Sortu da Orpricce, patronalari hitzarmenak ez betetzeko aukera ematen dion organoa, patronalari derrigorrezko arbitrajea oparitzen diona, erreforma ontzat ematen duen organoa. Orpricceren sorrerarekin, Gasteizko Gobernuak hitzarmenak ez betetzeko aukera guztiak eskura ipini dizkio patronalari.
Orpricceren aurrean LABek duen jarrera beste sindikatuekin ere konpartitu dugu. Izendapenak egiteari uko egin eta jarrera bateratu batekin, hasieratik organu hori guztiz baldintzatu genezakeen, eta horretarako gonbitea egin genien.
Baina erantzuna ez da izan nahi genuena, ezta langileek merezi zutena ere. Eusko Jaurlaritzak lan erreforma bere egin eta Orpricce sortu du eta beste sindikatuek ez dute erabaki hori auzitan jarri, babestu egin dute eta zilegitasuna eman, beren parte hartzearekin.
Zer zentzu dauka erreforma ontzat ematen duen eta langileen kontrakoa den organo batean parte hartzeak? Gatazkaren jarraipena hasieratik amaierarara egitearena ez da arrazoi nahikoa. LABen ikuspegitik ulertezina eta larria iruditzen zaigu jokaera hau, are larriagoa, konfrontazioa langileok daukagun giltza bakarra dela esan eta Gobernuei nahiz patronalei koberturarik emateko prest ez daudela adierazten duten sindikatuen aldetik datorrenean, ELAk egin duen bezala.
Orpriccek soldata jaitsierei eta kaleratzeei bermea emateko baino ez du balioko. Beraz, aukera paregabea galdu dugu batzuen aldetik hainbestetan aldarrikatzen den konfrontazioa eta benetako plantoa egiteko, era partekatu batean, eta benetan indar eginez, ipar orratz argi batekin.
LABek patronalaren asmoa borrokatzen jarraituko du eta patronalak hitzarmenak ez betetzeko erabakia hartzen duen guztietan, ez gaituzte izango Orpriccen jezarrita, baizik eta enpresa horietan aurreaz aurre, borrokan, langileen eskubideen alde.