NDF, soldatak murrizteko bere azken proposamenarekin, zein Espainiako patronala, mugagabeko kontratuak murrizteko proposamenarekin, beste behin ere etekina atera nahi diote kiris egoerari, irabazi enpresarial eta finantzieroko marjina hobetzeko.
Ez daitezela inor engainatzen saiatu neurriokin irabazi sozialen bat bilatzen dutela aipatuz, bilatzen duten bakarra langileriaren kontura aberastea delako, hau da, gizartearen gehiengoaren pobretze eta prekarizazioaren kontura.
Izan ere, aipatu proposamenak ez dira berriak. Krisiaren aitzakiatan honezkero ezarri diren errezetak dira. Horren erakusgarri dira etengabeko lan erreformak, negoziazio kolektiboarenak eta zerbitzu publikoenak, honezkero ezarri direnak eta eurekin ekarri dutenak enplegua are gehiago desarautzea, erosteko ahalmena eta funtsezko berme sozialak galtzea, eta patronalaren irabazi eta posizioak hobetzeko baino balio izan ez dutenak.
Patronalak ez dauka neurririk. Gobernuen lankidetza osoa dute, euren legeekin Corrugados Azpeitia, Troquenor, Inasa edo Incoesakoaren antzerako egoerak ahalbidetzen dituztenak. Kasu hauetan, enpresak bideragarriak izan arren, deslokalizatu daitezen desmantelatzen dira, lanpostuen galeraren kontura, honek herri mailan duen eraginarekin.
Enplegua sortu eta langileriari berme gehiago emateko, herri honetan pribilegioak dituzten bakarrak diren elite ekonomiko-finantzieroetako kideei egin behar zaizkie murrizketak.
Zentzu honetan deia eta oharra egin nahi diogu euskal patronalari. Orain arte bezala CEOEren aholkuak jarraitu nahi badituzte eta soilik euren interesak defendatzen dituen legeria aprobetxatu, Euskal Herrian gero eta gatazka sozial eta laboral gehiagori egin beharko diote aurre. Langileria nazkatuta dago eskubideen murrizketez, eta gainera, Euskal Herrian badago mugimendu sozial eta sindikala haserre hau bideratu eta gatazkak handitzeko.
{module[111]}