LAB, ELA, CCOO eta UGT sindikatuok, kontsumitzaileen elkarteek, Bilboko auzo elkarteek eta gazte kolektiboek elkarretaratze bat egin dugu Bilbon, Alhondegian.

Mobilizazioaren helburua izan da salatzea alderdi politiko batzuk, Bilboko alkateak, multinazional handiek, kateek edo Bilbaodendak-en zuzendaritzak Basquefest gisako ekimenak baliatzen dituztela Bilbon merkataritza igande eta jai-egunetan zabaltzea bultzatzeko aitzakia moduan.

Edozein ekimen probesten dute euren hiri eta merkataritza-eredua bultzatzeko, nahi ez duguna eta bertan bizi garenoi onurarik ekartzen ez diguna.

Oraingoan, berriz probestu dute turismoa merkataritza jai-egunetan zabaltzearekin lotzeko, mezu faltsuak eta asmo alderdikoiak dituztenak botata.

Deitzaileen arabera, hiri eta auzo biziak nahi ditugu, bertan bizi eta lan egiten dugunok gure aisiaz gozatzeko aukera izan dezagun kontsumismoa bultzatu gabe eta oreka bati eutsiz. Hiri bizigarriak nahi ditugu.

Era berean, merkataritza eta kontsumo iraunkorra aldarrikatzen dugu gure hirirako, merkataritza txikiaren biziraupenaren alde ere egingo duena eta langileei, prekarietatera kondenatuko ez dituzten lan baldintzak izatea bermatuko diena.

Gainera, honakoa eskatzen dizkiogu Bilboko Udalari: herritarren zerbitzura eta ez multinazionalen zerbitzura egongo den hiri eredua sustatu eta arau dezaten, eta merkataritza bezalako sektoreak turismora baldintzatzeari utz diezaiotela.