ADEGIk blokeatuta du grafikagintza sektoreko negoziazio-mahaia. Honen aurrean, sektoreko langileok mobilizazioetara eta grebara joatea beste erremediorik ez dugu. Horrela, sektoreko lehen indarra den LABek, lau greba deituko ditu Gipuzkoako grafikagintzan: irailaren 27an eta 29an eta urriaren 4an eta 6an. Era berean, irailaren 16ean elkarretaratzea egingo du 11:00etan, Tolosako SAM enpresaren aurrean eta 20an Elduaienen, 11:00etan, CORENSOren aurrean.
Azken bilera maiatzean izan zen eta hartan patronalak soldata igoera oso eskasak proposatu zizkigun, eta gainerako edukien inguruan ere, inolako aurrerapenik eskaini gabe.
Hauxe da ADEGIren azken proposamena: 4 urtetako iraupena eta soldatei dagokienez, % 3ko igoera 2022rako; KPIaren igoera 2023rako, % 2ko mugarekin; KPIaren igoera 2024rako, % 1eko mugarekin eta KPIaren igoera 2025erako, % 1eko mugarekin.
Soldata hauek ez dute inondik inora sektoreko langileen erosteko ahalmena bermatzen, are gehiago langileon poltsikoetan bizitzaren garestitzea nabaritzen ari garen honetan.
Horregatik, argi dugu patronala mugitu nahi badugu eta gure hitzarmenean hobekuntzak lortu nahi baditugu, hau da sektore osoa kalera irten eta bizi dugun egoera salatu behar dugun unea. Bestela, inolako hobekuntzarik gabe jarraituko dugu, eta hitzarmena erabat blokeatuta.
Borrokatzeak beti merezi duelako, dei egiten diegu sektoreko langileei greba eta mobilizazioetan parte hartzera.