Greba eta mobilizazio eguna izan da gaur Katalunian. Euskal Herrian ere gure babesa adierazi nahi izan diegu egunez egun mobilizatzen ari diren guztiei, Horregatik gu ere kalera irten gara. Euskal Gehiengo sindikalaren deialdiari erantzunez milaka lagunek erabakitzeko eskubidea ozen aldarrikatu dute hego Euskal Herriko hiriburuetako kaleetan.
Catalunyan nahiz Euskal Herrian, herriak erabaki
Urriaren 1eko erreferenduma demokrazia kontua zen. Herriari hitza eman eta errespetatzea horixe da: demokrazia. Jakina zen Katalunia salbuespen egoeran aurkitzen zela. Aurreko asteetan ere errepresioa izan da estatuaren erantzuna, baina atzokoan urrats bat aurrerago joan da Gobernu espainiarra. Estatu espainiarrak, demokraziari estatu kolpea eman dio, oso larria izan zen atzo pasatakoa. Irudiek islatzen dituzten gertakariek frankismo garaietara garamatzate.
Irudi gogorrak eta lotsagarriak ikusi genituen, bere burua demokratatzat duen edonor asaldatzeko modukoak. Modu baketsu batean bozkatzeko eskubidea egikaritu nahi zuten herritarren kontra Polizia Nazionala eta Guardia Zibilaren oldarraldia ikaragarria izan zen, erabat desproportzionatua eta injustifikatua. Zaurituei gure elkartasuna adierazi eta azkar osatzea opa diegu.
Herri katalanak lekzio handia eman du; lekzio handia eman digu. Arrazoiaren indarra duen herri antolatu eta mobilizatua eta gertuago sekula egon izan ez diren instituzioak. Miresgarria da, salbuespen egoeran egonda, Kataluniako herritarrek izan duten jarrera. Aurreko asteko mobilizazioetan esaten zuten: bozkatu egingo dugu eta bai bozkatzera joandako jende kopurua zein baiezko kopurua ere azpimarratzekoak izango dira. Burujabetzara eramango dituen bidea geratuko duen errepresiorik ez dago, zilegitasun osoa dute, atzoko emaitzak eta gero, aurrera jarraitzeko. Atzo gertatutakoak indartu egiten ditu, eta mundo osoak errespetatu beharko ditu Kataluniako Parlamentak onartutako erabakiak.
Azken egun hauetan euskal gehiengo sindikalak behin eta berriro errepikatu du ezinezkoa dela estatuarekin erabakitzeko eskubidea bermatuko duen bide adosturik egotea. Ez PPren gobernuarekin, ez PSOE ez Cs-ekin. Ikusitakoak ikusita, atzo Urkullu lehendakariak egin zituen adierazpenak, ustezko ekidistantzia planteatuz, bere burua bitartekari bezala eskainiz, erreprimitzen duten eta errepresioa jasaten dutenen artean onartezinak iruditzen zaizkigu. Esaten du ez duela akordiorako arazorik ikusten, mundo guztiak ikusi duenean zein den Espainiako estatuko eskaintza: errepresio gogorra erabakitzeko eskubidearen egikaritzearen aurrean, inoiz ez diona Kataluniari onartuko, ezta Euskal Herriari ere.
Gu bai penatzen gaituztela Urkulluren adierazpenek; molestatu egiten gaituzte jazarriak direnengandik urrun kokatzen delako eta PPrekin dituen akordioei edozelan eutsi nahi dielako, demokratikoa ez den alderdi batekin. Berriro diogu: EAJk ezin da minutu batez gehiago alderdi hori sustengatu.
Egoeraren larritasunak hala eskatuta bihar urriaren 3an Katalunian greba orokor eguna dute. Gure ustez, Euskal Herrian ere mobilizatu beharra dugu.
Langileei dei egiten diegu katalanei gure babesa erakusteko, demokrazia eta erabakitzeko eskubidearen alde eta errepresioa eta estatuaren inposizioaren aurka. Mobilizatzen jarraitu beharko dugu.
ELA – LAB – ESK – Steilas –Etxalde – HIRU