Astelehen honetan LABek argitara ateratako azken lan istripuarekin 10 dira azken bi hilabeteetan lanean kapitalismoak eta patronalak Nafarroan erail dituen langileak. Osotara, 2018. urtean, prekarietateak 42 langile hil ditu lanean Euskal Herrian. Horietako 13, Nafarroan. Egoera lazgarri honek berehalako erantzuna behar duenez, LAB sindidikatuak eskatu du Lan Osasuneko Kontseilua lehenbailehen biltzeko.
Sarraski hau amaitu behar dugu, onartezina delako ikuspegi humano eta demokratiko batetik. Langileok lan duina eta bizi duina nahi dugu. Langileok bizirik itzuli nahi dugu etxera.
Patronala sarraski honen arduradun nagusia da. CEN patronalak bere etekin ekonomikoak lehenesten baititu langileon osasuna eta bizitzaren aurretik. CENeko lehendakari nagusia den Sarria jaunak askotan esaten du herrialde honetan enpresariek enplegu sortzen dutela. Ez da egia, enpresariek herrialde honetan kapitala metatzen dute eta horretarako alde batetik iruzur fiskala erabiltzen dute eta lanean langileak hiltzen dituzte. Nabarmendu behar da egoera honen aurrean CEN patronalak duen isiltasuna.
Nafarroako Gobernuak langileon bizitzak bermatu behar ditu, eta egoera honen aurrean neurri eraginkorrak hartzeak bere lehentasuna izan behar du. Abuztuan, Nafarroako Gobernuak – Izaskun Goñi Industria Zuzendari Nagusiak, hain zuzen ere- lan istripuen inguruko bilera baten berri eman zuen, irailaren 4rako. Gaur, irailaren 5ean, LAB sindikatuak ez du inolako gonbidapenik jaso. Beraz, LABek oso larritzat jotzen du Nafarroako Gobernuak gai garrantzitsu honekin propaganda hutsa egitea, onartezina da.
Hori dela eta, LAB sindikatuak Nafarroako Lan Osasuneko Kontseilua lehenbailehen biltzea eskatu du, lan osasuneko neurriak hartzeko markoa delako. Neurriak hartzeko garaia da, hau jada hil edo biziko kontu bat delako.