LABek erabat gaitzesten du Tubos Reunidoseko zuzendaritzak Amurrioko eta Trapagarango lantegietan iragarritako EEEa.
Ez dugu onartzen egoera koiuntural baten eta erabaki estrategiko okerren kostua langileei ordainarazi nahi izatea, enpresak ehun milioi euro baino gehiago jaso dituenean diru publikoan, bideragarritasun industriala eta enplegua bermatzeko.
Tubos Reunidos ez da bere zoriaren esku utzitako enpresa bat. Urte luzez laguntza publikoak, Estatuaren abal publikoak eta gizarte osoak finantzatutako ABEEEak izan ditu. Diru publikoarekin sostengatutako enpresa batek ezin ditu langileak kaleratu. Horregatik, LABek prozesu honetan parte aktibo izan diren erakundeen erantzukizuna ere seinalatzen du.
Lurralde eragina bereziki larria da Ezkerraldean eta Aiaraldean, desindustrializazioak eta industria enpleguaren etengabeko galerak gogor kolpatutako bi eskualdetan. Ez dago benetako berrindustrializazio planik gaur egun lanpostuen suntsiketa onartzen den bitartean.
LABek ez du onartzen ez EEErik ezta enplegu-suntsiketarik ere. Enplegua, Amurrioko eta Trapagarango lantegiak eta bi eskualdeen etorkizun industriala defendatzeko aktibazioa, antolakuntza eta borroka kolektiboa sustatuko ditugu.