2000. urteko hamarkada hasieratik dago abian laneko ezbeharren inguruko akordio intersindikala, LAB, Hiru, EhNE, ESK, STEILAS, Nafarroako CGT eta ELA sindikatuen artekoa. Gaur ELAk bere burua akordiotik kanpo kokatu du, bide berri bat arakatuko duela iragarriz, nahiz eta ez duen adierazi bide hori zein izango den.
Akordiotik aldebakarrez irteteko ELAren argudioa LABen Osalan eta NOPLOIn parte-hartzean oinarritua dagoela dirudi. Afirmazio harrigarria da, 2018ra arte ELAk modu normalizatuan parte hartu baitu NOPLOIn, akordio intersindikalean inolako oztoporik sortu gabe. LABek ere modu ez normalizatuan parte hartzen jarraitu du instituzio horretan gaur arte, protesta gisako etenaldiak tarteko, urteetan akordioan inongo oztoporik eragin gabe. Agian zintzoagoa litzake ELAk aitortzea akordioak nola ulertzen dituen, bere irizpideen 100% aintzat ez hartzekotan akordioak lehertzen saiatzen dela baitirudi.
LAB sindikatutik adierazi nahi dugu akordioa lan istripuei erantzuteko tresna egokia dela eta bere potentziala aurrera eraman behar dugula horretan indar gehiago ipiniz. Lan osasunaren galera hain da nabarmena, elkarlan sindikalaz bestelako eskenatokirik ez dela onargarria; izan ere, adostasunerako jarrera eta ariketa zintzoa da izurrite honen aurrean erakutsi behar duguna, ez besterik. Honela, adierazi nahi dugu akordio intersindikaleko ateak beti zabalik izango direla.
Hau esanda, nahi baino lehen batuko gara, tamalez, patronalak eragindako laneko heriotza baten aurrean elkarrekin erantzuteko.