Eusko Jaurlaritzak 35 orduen lanaldia luzatzen duen dekretua mantentzen duelako, eta Mahai Orokorraren eremuak ezer negoziatzeko bermerik eskaintzen ez duelako, LABek bileratik alde egitea erabaki du, gainontzeko sindikatuei koherentzia bera mantentzea eskatu ondoren. 

Hilabeteak igaro dira EAEko azken Mahai Orokorraren bilera egin zenetik, sindikatu guztiok altxatzea erabaki genuena. Jaurlaritzak 35 orduko lan-astea hausten zuen dekretua bertan behera uzteko asmorik agertu ez zuelako, eta benetako negoziazioari ekiteko baldintzarik bermatzen ez zelako. Lan baldintzak okertzeaz gain, neurriak enplegua suntsitzen zuela salatu genuen sindikatuok, bai eta elkarrekin hainbat mobilizazio deitu genuen ere, tartean hiru hiriburuetan manifestazio bana gauzatu ere. Gasteizko parlamentuak berak ere dekretua bertan behera uzteko eskaera luzatu zion Jaurlaritzari.

LABek hain zuzen ere foro horretara itzultzeko erabakia baldintza horietan oinarritu ditu, 35 orduko lan-astera itzultzean eta benetako negoziazio bat izateko bermean. Hain zuzen ere lanaldiaren gaia deialdiaren bigarren puntuan agertzen zelako gaurko bilerara bertaratzea erabaki dugu.

Susmatzen genuen bezala, Eusko Jaurlaritzak komunikatu duen lanaldiaren inguruko erabakiak ez zekarren aldaketarik, eta 2014rako dekretua bere horretan mantentzea izan da bere erabakia. LABek erabakia eta negoziazioa iruzur hutsa dela salatu du, eta bileratik alde egiteko asmoaren berri eman eta gainontzeko sindikatuei berdin egitea eskatu die. Izandako etenaldi baten ondoren esandakoa bete eta bileratik alde egin du LABek.

LABek honetaz guztiaz zera ondorioztatzen du, batetik, ustezko negoziazioa den bilera dinamika hau iruzur hutsa dela; eta bestetik EAJk Madrilek hartzen dituen erabakiak zintzo-zintzo betetzen dituela, eta ez duela inolako borondaterik bide propio bati ekiteko.

LABek jarraitzen du lehentasun gisa negoziatzeko eskubidea eta enplegua jartzen, eta hain zuzen ere horri heldu diogu gaurkoan ere. Beste sindikatuek ere koherentzian berdin jokatzea espero dugu, langileentzako eta zerbitzu publikoentzat antzuak diren dinamikak baztertu eta borrokaren bidearekin jarraitzea.
 

LAB sarean
{module[111]}