LABeko kide den Patxi Bengoaren kontrako auzia dela eta, LAB sindikatuak elkarretaratzea egin zuen atzo Bilboko epaitegien aurrean jazarpen sindikala salatu eta auzipetuari elkartasuna helarazteko.
• Lehenik eta behin, LAB sindikatuaren izenean gure babes osoa eman nahi diogu Eusko Jaurlaritzan gure delegatua den Patxi Bengoari.
• Bigarrenik, salatu behar dugu gure delegatuaren kontrako jazarpen sindikala, hain zuzen beti sindikalista aktiboengan kokatzen den jazarpena. Eta hori da Patxiren kasua: oso delegatu aktibo eta konprometitua, beti dena emateko prest, bai atal sindikaleko edozein lanetan, negoziazio mahaian edo edozein aldarrikapen sozialetan.
Eta horregatik zigortu nahi dute Patxi Eusko Jaurlaritzako agintariek.
• Gainera gertakari hau sortu zen orain dela urte eta erdi, 2011ko abenduan Mahai Orokorraren negoziazio prozesuaren erdi-erdian, eta orain gure delegatuaren kontrako epaiketa aktibatu da hain justu berriro ere Mahai Orokorraren negoziazioak geldirik dauden unean eta mobilizazio dinamika baten erdian.
Patxi Lopezekin inposizioa eta murrizketak jaso genituen eta orain Urkullurekin ere inposizioa eta murrizketak berriz. Eta bai batarekin zein bestearekin gure delegatuaren kontrako jazarpena mantendu da.
• Hirugarrenik, salatu behar dugu ere kargu publiko batzuen jarrera, ez dutela politika ulertzen herritarroi zerbitzu publikoa emateko bide gisa, onura pertsonalak lortzeko bide gisa baizik. Eta horrela, ez da etikoa Eusko Jaurlaritza administrazioko gainontzeko langile guztioi eskubide bat kentzera doanean, hain justu Eusko Jaurlaritzako konfiantzako kargu publiko den pertsona batek informazio horretaz baliatzea eskubide hori eskatzeko.
• 2011ko abenduan Patxi Lopezen gobernuak murrizketa gehiago eta bortitzago egitearekin mehatxatu zituen ordezkari sindikalak, hauek onartzen ez bazituzten Jaurlaritzatik erabakitako murrizketa-neurriak. Eta horrela gertatu zen! Jaurlaritzak 2012rako borondatezko aurrejubilazioetarako primak irakasle guztiei kentzea erabaki zuen. Eta Hezkuntza Saileko Kabinete burua zen Javier Nogalesek aurrejubilazioa eskatu zuen diru-laguntza hori jaso ahal izateko. Eta hori da LABeko ordezkariek eta Administrazioko langileek publikoki eta mobilizazioen bidez salatu zutena: Javier Nogelesen etika falta. Berak informazio pribilegiatu hori erabili zuen beste langileei kendu behar zietena eskubidea, kendu baino lehenago berak lortzeko. Eta horregatik salaketa publiko horren eremuan Javier Nogalesek kereila bat jarri zuen mobilizazioetan megafonoa eskuan zeraman delegatuaren kontra, Patxiren kontra. Zigortu nahi dute langile guzti horien buruan zihoan ordezkari sindikala. Zigortu nahi dute langileak antolatzea eta mobilizatzea, azken finean lan sindikala.
{module[111]}