Sindikatua eraiki, herria eraiki lelopean egin du bere IV. Kongresua Andaluziako SAT sindikatuak; ekintza sindikalean jauzia emateko eta kapitalismoa gainditzeko Andaluzia burujabearen norabidean aurrera egiteko bokazioarekin.
Kongresua borroka sindikalean zein politikoan erreferentea den Marinaleda herrian izan da. Hala, LABen ordezkaritzak bilera bat izan zuen Sergio Gomez alkatearekin etxebizitza, nekazaritza kooperatiba eta zerbitzu publikoen politiken inguruan aritzeko. LAB sindikatuak SATekin eta Espainiako Estatuko gainontzeko sindikatu soberanistekin duen aliantza berresten du, soberanistak eta soziopolitikoak diren eta ekintza sindikala borrokan zein kontraboterean oinarritzen duten klase sindikatuen arteko aliantzak ezinbestekoak baitira gure herrien askatasunean aurrera egiteko.
LAB sindikatuak zoriondu nahi du aukeratutako zuzendaritza berria eta berrautatua izan den Oscar Reina bozeramaile nazionala: desiorik onenak Andaluziako herriaren eskubide nazional eta sozialen aldeko borroka oparoa izan dadin.
Kapitalismoaren bilakaera autoritario eta faxistari elkarrekin aurre egiteko beharra dugu, partekatzen dugun sindikalismo feminista, antirrazista eta ekosozialista antidotorik onena delakoan. Beraz, borroka horretan elkarrekin bat egiten jarraitzeko apustua egiten du LABek. Orain arte egin dugun bezala, Euskal Herriko landa eremura aldi baterako lana egitera etortzen diren SATeko afiliatuak LABeko afiliatuak izanen balira hartuko ditugu, lan eta bizi baldintza duinak izan ditzaten. LAB sindikatuko ateak beti zabalik egonen dira Andaluziako langileentzako.
Marinaleda, utopia ametsa bakarrik ez dela erakusten duen adibidea
Berriki ālangileen alde etxebizitzaren negozioa etenā etxebizitzaren inguruan jorratzen ari den ildoa aurkeztu du LAB sindikatuak. Hala, Marinaledako alkatea den Sergio Gomezekin izandako topaketan etxebizitza politikaren inguran Marinaledako esperientziak jasotzeko aukera izan du LABek. Eta ondorioa argi da, langileen aldeko etxebizitza politika ezberdin bat egitea posible da. Marinaledan, bi formula ezberdin erabiliz (medio propioekin edo kooperatiba baten bidez) etxebizitza publikoak eraikitzen dituzte 15 euroko alokairuarekin.
Bestalde, zerbitzu publikoei dagokionez, biztanle guztientzat zerbitzu publiko duinak bermatzeko, demokrazia ekonomikoan oinarritutako politika ezagutu genuen. Amaitzeko, Marinaledaren proiektu politikoaren parte den nekazaritza kooperatibaren jarduera praktikoa ere ezagutzeko aukera izan genuen. Lurra eta produkzio bideak langileen esku uzten ditu eta herrian enplegu osoa lortzen du.
LAB sindikatuak, ordezkatzen duen euskal sindikalismo eraldatzailetik, bere babesa, elkartasuna eta konpromisoa adierazten dio Marinaledari, baita demokrazian sakontzeko eta justizia sozialean oinarritutako eredu ekonomiko eta sozial alternatiboa eraikitzeko praktikarekin ere.