udako epealdia lan baldintza prekarioetan sakontzeko baliatzen da, eta horretarako Espainiako estatuan egindako lan erreformek ahalbideturiko tresnak erabiltzen dira: uda amaituta, batetik, aldizkako kontratu finkoak nabarmen gora egiten dute, eta bestetik, behin-behineko kontratu kopurua behera doa.

Egoera honen aurrean, langile klase guztiarentzat onuragarria izango den Lanbidearteko Gutxieneko 1.600 €-ko Soldata aldarrikatzen dugu. 138.495 sinadura bildu ditugu denbora gutxian, euskal langile herriaren babes argia islatzen duena. HEL martxan dugu eta duela egun gutxi Confebask-en kontziliazio eskaera erregistratu dugu, gaiarekiko duen ardurari muzin ez egiteko. Beraz, borrokan jarraitzen dugu langile klase osoaren lan eta bizi baldintzak hobetuko dituen eredu berri baten norabidean. 

Enplegu Publikoaren Legearen aldaketak balio behar du administrazio publikoaren euskalduntzeak behar duen segurtasun juridikoa bermatzeko

Zubiate(e)ko Aritz
-
0
Enplegu Publikoaren Legearen aldaketak balio behar du administrazio publikoaren euskalduntzeak behar duen segurtasun juridikoa bermatzeko

Enplegu Publikorako Legea aldatzeko bi lege proposamen eztabaidatu dira gaur Eusko Legebiltzarrean; EH Bilduk egindako proposamena, batetik, administrazio publikoak euskalduntzeari berme juridikoa emango liokeena, euskararen eta gazteleraren eskakizunak parekatuko lituzkeena, kudeaketa malgua ezarriko lukeena testuinguru soziolinguistikoaren arabera eta langile publiko guztiak euskalduntzea ahalbidetzeko baliabideak eta liberazioak areagotuko lituzkeena. Eta, bestetik, EAJk proposatutakoa, “hizkuntza-eskakizunak erakunde bakoitzaren errealitatera” egokitzearen aitzakipean, nahitaez bete beharreko inolako indizerik ezartzen ez duena.

LABek aurrez ere adierazi izan duen bezala, EAJren proposamenak ez du jasotzen administrazioek bete beharreko inolako irizpide zehatz eta egiaztagarririk, eta derrigortasun indizea kentzea aurreikusten du. Hala eginez gero, unean uneko arduradun instituzionalaren borondatearen esku geratuko litzateke hizkuntza-eskakizuna izango duten lanpostuen ehunekoa ezartzea, eta horrek ateak irekiko lizkioke administrazioaren euskalduntzean atzerantz egiteko arriskuari. LABek larritzat jotzen du, oldarraldi juridiko-politiko betean, EAJk, PSEren presioei men egin eta tamainako erantzunik eman ez izana.

Legea erreformatzeko bi proposamenen tramitazioak aurrera egingo du orain, eta LABek ausardia eskatzen dio EAJri, proposamenak lege bihurtu bitarteko eztabaidan euskarari ahalik eta segurtasun juridiko handiena eman ahal izateko. Lege berritua epaitegien etengabeko injerentzien aurrean euste-horma sendo bat bermatzeko izan behar da, LABen ustez.

Euskararen aldeko eragileek hainbatetan azaldu dute egoeraren larritasuna, eta jauzi handia behar dela euskalduntzean atzeraka ez joateko. LABek ere hala uste du, eta administrazio publikoetan jauzia emateko mobilizazioan beste urrats bat eman behar dela uste du. Euskararen eskubideak eta eskakizunak gaztelaniaren parekoak izan behar dira, biak EAEn ofizialak izanik, eta administrazio publikoek herritarron eta langileon hizkuntza eskubideak babesteko betebeharrak dituzte: euskara gazteleraren pareko trataera duen hizkuntza izan behar da, balizko salbuespenak aztertu behar dira eta euskalduntze plan eraginkorrak egin.

Era berean, euskarak eta euskalduntzeak beharrezko dituzten berme legalak lortzeko, ezinbestekoa izango da mobilizazio soziala eta langileen aktibazioa, eta horretan buru-belarri arituko da LAB datozen hilabeteetan.

Era berean, euskarak eta euskalduntzeak beharrezko dituzten berme legalak lortzeko, ezinbestekoa izango da mobilizazio soziala eta langileen aktibazioa, eta horretan buru-belarri arituko da LAB datozen hilabeteetan.

Lurauto Gipuzkoako (BMW) langileak borrokan.

Zubiate(e)ko Aritz
-
0
Lurauto Gipuzkoako (BMW) langileak borrokan.

Lurautoko langileak, Oiartzunen dagoen BMWren emakidadunak, mobilizatzen hasi dira enpresak bere lan-betebeharrak ez betetzeagatik eta enpresaren eta bere lanpostuen etorkizunari buruz dagoen kezkagatik protesta egiteko.

LAB sindikatutik salatu nahi dugu langileek “hilabeteak daramatzatela soldatak berandu eta mailaka kobratzen”, baita gaur egun abuztuko nomina jaso gabe ere. Aurten ere ez zaie aplikatu Gipuzkoako metalaren hitzarmenean jasotako soldata-igoera “.

Egoera horren aurrean, zuzendaritzari eskatzen diogu “nomina guztiak berehala ordain ditzala KPIren igoerekin, eta, bestetik, kudeaketa alda dezala, enpresaren proiektuaren bideragarritasuna bermatuko duten neurriak ezarriz”.

Lurauto Oiartzun Lurauto emakidadunen taldeko kidea da (Bizkaikoekin eta Nafarroakoekin batera, eta egoera kritiko berean daude), eta 49 langile ditu, LABeko bi ordezkarik eta CCOOko beste batek ordezkatuta. Hartzekodunen konkurtso baten arriskua eta horren ondorioak 100 familia baino gehiagori eragiten die.

Lantegiko langileekin hainbat batzar egin ondoren, eta zuzendaritzak haien eskaerei erantzuten ez badie, kolektibo horrek ez du baztertzen gatazka gogortzea mobilizazioen intentsitatea handituz, baita greba ere.

Genozidioarekin negoziorik ez. Langileok Palestinarekin

Zubiate(e)ko Aritz
-
0
Genozidioarekin negoziorik ez. Langileok Palestinarekin

LAB, CCOO, UGT, ESK, STEILAS, CGT, Etxalde eta HIRU sindikatuek Lanuzte Orokorrerako deialdia iragarri dute Araban, Bizkaian eta Gipuzkoan datorren urriaren 15erako, eta deialdi hori Nafarroan ere egingo da. Borroka, mobilizazio eta batzarren eguna izango da, langile klase osoaren parte hartze aktiboa bilatuko duena.

Lanuzte orokorra 03:00etatik 06:00etara, 11:00etatik 14:00etara eta 19:00etatik 22:00etara izango da, eta mobilizazio nagusiak 11:00etatik 14:00etarako tarte horretan izango dira. Manifestazioak izango dira Bilbo, Gasteiz, Donostia eta Iruñeako kaleetan.

Hasieratik, gure erakundeek salatu dute eta jarrera argia erakutsi dute Israelgo eraso basatiaren aurrean Palestinako herriaren kontra. Gaur egun inork ez du zalantzan jartzen genozidio baten aurrean gaudela, Israelek berak edo hura sostengatzen duten gobernuek eta interes ekonomikoek salbu. NBEren Batzorde Independenteak berriki argitaratutako txostenak Amnistia Internazionalak esandakoa berresten du: Israel Palestinaren aurka genozidioa egin du (eta egiten ari da) Gazako Zerrendan.

Europan, herritarren presioak fruituak ematen ari dira Europako Batasunaren eta Israelgo merkataritza-hitzarmenaren etetearen alde. Hala ere, Europako Batzordeak ematen dituen urratsak beranduegi emanak eta eskasak dira. Horregatik, Europako Batzordeari exijitzen diogu onar dezala Israel genozidioa egiten ari dela Gazan, eta hautsi dezala erabat Europako Batasuna-Israel Elkartze Hitzarmena. Ez da zilegi genozidioa, gerra krimenak eta etengabeko nazioarteko legediaren urraketak egiten dituztenekin harreman komertzialak izatea.

Gogoratu behar da Nazioarteko Justizia Auzitegiak, Hegoafrika Israelen aurka auzian, 2024ko urtarrilaren 26an, martxoaren 28an eta maiatzaren 24an eman zituen behin-behineko neurrien aginduen bidez, Israelek 1948ko Genozidioaren Hitzarmenaren arabera genozidioa osatzen duten ekintzak egin ditzakeela ondorioztatu zuela. Auzitegiak Israeli agindu zion ekintza genozidak galarazteko eta laguntza humanitarioaren sarrera oztoporik gabe ahalbidetzeko. Determinazio juridiko horiek estatuak zein eragile ez-estatalak, enpresak barne, ohartarazten dituzte halako ekintzak materialki ahalbidetzeak dakartzan ondorio juridikoez. Nazioarteko Zigor Auzitegiaren neurri lotesleak igorri ondoren ere erabilera bikoitzeko artikuluen esportazioek, batez ere azken erabiltzaile militarrentzat, gutxienez erabilera ilegal posiblearen ezagutza suposatzen dute, eta hortaz, erantzukizun penala ekar dezakete.

Azken bi urteetan ikusi dugun bezala, guk ordezkatzen dugun sindikalismoak eta gehiengo sozial zabal batek Gazan genozidioa amaitzeko eskatzen dute, eta Palestinak estatu aske izateko eskubidea izatea. Eusko Jaurlaritzako eta Espainiako Estatuko instituzioei eskatzen diegu genozidioarekin harreman oro eteteko, eta euren esku dituzten tresna guztiak baliatzeko su-eten bat lortzeko. Baita, Palestinaren autodeterminazio-eskubidea eta bere lurraldearen okupazioaren amaiera erdigunean jarriko dituen konponbide integrala lortzeko ere.

Era berean, Israelekin harreman komertzialak dituzten enpresei eta patronalari, oro har, hausnarketa etikoa egin dezaten eskatzen diegu, eta ez dezatela inolako jarduera komertzialik garatu Palestinan genozidioarekin konplize diren edo nazioarteko legedia urratzen duten enpresa edo erakundeekin.

Azken batean, urriaren 15ean mobilizatuko gara honako hau eskatzeko:

  • Langile klase osoaren elkartasuna adierazteko Palestinako herriarekin. 
  • Israel Palestinako herriaren aurka, AEBetako Gobernuaren babesarekin, egiten ari den genozidioa eta gizateriaren aurkako krimenak salatzeko. 
  • Zisjordanian Palestinako lurraldearen etengabeko kolonizazioa salatzeko, eta horrek langile palestinarren lan- eta bizi-baldintzetan dituen ondorio larriak. 
  • Gazako genozidioaren berehalako amaiera eskatzeko eta okupazioa eta kolonizazioa amaituko dituen eta Palestinako herriak askatasunean bizitzeko eskubidea bermatuko duen konponbide integrala exijitzeko. 
  • Patronalari eta instituzioei, bertakoei zein nazioartekoei, Israelekin harreman komertzial oro eteteko eskatzeko. Ezin da genozidio baten kontura negozioa egiten jarraitu. 
  • Europar Batasuna-Israel Elkartze Hitzarmena osorik eten dadin eskatzeko.

Bilboko alde zaharreko dozenaka bizilagunen mezua funts putreei: “Atera zuen negozioak gure etxeetatik”

Zubiate(e)ko Aritz
-
0
Bilboko alde zaharreko dozenaka bizilagunen mezua funts putreei: “Atera zuen negozioak gure etxeetatik”

Zabalbide 10 eta Santos Juanes 1, 3 eta 5eko bizilagunek, LABeko etxebizitza asanbladarekin batera, agerraldia egin zuten atzo Mazabi funts putrearen jarduera salatzeko eta etxebizitzak lehentasunez bizitzeko izan behar dutela aldarrikatzeko. Bilboko Udalari helburu hori bermatuko duen politika publikoak eskatu zizkioten.

Bilboko alde zaharreko dozenaka bizilagunek salatu zuten gero eta zailagoa dela auzoan bizitzea, Mazabi funts putreak erositako etxebizitza blokearen aurrean egindako agerraldian. “Etxebizitza lehen mailako arazo sozial bilakatu da, eta langileak pobretzeko arrazoi nagusietako bat”, adierazi zuten.

Azaldu zuten prezioak etengabe igotzen ari direla, etxebizitzara sartzea geroz eta zailagoa dela eta auzoak bizitzeko eremu izatetik negozio-eremu izatera pasatzen ari direla. Testuinguru honetan, jakinarazi zuten Mazabi funts putreak haien etxebizitzetako beheko solairuak erosi dituela, negozio egiteko asmoz: “Etxebizitza duinak eskaintzeko izan zitezkeen espazioak bahitu eta coliving, denboraldiko alokairu edo etxe turistiko bihurtu nahi dituzte. Ez gaude ados”.

Agerraldian bi mezu nagusi helarazi zituzten. “Lehena, Mazabiri: atera zuen negozioak gure etxeetatik. Ez zaituztegu nahi eta antolatuta gaude”. Bigarrena, udal gobernuari: politika publikoak aldatzeko eta etxebizitza bizitzeko lehentasunezkoa izan dadin neurriak hartzeko eskatu zioten, horrelako egoerei muga jartzeko. “Negozioa eteteko garaia da”, nabarmendu zuten alde zaharreko auzokideek.

Azken aldarri bat ere egin zuten: “Gure egoera berdinean edo antzekoan daudenei antolatzeko deia luzatzen diegu. Negozioa egin nahi dutenei modu kolektiboan egingo diegu aurre. Gu ez gara lehenak, eta gehiago ere etorriko dira”, ohartarazi zuten.

LABek gogorarazi zuen urte hasieran erabaki zuela etxebizitza problematikari aurre egiteko ekintza sindikala bultzatzea, eta ordutik hainbat gatazka kolektibotan parte hartu du: alokairuen prezioa jaisteko negoziazioetan, etxegabetzeei aurre egiteko ekimenetan eta klausula abusiboen aurkako neurrietan. Atzokoa izan zen hilabeteetako bide baten lehen urrats publikoa, borroka berri baten hasiera. 

LAB sindikatuak Nafarroako ordezkaritza sindikalaren %18 lortu du lehenbizikoz, ia 1.300 delegaturekin

Zubiate(e)ko Aritz
-
0
LAB sindikatuak Nafarroako ordezkaritza sindikalaren %18 lortu du lehenbizikoz, ia 1.300 delegaturekin

Gobernuak hilero ematen dituen datuen arabera, iragan uztailean, LABek Nafarroa Garaiko ordezkaritza sindikalaren %18ra ailegatzea eta gainditzea lortu zuen, 1.297 delegaturekin. LAB sindikatuak Foru Komunitatean inoiz izan duen ordezkaritzarik handiena da hori, delegatu kopuruan zein ehunekoan.

Hauteskunde sindikalen nolakotasuna dela-eta ‒enpresa bakoitzak bere erritmoak baitaramatza‒, zaila da ordezkaritzaren ehunekoetan berehalako aldaketak gertatzea. Kontrara, aldaketak oso mantso izaten dira. Hala ere, aipatzekoa da azken urteetan LAB izan dela Nafarroan gehien hazi den sindikatua. Izan ere, 2008an 827 delegatu zituen (%12,48) eta 2025eko uztaila 1.297 delegaturekin bukatu zuen (%18,09).

2021 eta 2022 urteetan LABek halako geldialdi bat izan zuen bere hazkundean eta, delegatu kopuruari eutsi bazion ere, ehunekoan behera egin zuen. 2023 eta 2024 urteetan, aldiz, %18tik hurbil bukatu zituen, eta, azkenean, 2025eko uztailean lortu du hori gainditzea. Abuztuko datuek berresten dute LABek ehuneko hori mantentzen duela, eta horrek erakusten du sindikatu abertzalea %18 inguruan finkatu dela.

Azken lau urteetan, lau sindikatu nagusiek lortu dute delegatu kopuru absolutuetan gora egitea; nabarmen gora, eta horregatik Nafarroa osoko delegatu kopurua 7.000 baino gehiagokoa da aspaldi (2025eko uztailean 7.168 izan ziren). Baina LAB izan da ehunekoan gehien igo dena.

LABek badaki Nafarroako lau sindikatu nagusien artean laugarrena dela. Baina, era berean, jakin badaki orokorrean bere indarra oso beharrezkoa dela eta anitzetan nahitaezkoa ere izaten dela enpresetan edo sektoreetan gehiengoak osatzeko eta borrokak aurrera ateratzeko. Nabarmenentzekoa da, adibidez, Foru Administrazioko lehen sindikatua dela 77 delegaturekin, lehen indarra dela baita enpresa publikoetan ere, Nafarroako ikastoletan delegatu guztiak dituela, Esku-hartze Sozialean ordezkaritza osoaren %70 duela, edota Laneratze eta Gizarteratze enpresen sektorean delegatuen %63 duela, eta nekazaritza-abeltzaintza enpresetan lehen indarra izatetik oso hurbil dagoela ‒eta bere babesa nahitaezkoa izan zela azken hitzarmena onartu ahal izateko‒. Adibide gutxi batzuk baino ez dira horiek.

LAB sindikatuak, hauteskundeetan parte hartzen duen heinean, gero eta delegatu gehiago izan nahi ditu, noski. Baina ez sindikatua helburu bezala ikusten duelako, baizik eta sindikatua aldaketarako tresna garrantzitsu gisa ulertzen duelako. Eta tresna horrekin jarraituko du LABek, batetik, lan harremanak eta baldintza sozialak duintzearen aldeko eta prekarizazioaren kontrako borrokan, eta bertzetik, aldaketa sozialaren aldeko borroka bultzatzen.

1...202122...1,582Page 21 of 1,582

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus