Enpresa Batzordeak egoera “onartezina” dela salatu, eta abenduan mobilizazio-kanpaina bati ekingo diola iragarri du.
Mercedeseko Enpresa Batzordeak, ELA, LAB eta ESKren babesarekin, dei zuzena egin die langileei enpresan gertatzen ari den lan-harremanen gainbeherari aurre egiteko. Gehiegizko lan-kargak, akordioen etengabeko urraketak eta kontziliazioaren zailtasunak tartean direla, abenduan mobilizazioak hasiko dituzte, lanuzteak ere baztertu gabe.
2025eko abenduaren 1eko Enpresa Batzordearen osoko bilkuran, ELAk, LABek eta ESK-k honako egoera kezkagarriak mahaigaineratu zituzten: enpresaren akordio-hauste jarraiak, arrisku psikosozialen inguruko jarrera arduragabea, langileen sinaduren mespretxua 9. orduaren aurka, fabrikarako mugikortasunaren okertzea eta ETT bidez kontratatutako langileek baldintza berdinak ez izatea. Horri guztiari gehitu behar zaio lan-harremanen judizializazio gero eta handiagoa.
Sindikatuen proposamenaren bozketa honela geratu zen:
Alde: ELA, LAB eta ESK (20) — Abstentzioa: UGT, CCOO eta EKINTZA (9).
Gehiengoak erabaki du abenduan mobilizazio-dinamika bati heltzea, lan-uzteak barne hartzeko aukera zabalik utzita. Datozen egunetan zehaztuko dira ekimenak.
Batzordearen esanetan, iritsi da unea langileek eta Batzordeak elkarrekin esateko: aski da! Enpresaren jarrerak erakusten du, eguneko presioa horrelakoa bada, are okerragoa izango dela etorkizun hurbilean. Ez dago hurrengo hitzarmenerako zain egoterik: gaur egun bete gabe dauden konpromisoak bete daitezen borrokatu behar da.
Langileek bizi dituzten egoeren artean daude gozamen-egunen ukapena, lan-presio etengabea, kontziliazio-zailtasunak, osasun mentalaren mespretxua, aparkatzeko arazo larriak, autobus-zerbitzuaren okertzea, dagokien lizentzien ukapena edo malgutasun gehiegizkoa. ETT batek ustiatutako lankideak izatea ere ohiko bihurtzen ari da.
Horregatik, Batzordeak argi dio:
Banaka kexatzea alferrikakoa da. Protesta kolektibo eta antolatua da enpresari argi eta ozen esateko bide bakarra: ASKI DA!