Bihar Urtarrilak 24 Brasilgo Lula presidente ohia epaituko dute balizko ustelkeria kasu bat dela medio. 9 urte t’erdiko sententzia berretsiko balitz Lulak ezingo luke berriro ere hauteskundeetarako hautagai izan. Brasilen urrian hauteskunde presidentzialak egonen dira eta Lulak hauteskunde hauetan bozka gehien lortzeko aukera handiak ditu berriro ere presidente izateko aukera handiak izanen zituelarik.
Bere kontrako ustelkeria frogek ez dute pisurik eta epaiketa honen atzean Lula politikoki jokoz kanpo uzteko asmo garbia ikusi daiteke. Lehenik Dilma kendu zuten inpeachment baten bitartez, haren aurkako ustelkeria frogarik gabe eta orain epaiketa politiko honen bitartez Lula jokoz kanpo utzi nahi dute.
Gure ustez honen atzean dagoena Brasilen eta oro har Hego Amerikan aurreko hamarkadan egondako aldaketa prozesuak indargabetzea da, inperialismo Estatu Batuarraren interesen zerbitzura egonen diren gobernuak ezartzeko. Argentinan Macrirekin lortu zuten, Brasilen Temerren gobernuarekin beraien txontxongilo bat jarri zuten eta orain Lula erditik kendu nahi dute, Venezuelan indarrez gobernua botatzen saiatu ziren eta Hondurasen iruzur elektorala eta herriaren kontrako errepresio bortitza erabiltzen dute ezkerreko alderdiak gobernura iritsi ez daitezen.
Guk LABetik Lularen kontrako epaiketa politiko hau salatu nahi dugu. Brasilen jokoan dagoena ez da nork gobernatuko duen demokrazia bera baizik. Denek aukera berdintasunean hauteskundeetara aurkezteko eskubidea dute eta horretarako Lularen kontrako jazarpen politiko/judizial honek bukatu egin behar du.