Denbora gehiegi daramagu PNV eta PSOEk osatzen duten Diputazioak Buruntzaldea-Tolosa-Donostian autobus zerbitzu publikoko emakida berria martxan jartzeko zain.
2017ko abuztuan Diputazioak aurreproiektua publikatu zuen, izugarrizko murrizketak aurreikusten zituena, eta autobusetako langile zein herritarren inplikazioari esker, honen aurkako 7.000 sinadura eta 4.000 alegazio bildu ziren Hernani eta inguruetako herrietan.
Indar metaketa honi esker, aurreikusten ziren murrizketak gutxitzea lortu bazen ere, oraindik ez da horiek guztiz bertan behera uztea lortu, azken Pleguetan ikus daitekeen moduan, G4 gaueko linearen desagerpena eta gainontzeko linea guztietan zerbitzuak nabarmen murriztearen ideiarekin jarraitzen baitute.
PNV eta PSOEk 2019 hasierarako martxan egotea espero zen emakida hau atzeratzea erabaki dutela dirudi, baliteke hauteskunde garaian horrelako murrizketa neurriak hartzea ez delako estrategia elektoral egokia, baina murrizketen aplikazioa uste baina gehiago luzatzen ari badira ere, gogora ekarri behar dugu oraindik ere hauen aplikazioa aurreikusten jarraitzen dutela.
Badirudi Aldundiari bost axola diotela paralizazio eta ezjakintasun egoera honek berarekin dakartzan ondorio larriak; Enpresa hitzarmenak guztiz blokeatuak egotea (emakida martxan egon arte ezin baitira langileen lan baldintzak hobetzen dituzten paktuak adostu), enpresek beren autobusetan inbertsiorik ez egitea (autobusetan hondamendi nabarmenak eta segurtasun arazo larriak eraginez), langileek beren lanpostuekin zer gertatuko den ez jakitea eta abar.
Guzti honen ondorioz, orain arte Aldundiari zuzenduriko eskaerak ziren hauek, dagoeneko exijentzia bilakatu dira:
– Erakunde publiko bat den heinean, irizpide ekonomiko soilen gainetik, interes soziala eta kalitatezko zerbitzu publiko baten bermatzea lehenestea beti.
– Gutxienez gaur egun dauden autobus zerbitzuak bermatzea, murrizketak bertan behera utziz.
– Prozesua denbora luzez geldi egoteak ekarri dituen ondorio larrien erantzukizuna bere gain hartzea eta honi irtenbide efektiko eta azkar bat ematea.