Pasa den azaroan, Novadeco enpresak langile bat kaleratu zuen. Gure ustez, bi arrazoi zeuden enpresaren erabakiaren atzean. Batetik, langile hau hauteskunde sindikaletan LABen zerrendan joan zen; eta bestetik, aurreko udaberrian sexu-genero trantsizioa abiatu zuen.
Abenduaren 22an egindako adiskidetzean, enpresak onartu zuen kaleratzea bidegabea izan zela, baina ez zituen ontzat eman LABek azaldutako arrazoiak. Honen aurrean, LABek epaitegietara eraman du gaia, ulertzen duelako langilearen oinarrizko eskubideak urratu dituela enpresak eta kaleratzea baliogabea izan dela aitortu dadin.
Gaur egin da epaiketa, eta LABek kontzentrazioa egin Gasteizko epaitegien aurrean, kaleratutako langileari babesa erakutsi eta transfobiarik onartuko ez duela adierazteko, ez Novadecon ez beste inongo lantokitan.
Eli Etxeberria LABeko idazkari feministak, mobilizazioan egindako adierazpenetan, identitate sexu-generikoa zein orientazio sexuala edota genero adierazpenagatik diskriminazioak ekiditeko protokolen beharra adierazi du.
“Enpresek lan esparru osasuntsuak eta seguruak bermatu behar dituzte eta horrek lan zentroek transfobiarik gabeko espazioak izan beharko lukeela esan nahi du, eta enpresetan trantsizioa egiten dutenen langileei babesa ematea eta eskubide guztiak bermatzea”, gaineratu du Etxeberriak.
Era berean, adierazi du LABek “ez duela onartuko lantokietan langileen oinarrizko eskubideen urraketa, genero autodeterminazioa ukatuz”.
Argi gelditu zen adiskidetze bileran Novadeco enpresak ez dituela eskubideen alde borrokatzen dituzten langileak nahi.
Azkenik, horrelako egoera batean dauden LGTBI+ kolektiboko langileak animatu ditu LABeko idazkari feministak aurrera egin dezaten, “bide horretan LABkideok ondoan izango gaituzte eta”. Era berean, eskerrak eman dizkio Gasteizko Mugimendu Feministari zein LGTBI+ mugimenduari, laguntza, presentzia eta babesagatik.