Akordioak amaiera ematen dio sektorearen estatalizazioari eta nabarmen hobetzen ditu milaka langileren lan baldintzak.
Hainbat urteko borroka, mobilizazio eta antolakuntza sindikalaren ondoren, LAB sindikatuak EAEko sukaldari kolektiborako lehen hitzarmena siantu du gaur, Araba, Bizkaia eta Gipuzkoako sektoreko langileei eragiten dien akordio historikoa.
Joan den 2025eko irailaren 04an, sektoreko enpresa nagusien aurrean egin genituen mobilizazioen ondorioz, negoziazio-mahaia eratzea lortu zen, eta, lehen aldiz, negoziazio-eremu propioa ireki zen orain arte estatu-esparruen inposizioak eta lan-prekarietateak markatutako sektore batentzat. Hitzarmen hau sinatzeak paradigma aldaketa dakar, sektoreko lan baldintzak Euskal Herrian erabakitzera pasako baitira. Hemen lan egin, hemen erabaki.
Hitzarmena 2025etik 2032ra egongo da indarrean, eta lan-hobekuntza nabarmenak izango ditu; besteak beste, hauek:
• Lanaldia: 1.592 ordu urtean hitzarmenaren indarraldia amaitzean.
• Soldata-igoerak: % 20 eta % 24 artean indarraldi osoan.
• Antzinatasuna: % 3,5eko hirurteko mugagabeak.
• Gaueko lanaren, igandeen eta jaiegunen osagarriak.
• Aldi baterako ezintasuna (ABE): %75 bajako lehen egunetik
• Berdintasun-plana, jazarpena prebenitzeko eta hari aurre egiteko protokoloak…
Lan-eskubideei eta egonkortasunari dagokienez, hitzarmenak beste aurrerapen garrantzitsu batzuk ere jasotzen ditu. Izan ere, sektore hori oso feminizatuta dago, eta funtsezkoa da sukaldaritza kolektiboan; hain zuzen ere, jangela eta enpresa-jantokietan, ospitaleetan, zahar egoitzetan, sukalde zentraletan, eskola-garraioan eta beste zerbitzu publiko eta pribatu batzuetan dago.
LABek azpimarratu du akordio hau sektoreko langileen mobilizazioaren emaitza zuzena dela, eskubideak lortu eta lan baldintzak hobetzeko antolakuntza kolektiboa ezinbestekoa dela erakutsiz.
Datozen egunetan, LAB sindikatuak lantokietan emango du akordioaren edukiaren berri zehatz-mehatz.
LABek sukaldaritza kolektiboko langile guztiak zoriondu nahi ditu lorpen historiko kolektibo honengatik, hori gabe lehen hitzarmen hau ez baitzen posible izango.
Borrokak merezi du!