Kontseilari nahiz Zuzendari Orokorrak hautatzeko Gobernuak ezarritako profilarekin ez dator bat LAB. Nafarroako Gobernuaren izendapenetan kudeatzaileak hautatu dira eta ez jendarteak behar eta eskatzen dituen aldaketak lideratzeko gai izango diren pertsona berritzaileak. Eman daitezkeen izendapen edo aldaketen aurrean LABek Gobernuari ordezkaritza sindikalarekin kontrastea egiteko beharrezko denbora hartu dezala eskatzen dio.
Komunikabideen bidez Nafarroako Gobernu berriaren egitura eta izendapenak ezagutu ostean LAB sindikatuak honako balorazio hau egiten du:
1. Kontseilari nahiz Zuzendari Orokorrak hautatzeko Gobernuak ezarritako profilarekin ez gatoz bat. Salbuespenak salbuespen, profil ustez neutro eta praktikan kontserbadoreak bilatu dira, pertsona gaitu eta era berean sozialki konprometituak bilatu beharrean; kudeatzaileak hautatu dira, jendarteak behar eta eskatzen dituen aldaketak lideratzeko gai izango diren pertsona berritzaileak hautatu beharrean; areago eta gehiago, hainbat kasutan aurpegi zaharren aldeko apustua egin da, UPNren ereduarekiko alternatiba eraikitzeko erabat desegokiak direnak. Sail bakoitzaren azterketan sartu gabe, geure kezka azaldu nahi dugu Hezkuntza eta bereziki Osasun sailetan egondako izendapenekin, non aurreko Gobernuetako kudeatzaileak izendatu diren, baita osasungintza pribatuarekin lotura duenik ere. Era berean, kezkagarria iruditzen zaigu Ekonomia eta Ogasunaren arlo estrategikoaren konposaketa, Gobernua babesten duten 26 legebiltzarkideen eskuinera dagoen sektore minoritarioak hartu baitu honen kontrola.
2. Begi onez ikusten dugu Gobernu berriak bere langileekiko adierazitako elkarrizketarako borondatea, esaterako Funtzio Publikoko sindikatu guztiei negoziazio kolektiboa eta enplegu eskaintza publikoaren inguruko proposamenak eskatuz. Alabaina, borondate hori ez dator bat Gobernu egitura ordezkaritza sindikalarekin kontrastatu ez izanarekin.
3. Jakin dugunez, Gobernuak abuztuaren amaierarako zehaztuko du hurrengo mailetako egitura, jarraian izendapenak egiteko. LABetik hiru eskari egiten dizkiogu Gobernuari: lehenik eta behin, egitura hori ordezkaritza sindikalarekin adostu dezan; bigarrenik, Akordio Programatikoaren ildoan, burutzak nabarmen murriztea eskatzen dugu, bere menpe langilerik ez duten horiek nahiz behar bezala justifikatuta ez daudenak ezabatuz; hirugarrenik, oinarrizko buruzagitzak langileek beraiek hautatu ditzaten aldarriaktzen dugu, esaterako ikastetxeetako zuzendaritzekin gertatzen den bezala.
4. Aurreko puntuan azaldutakoa posible izan dadin, bere egutegia aldatu eta erabakiak atzeratu ditzan eskatzen diogu Nafarroako Gobernuari. Edozein aldaketa edo izendapenari ekin aurretik, Gobernuak beharrezko denbora hartu beharko luke ordezkaritza sindikalarekin kontrastea egiteko.