2024-06-25
HomeEkintza SindikalaLangileok hezkuntza legean eragiteko aukera irekitzea lortu da

Langileok hezkuntza legean eragiteko aukera irekitzea lortu da

Kezkaz eta harriduraz hartu dugu sindikatu batzuek aukera hori baliatu nahi ez izatea.

Hezkuntza Sistemak behar dituen eraldaketa sakonak bultzatzeko langileok ezinbestekoak gara. EAEn Hezkuntza Legearen eztabaida ireki zen momentutik LABek argi esan izan du bere hastapenean prozesuak bi hutsune nagusi izan dituela. Batetik, hezkuntza komunitatea osatzen dugun sindikatuokin eztabaida eta adostasunak bultzatzeko ez da inolako gunerik egon, eta, gure ustez, eremu politikoan lor daitezkeen adostasunetara mugatzea ez da nahikoa. Bestalde, langileen lan baldintzak hobetzearen inguruan ez zen ezer jasotzen.

Modu batean edo bestean, sindikatu guztiok bat egin dugu ideia horiekin. Gogoratu behar da Hezkuntza Legea langileokin eraiki behar dela aldarrikatu izan dutela.

LAB lehen sindikatua da hezkuntza publikoan eta Ikastoletan. Mahai Sindikal baten beharra azpimarratu izan dugu hezkuntzako langileen lan baldintzen inguruko oinarrizko adostasunak erdiesteko eta Hezkuntza Legea hobetzeko ekarpenak egin ahal izateko. Mahai sindikalean landutako gai laboralak, negoziazio eremu bakoitzeko aldarrikapen zehatzagoekin batera, mahai sektorialetan garatu beharko lirateke hemendik aurrera, mahai sindikal horrek ez baitu inolako negoziazio mahairik ordezkatuko.

Mahaia Hezkuntza eta sindikatuen arteko foroa da. Ez du zerikusirik LABek begi onez ikusten ez duen eta Legean jasoa dagoen Aholku Batzordearekin. Ez dugu partekatzen itunpeko patronalekin langile publikoez hitz egitea, ezta itunpeko langileez Kristau Eskola eta Ikastoletako zuzendaritzekin aldi berean hitz egitea ere.

Greba eta mobilizazioek Hezkuntza Saila mugiarazi dute eta Mahai Sindikala deitu behar izan du. Sindikatuok ekarpenak egin eta akordioak erdiesteko orain arte ez zegoen eztabaida gune bat sortu da eta horrek bide bat ireki du hurrengo urteetarako hezkuntzako langile guztien —publikoen, ikastoletakoen eta gizarte ekimeneko ikastetxeetakoen zein azpikontrataturik daudenen— lan-baldintzetan eragiteko. Bestela esanda, mahai negoziatzaile bakoitzean lan-baldintza hobeak lortzeko aukerari ekiteko. Hezkuntza Legea langileekin eraikitzeko aukera irekitzea lortu da, eta, zalantzarik gabe, egindako greba eta mobilizazioak izan dira horretarako giltzarri. Hori dela eta, kezkaz eta harriduraz ikusi dugu sindikatu batzuek aukera hori baliatu nahi ez izatea.

Bileraren gai zerrendan langileentzat oso garrantzitsuak diren gaiak jarri dira eztabaidagai: sare publikoko langileen enplegua mantentzea, egonkortasuna (behin-behinekotasuna %5tik igoko ez dela bermatzeko neurriak), soldatak eta euskalduntzea; azpikontratatutako zerbitzuak; itundutako sareko langileen sarbidea, homologazioa edo publifikaziorako araudia, esaterako.

Ulergaitza da mahai sindikalak bere bidea egin dezan oztopatzea eta berriro ere prozesuaren hasieran salatu izan duten puntu berera bueltatzea. Hau da, sindikatuekin eratu beharreko eztabaida markorik gabe geratzea. LABek jarraituko du honelako eztabaida marko orokorraren beharra defendatzen, negoziazio mahai sektorialetan langileen lan baldintzak hobetzen eta Hezkuntza Legea hobetzeko ekarpenak egiten. Baita, beharrezkoa denean, mobilizazioak bultzatzen ere.

AZKEN ALBISTEAK | ĂšLTIMAS NOTICIAS

Ilundain gizarteratze eta laneratze enpresarekin adostu dugu bigarren hitzarmenak erosteko ahalmena bermatzea eta atxikimendu sozioafektiboa barne hartzea

Hilabete batzuetako negoziazioen ondoren, LAB sindikatuan —ordezkaritza sindikal osoa baitugu— akordioa lortu dugu Nafarroako Ilundain gizarteratze eta laneratze enpresarekin, bere bigarren hitzarmena sinatzeko. Hitzarmen horrek nabarmen hobetzen du aurrekoa, soldata taula osoan KPIaren igoera ziurtatzen du, eta, lehenbiziko aldiz, aukera ematen du langile bakoitzak ordaindutako baimenak lor ditzan ahaidetasunik gabeko pertsonen zaintzarako.

Zerbitzu publikoak indartzeko hitzetatik ekintzetara pasatzeko eskatu diegu EAEko erakunde eta alderdiei

Sindikatuok elkarretaratzea egin dugu gaur Espainiako Gobernuak Gasteizen duen ordezkariordetzaren aurrean, enplegua eta langile publikoen soldatak hemen erabakitzea aldarrikatzeko.

Duela hamar urte eroritako Nafarroako Industria Grafikoaren hitzarmen kolektiboa berreskuratzearen alde gaude

Gaur goizean Iruñean eman dugun prentsaurrekoan azaldu dugu Nafarroako Industria Grafikoaren hitzarmena 2014an erori zela, eta ordutik sektoreko langileen lan baldintzek nabarmen egin dutela okerrera. LABen uste dugu badela garaia tresna hura berreskuratzeko eta langileen baldintzak duintzeko; horregatik, udaren bueltan sektoreko intersindikala deituko dugu.