LABek era positiboan baloratzen du ostiralean Fagor Etxetresnak enpresaren enplegua erregulatzeko espedientearen harira enplegua bermatzeko lortu den aurreakordioa. Aurreakordio horren arabera, Fagor Etxetresnak erosiko duten erosleen enpresetan langileen birkokatzeak emateko aukera zabaltzen da..

Bestalde, ordainsariarekin enpresa utzi nahi izan dutenei, aukera hori eman zaie.

Akordio horren arabera, LABen iritziz, enpleguaren alde egin duten langile guztiek lanpostu bat lortu ahal izateko baldintza paregabeak ezartzen dira, eta hori izan da hain zuzen ere LABek negoziaketa honetan ezarritako helburua.

LABek akordio hau erdiesteko langileen borrokak izandako lana txalotu nahi du, hori gabe ezinezkoa izango baizten akordio hau lortzea.

Amaitzeko, gogoratu nahi dugu, oraindik lana dagoela egiteko eragile guztien partetik, lanpostuen mantentzea bermatzeko, eta proiektu industrial ezberdinek aurrera egin dezaten baldintzak sortzeko.

Hortan murgiltzeko deialdia egin nahi diegu instituzio publikoei, adostutako akordioaz gain oraindik lanpostu gehiago sortzeko aukera bizirik baitago, Basaurin eta Azpeitian. Euskal Herriak ezin ditu horrelako aukerak pasatzen utzi.

Kooperatiben munduko enpresa bat eta sindikatuen arteko akordio bat erdietsi izanak oso egoera zailean, frogatzen du bi mundu horien osagarritasuna posible dela, eta akordioak lortzen direla, horretarako borondatea dagoenean. Etorkizunean, bien arteko zubiak eraikitzea ezinbestekoa izango da.