LABentzat albiste ona da hasieratik publikoak izan behar zuten etxebizitzek babes ofiziala ez galtzea eta gaur maizterrekin antolatuta duen asanbladan aztertuko ditu iragarpen honen xehetasunak.
Borrokak eta antolakuntza kolektiboak emaitzak ematen dituela berretsi du Donostiako Benta Berri auzoko maizterrei egonkortasuna emango dien iragarpenak: atzo jakin zen Eusko Jaurlaritzak akordioa egin duela Testarekin, Blackstone putre funtsaren filialarekin, auzo horretako babes publikoko 510 etxebizitzen gainazal eskubidea erosteko, eta, hala, etxebizitza horien babes publikoari eusteko. Lehenik eta behin, LABek Benta Berriko maizterrak zoriondu nahi ditu euren borrokagatik.
LABentzat berri ona da Testak mehatxatutako maizterrek euren etxebizitzei eustea eta etxebizitza horiek parke publikora igarotzea. Horiek horrela, oraindik akordio honen eduki zehatza ezagutu behar da; erosketaren baldintzak zein diren, zer nola integratuko diren parke publikoan eta bereziki maizterren alokairu baldintzak zein izango diren. LABek gogoratu nahi du Eusko Jaurlaritzako Etxebizitza Sailak diru publikoarekin bi aldiz ordaindu dituela aipatutako etxeak, eta 100 milioi eurorekin gizendu duela Testa putre funtsa. Izan ere, lur publikoaren esleipenaren bitartez eraikitako etxebizitzak putre funts baten esku amaitu izanak erakusten du Eusko Jaurlaritzak urtetan zer-nolako etxebizitza politika egin duen, eta, orain, bere jabetzakoak beharko luketen etxebizitzak erostera diru kantitate izugarria bideratzea salagarria da; are, kontuan izanda diru kantitate horrek Blackstone putre funts erraldoiaren filiala den Testaren poltsikoetan amaituko duela.
Horregatik, LABek uste du putre funtsen esku geratutako etxebizitzak desjabetu egin beharko lituzkeela Eusko Jaurlaritzak, eta horien titulartasuna eta kudeaketa bere gain hartu beharko lituzkeela, kontratuak eta prezioak egungo errealitate ekonomikora egokituta. Horixe baita errentismoari eta oro har espekulazioari amaiera emateko norabidean hartu behar diren egiturazko eraldaketen zentzua.
Esan bezala, LABek jaurlaritzak egindako akordioaren letra txikia aztertuko du eta aurrez deituriko asanblada irekia egingo du gaur Benta Berriko maizterrekin batera, 18:30ean, Jose Maria Sert plazan. Iragarpena egi bihurtu eta bide horretan maizter guztien interesak defendatzeko borrokan jarrituko du sindikatuak.
Espekulazioarekin amaitu eta putre funtsak desjabetzea eta Euskal Herritik kanporatzea izango da, hain justu, azaroaren 11ko greba orokorrean LABek egingo duen aldarrikapen nagusietako bat. Horretarako neurri eraginkorrak eskatuko dizkie Eusko Jaurlaritzari eta Nafarroako Gobernuari.
