Zortzi hilabete eta gero mahi sektoriala deitu gabe, gaur izan dugu bilera. Lehenengo eta behin, deialdiaren formak salatu behar ditugu, oso berandu jaso dugulako deialdia eta gai- ordena, ia prestatzeko denborarik gabe. Bestaldetik, gai-ordenaren lehenengo puntuan Osakidetzak jaso egin du negoziatzeko eskaintza. Aurrekoetan ere honelaxe egin du, baina iruzur hutsa izan da eta “negoziatzeko” gutxi eskaini digu. Izan ere, urte hauetan guztietan Osakidetzak negoziazio kolektiboaren eskubidea behin eta berriro urratu du eta inposaketaren bidetik jo. Gaur egun, bide beretik doa eta, adibidez, Urdulizko zenbait zerbitzu berriki pribatizatu egin ditu, langile eta sindikatuei inolako azalpenik eman gabe.
Guk negoziazio erreala aldarrikatzen dugu eta Osakidetzari oinarrizko 5 puntuko negoziazioa mahai gainean ipini genion aurreko legintzaldian. Bost puntu horiek berresten ditugu: 1. Lan baldintzen akordio berria, 2. Enplegu plana, 3.Kontratazio akordio berria, 4. Euskarari errespetua , eta 5. Pribatizaziorik ez. Bost puntu hauetan jasotzen dira urteotan ezarritako murrizketa, eskubide urraketa eta pribatizazio horiek guztietan atzera egiteko aukera.
Gaurko mahai sektorialean Osakidetzak egin duen negoziazio proposamenak gure eskaera batzuk jasotzen ditu, hala nola EPE berriak eta formatoa aldatu; kontratazio akordio berria edo lan-baldintzen akordioa berria. Baina ez du jasotzen euskararen gaia eta pribatizazioena ere (soilik aipatzen da martxan ipintzea “externalizazio” batzorde bat). Osakidetzari jakinarazi diogu guretzat pribatizazioen kontua marra gorria dela.
Gakoa da benetako negoziazio aurrera eramateko asmoa. Osakidetzako zuzendaritzak negoziatzeko borondatea badauka, LABek bertan hartuko du parte. Honela ez bada eta iruzur berri baten aurrean bagaude, urte hauetan bezala, LAB aurrean izango dute, osasun publikoa eta kalitatezko lan-baldintzak borrokatuz.