2025-04-19
HomeEkintza SindikalaLABek lanpostuak mantentzea ahalbideratuko duten proiektu industrialen alde egingo du Fagor Etxetresnak...

LABek lanpostuak mantentzea ahalbideratuko duten proiektu industrialen alde egingo du Fagor Etxetresnak Taldean

FAGOR ETXETRESNAK TALDEAREN likidazio prozesuaren harira LABetik, lehenik eta behin, lanpostuak mantentzea ahalbideratuko duten proiektu industrialen alde egingo dugula jakinarazi nahi dugu. Likidazio fasean dago Fagor Taldea, eta orain interesa duen edonork eskeintzak aurkezteko garaia da. Likidazio horretan, langileon ordezkarion iritzia kontuan hartua izango da eroslea hautatzerakoan.

LABentzat, egoera honetan, gure babesa erabakitzeko aldagai nagusienak bi dira:

Ahal den enplegu gehien mantentzea baldintza duinetan: ez dugu onartuko Fagor Etxetresnaken errekonbertsioa lan baldintzen prekarizazioaren bizkar egitea.

Proiektu industrialaren sendotasuna, bai enplegu zuzenaren ikuspegitik, baita eskualdearen etorkizuneko garapenerako sortu daitekeen aberastasunarin dagokionez (sinergiak beste enpresekin, zeharkako lanpostua…).

Eusko Jaurlaritzari eta bereziki bere Industria Sailari, berriz, eskatu nahi diogu adierazpen publikoetaz haratago helburu hauekiko konpromisoa ekintzetan gauzatzea.

FAGOR ETXETRESNAK TALDEko langile guztien egoera larria dela deritzogu, izan Grumaleko, Fagorreko edo Edesako langile, eta izan enpresako jabetzaren jabe edo besterentzako lana egiten duen langilea. Konponbiderik egongo bada guztientzat konponbidea izan behar dela uste dugu, bazkide izan ala ez. Honek, kooperatibismoaren berezko elkartasun izaera indartuko luke.

Hartzekodunen Konkurtsoko Administratzaile direnei, eta FAGOR markaren jabe den MCCri zentzu honetan, euren inplikazioa areagotu dezaten eskatzen diegu. MCCk erantzunkizuna du FAGOR Taldearen egoeran, eta erantzunkizun horri aurre egin behar dio. FAGOR marka Taldeko beste enpresa baten izenean dutenez, eta likidazioan industria jarduerarekin aurrera egiteko markaren erabilpena beharko dutenez erosleek, langile guztien eskubideak defendatzeko eskatzen diogu MCCri. MCCk orain du momentua frogatzeko ez duela bestelako multinazionalen moduan jokatzen.

Uste dugu Euskal Herriaren etorkizunerako osagai garrantzitsua izango dela kooperatibismoa, eta elkartasunean eta partaidetzan oinarritutako eredua beharrezkoa izango dela beste Euskal Herri justuago bat eraikitzeko eta eskualdearen etorkizuneko garapenerako.

Are eta gehiago, FAGOR Taldeko krisia euskal kooperatibismoaren azterketa kritikoa egiteko erabili beharra dago, etorkizunari begira jartzeko, jatorrizko elkartasun baloreetan oinarrituta.

Horretarako LABek bere prestutasuna adierazi nahi du.

 

 

 

AZKEN ALBISTEAK | ÚLTIMAS NOTICIAS

Enviserreko langileek greba gogortu dute, protestaren hirugarren astean

Hiriko parkeak, lorategiak eta eraztun berdea mantentzeko Gasteizko Udalaren kontrata den Enviser enpresako langileek hiru aste bete dituzte greban. Baldintza duinak jasoko dituen hitzarmen propio bat lortzea da beren helburua. Hainbat langilek Gasteizko udaletxearen aurrean pasa dute gaua, azken honen inplikazioa eskatzeko.

LABek ontzat jo du Iruñeko Udalaren eta alokairuzko bizikleten enpresaren artean sinaturiko akordioari esker langileei zor zitzaizkien soldatak ordaintzea

LAB sindikatuak duela bi aste salatu zuen Ride On Pamplona Iruñeko alokairuko bizikleta elektrikoen zerbitzuko langileak egoera larrian zeudela, sei hilabete baitzeramatzaten nominak berandu kobratzen eta, gainera, enpresak bi nomina oso zor baitzizkien. Iruñeko Udalak eta Ride On-ek gaur iragarri duten akordioaren arabera badirudi zerbitzuaren jarraipena bermatuko dutela eta enpresak berehala kitatuko dituela langileekin dituen zorrak.

LABek salatzen du milaka gutun banatu gabe daudela Gasteizen Correoseko langile faltagatik

Langilerik ez kontratatzearen ondorioz, kaosa sortu da azken hilabeteetan posta-banaketan, eta inoiz ikusi gabeko egoetara iristen ari da. Kontratazioan murrizketa hain handia da, kasu askotan ez dela inor ordezkatzen ari. Adibidez, Alde Zaharreko postariak urte erdi baino gehiago darama bajan, ordezkatu gabe.